00:00:00 IGIHE NETWORK KN KINYARWANDA EN ENGLISH FR FRANCAIS

Uganda yaguze indege y’intambara, Abanye-Congo baratabarizwa; Avugwa mu Karere

Yanditswe na IGIHE
Kuya 25 June 2022 saa 12:32
Yasuwe :

Igisirikare cya Uganda, UPDF, cyaguze indege y’intambara idasanzwe mu gihe iki gihugu gikomeje ibikorwa byo guhangana n’umutwe wa ADF mu Burasirazuba bwa Congo ndetse umupaka wa Bunagana, uhuza Uganda na Congo, ukaba uherutse kwigarurirwa n’umutwe wa M23.

Amakuru avuga ko indege yaguzwe ari Mi Mi-28 yaguzwe mu Burusiya, ikaba ibarirwa agaciro ka miliyoni 18$. Ni indege ifite ubushobozi bwo kurasa za misile, ikaba yarasa indege ziri mu kirere ndetse ikaba yanarasa ku butaka.

Amakuru avuga ko ubwo Perezida Yoweri Museveni yajyaga kwifatanya n’ingabo zirwanira mu kirere no kuzishimira ku kazi keza zikora, ari bwo bwa mbere hagaragaye izi ndege eshatu, nk’uko Daily Monitor yabitangaje.

Uganda ikomeje kongera ingengo y’imari ishyira mu gisirikare, aho mu mwaka ushize yashoyemo arenga miliyari 1.06$, inyongera ya 8.3% ugereranyije n’ayo yari yashoyemo mu mwaka wari wabanje.

Uganda yaguze indege z'intambara za Mi Mi-28

Air Tanzania igiye gusubukura ingendo zigana mu Bushinwa

Sosiyete ikora ingendo zo mu kirere ya Tanzania, Air Tanzania Company Limited (ATCL), yatangaje ko igiye gusubukura ingendo zigana mu Bushinwa nyuma y’uko zari zakomwe mu nkokora n’icyorezo cya Covid-19, cyari cyatumye zihagarikwa.

Izi ngendo zari zarafunguwe mu 2021, bikaba byitezwe ko zizakomeza kugira uruhare mu kongera ubucuruzi hagati ya Tanzania n’u Bushinwa, bwiyongereyeho 47% mu 2021, bukagera ku gaciro ka miliyari 6.7$ ugereranyije n’uko byari bimeze mu 2020.

Umuyobozi w’Agateganyo wa ATCL, Albinus Manumbu, yavuze ko batekereza ko izi ngendo zizatangira zitwara abadipolomate n’abandi bacuruzi, uko iminsi ishira zikazagenda zongerwa.

Tanzania iherutse gufungura ibiro biyihagarariye i Guangzhou, ndetse ikaba inateganya gufungura ibindi mu Mujyi wa Shanghai.

Air Tanzania igiye gusubukura ingendo mu Bushinwa

Abacuruzi ba Uganda bagaragaje ko batarisanga ku isoko ry’u Rwanda

Nubwo umubano hagati y’u Rwanda na Uganda uherutse kuvugururwa ndetse umupaka wa Gatuna ugafungurwa, ubