Uko umunyarwanda Coulombe yabonanye n’umuryango we nyuma y’imyaka 30 baraburanye

Yanditswe na Evariste Nsengimana
Kuya 9 Gashyantare 2020 saa 08:45
Yasuwe :
0 0

Umunyarwanda Jean-Paul Coulombe umaze imyaka 28 aba muri Canada atazi inkomoko ye, yaje kubona ibisa n’ibitangaza amenya ko avuka mu Rwanda ndetse ko n’umuryango we ukiriho.

Jean-Paul Coulombe ufite imyaka 30 y’amavuko, amaze imyaka 10 mu ngabo zirinda ku kibuga cy’indege cya Bagotville muri Canada. Bivugwa ko Se wari ufite abandi bana bane, yananiwe kumwitaho nyuma y’uko Mama we yitabye Imana hashize amezi atanu amubyaye.

Kugira ngo wumve neza uko byagendekeye Coulombe biragusaba kugaruka nyuma gato mu myaka ya 1990 ubwo u Rwanda rwinjiraga mu ntambara, abari impunzi bashaka kugaruka mu gihugu cyabo, Leta yariho itabashaka.

Yaje kuva mu Rwanda mu 1992 afite imyaka ibiri, mbere gato y’uko Jenoside yakorewe Abatutsi itangira, ajyanywe n’ababikira bo muri Notre-Dame du Bon-Conseil de Chicoutimi, bafashe abana benshi icyo gihe bajya kubarera.

Abo babikira bamujyanye mu mujyi wa Saguenay ari nawo akirimo kuva icyo gihe kugeza uyu munsi yujuje imyaka 30 y’amavuko, uyu munsi akaba ari mu ngabo za Canada.

Ati “Murabizi ko kugira ngo umenye aho ugana ugomba kubanza kumenya aho wavuye, ntacyo nari nzi ku bijyanye n’umuco wacu, inkomoko yanjye n’ababyeyi banjye. Ntacyo nari mfite aho, nahoraga nibaza byinshi.”

Nyuma y’ubushakashatsi uyu musore yakoze yaje kugera ku cyemezo cye cy’amavuko n’impapuro z’inzira yagendeyeho kugira ngo agere muri Canada, uyu munsi akaba ashimira ababikira bo muri Notre-Dame du Bon-Conseil bamwitayeho.

Yasanze ibyo byangombwa bigaragaza ko amazina ye ari Jean-Paul Mpoberabanzi, akaba yaravukiye mu cyahoze ari Perefegitura ya Byumba ariko ntiyabasha kumenya andi makuru yisumbuye.

Nyuma y’amezi abiri uyu musore yaje gusohokana n’inshuti ze muri Hotel Le Montagnais bagiye gusangira Noheli, ahahurira n’umuntu ucunga umutekano kuri iyo hoteli witwa Kagimbura Égide.

Kagimbura yavuye mu Rwanda nyuma ya Jenoside yakorewe Abatutsi, mu mwaka wa 1998.

Coulombe akimara kubona Kagimbura yabonye bafitanye asura, niko kumwegera atangira kumuganiriza amubaza niba ari umunyarwanda, batangira kuganira gutyo ariko Coulombe amuhishurira ko atazi inkomoko ye ariko yifuza kumenya byinshi ku gihugu cye n’aho yaturutse.

Kagimbura yumvise agize amatsiko yo kumenya amateka ye, amusaba kumubwira byinshi bijyanye n’uko yavutse ngo amufashe kumenya inkomoko ye.

Kagimbura yaje koherereza impapuro nyirarume Jean-Bosco Murengera-Ntwali wari uri i Kigali. Bitewe n’uko Ntwali, ahita yiyemeza gushakisha umuryango wa Jean-Paul Coulombe.

Nyuma y’iminsi ibiri uyu mugabo yaje kuvumbura amakuru meza kuri Jean-Paul Coulombe ko uretse kumenya inkomoko ye ahubwo n’ab0 mu muryango we barimo Se, bakuru be babiri na bashiki be babiri bagihumeka.

Aya makuru yahise ayoherereza mwishywa we nawe yihutira kuyamenyesha Jean-Paul Coulombe, amuha n’amafoto yabo yabashije kubona.

Kagimbura yasabye Coulombe ko bahura akamuha amakuru bari kumwe amaso ku maso ariko Coulombe bibanza kumutera ubwoba yibaza ko umuryango we ushobora kuba utakiriho.

Ati “Ntabwo nari niteze inkuru nziza nk’iyo ni nk’uko umuntu umaze igihe atabona yakongera kureba. Byabaye ibyishimo bidasanzwe. Nararize cyane kubera ko numvaga nsigaye ndi njyenyine mu Isi.”

Uyu mugabo ibyo byaramurenze ariko agashimira Kagimbura na Nyirarume bamufashije kongera guhura n’umuryango we, ubuzima bwe bukongera kugira ahazaza n’icyizere byari byarayoyotse.

Coulombe avuga ko muri Werurwe aribwo ateganya kugaruka mu Rwanda, agahura n’abavandimwe be yamaze igihe atazi ko babaho.

Kagimbura (ibumoso) na Coulombe yafashije kubona umuryango we
Coulombe yishimiye kumenya ko umuryango we ukiriho
Umuryango wa Coulombe uherereye mu karere ka Gicumbi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza