Uko Kizito Mihigo yafashwe n’abaturage, isomo ku bashaka guhungabanya u Rwanda

Yanditswe na IGIHE
Kuya 16 Gashyantare 2020 saa 09:08
Yasuwe :
0 0

Ku wa Gatanu tariki 14 Gashyantare, Urwego rw’Igihugu rushinzwe Ubugenzacyaha rwemeje ko rufite umuhanzi Kizito Mihigo wafashwe agerageza gutoroka igihugu ngo agane mu Burundi, kwifatanya n’imitwe y’iterabwoba.

Mihigo yafashwe n’abaturage bo mu Karere ka Nyaruguru, nyuma yo kubaha ruswa ngo bamureke bakabyanga.

Nzisabira Eliab, umuturage ukora ibijyanye no gusudira mu Kagari ka Remera, Umurenge wa Ruheru muri Nyaruguru, yavuze ko yabonye ku wa Gatatu Kizito anyuzwa mu gasantere k’aho akorera afashwe n’abaturage.

Ati “Byari hafi saa moya z’umugoroba ubwo nabonaga Kizito Mihigo atwawe n’abaturage babiri b’inaha, ngira amatsiko yo kumenya ibiri kujya mbere.”

Nzisabira ngo yakurikiye abo baturage bari bafashe Kizito kuko yari abazi neza ngo ababaze, bihurirana nuko inzego z’umutekano zari zimaze kuhagera ziramujyana.

Ati “Ubwo nababazaga ibyabaye, inzego z’umutekano zari zamaze kumenyeshwa zarahageze, ziramutwara.”

Yavuze ko mbere yo kugezwa mu maboko y’inzego z’umutekano, Kizito Mihigo yabanje guha ruswa abo baturage bamufashe bakayanga.

Ati “Imodoka yabanje kubasiga (Kizito n’abo bari kumwe) mu gasantere dukoreramo. Ni ahantu hari nk’iminota icumi ngo ugere mu Burundi. Ubwo abaturage bababonaga, barabahagaritse babaza aho bagiye.”

Ngo Kizito Mihigo agihagarikwa n’abaturage, yabaye nk’ugize ubwoba atangira kubatakambira ngo abahe ruswa bamureke.

Ati “Bwa mbere bumvikanye ko abaha ibihumbi 200, bagera ku bihumbi 300 Frw kugeza ubwo abaturage bageze aho barayanga.”

RIB ivuga ko Kizito yashakaga kwambuka mu Burundi kwifatanya n’imitwe y’iterabwoba ishaka guhungabanya umutekano w’u Rwanda. Kizito kandi ashinjwa ibyaha bya ruswa.

Si ubwa mbere Kizito Mihigo afashwe, dore ko yarekuwe mu 2018 ku mbabazi za Perezida wa Repubulika nyuma yo guhamywa ibyaha birimo kurema umutwe w’abagizi ba nabi, icyaha cy’ubugambanyi bwo kugiririra nabi ubutegetsi buriho ndetse n’icyaha cy’ubwoshye bwo kugiririra nabi Perezida wa Repubulika n’icyo gukora umugambi w’icyaha cy’ubwicanyi.

Abanzi b’u Rwanda bararye bari menge!

Umwaka ushize mu Ukuboza, nabwo abaturage bo mu Murenge wa Kinigi mu Karere ka Musanze bafashe mpiri umwe mu nyeshyamba za RUD Urunana zari zagabye igitero muri ako gace, zikica abaturage 14, abandi bagakomereka.

Uwo yafashwe n’umukecuru n’abakobwa be ubwo yihishaga mu byatsi Ingabo z’u Rwanda ziri kubashakisha uruhindu.

Kuba bongeye kwigaragaza kuri uyu wa Kane ubwo bafataga umuhanzi Kizito Mihigo, Depite Frank Habineza uyobora Ishyaka Democratic Green Party of Rwanda yabwiye IGIHE ko bigaragaza ikigero cy’imyumvire y’abaturage mu kwicungira umutekano.

Yavuze ko ari n’ikimenyetso cy’umubano mwiza uri hagati y’inzego zishinzwe umutekano n’abaturage, ku buryo bikwiye gutera ubwoba abashaka kumenera mu baturage ngo bahungabanye u Rwanda.

Ati “Bamaze kubona ko kutagira uruhare mu gucunga umutekano, ingaruka mbi n’ubundi ziza zihungabanya ubuzima bwabo n’ubw’imiryango yabo. Biratanga icyizere ko umwanzi atapfa kudutera ngo barebere.”

Depite Habineza yavuze ko bikwiriye kubera isomo abanzi b’u Rwanda bumva ko bazaruhungabanya baciye mu baturage.

Ati “Iyo abaturage bamaze kubona ko iyo umutekano uhungabanye aribo bahungabana, baba bamaze gutera imbere no muri demokarasi. Umwe ushaka kuza kubabeshya ntibyamushobokera. Bariya babeshyaga abaturage ngo barashaka kubakorera ibi n’ibi, baraza guhomba nyine.”

Umusesenguzi mu bya Politiki akaba n’Umwarimu muri Kaminuza, Dr Ismael Buchanan, yavuze ko imyumvire Abanyarwanda bafite ubu iyo baza kuyigira ubwo Jenoside yakorewe Abatutsi yabaga, bitari kuba bibi nk’uko byagenze.

Ati “Ntawe ugitegereza ko umutekano ucungwa n’abasirikare n’abapolisi, abaturage ubwabo bafite uburenganzira bwo gukora ibyo bashaka kugeraho. Byerekana ubufatanye bw’inzego z’umutekano n’abaturage, ko zikorera hasi mu baturage kurusha gukorera hejuru.”

Yakomeje agira ati “Nta wakora icyo yiboneye cyangiza umutekano, Umunyarwanda acecetse. Iyo abaturage bagira imyumvire nk’iyi na mbere, ntabwo Jenoside yakorewe Abatutsi yari kugera hariya. Abanyarwanda bamaze kubona isomo ry’icyo umutekano bivuga kuko nibo ba mbere bagerwaho n’ingaruka.”

Buchanan yavuze ko byakabaye isomo ku banzi b’u Rwanda, kuko “Uzibeshya agahungabanya umutekano w’u Rwanda, ntazategereze ko isasu rivuga.”

Agaruka ku byabaye i Nyaruguru abaturage bafata umuhanzi Kizito Mihigo, Buchanan yavuze ko bishimangira ko abaturage bari maso.

Ati “Ni nk’uriya wari ugiye guhungira mu Burundi, umuntu wahawe imbabazi na Perezida, yibwiraga ko yakoresha izo mbabazi uko yishakiye. Bigaragaza nabyo uburyo abaturage baba bari maso, babona ibikorwa.”

Iteka rya Perezida Nº131/01 ryo ku wa 14/09/2018 ritanga imbabazi kuri Kizito Mihigo, rivuga ko imbabazi za Perezida zishobora kwamburwa uwazihawe bitewe n’uko akatiwe kubera ikindi cyaha, mu rubanza rwabaye ndakuka no mu gihe atubahirije kimwe mu byo yategetswe nyuma yo kurekurwa.

Nyuma yo kwamburwa imbabazi, uwari wahawe imbabazi afungwa igice cy’igihano cy’igifungo yari asigaje, kibarwa uhereye ku munsi yambuwe imbabazi. Bivuze ko Kizito aramutse ahamwe n’icyaha, yabanza gufungwa imyaka itandatu yari isigaye ngo igihano cye cy’imyaka icumi yari yarakatiwe kirangire.

Umuhanzi Kizito Mihigo (ibumoso) yafashwe n'abaturage muri Nyaruguru ashaka gutoroka igihugu nkuko Urwego rw'Ubugenzacyaha rwabitangaje

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .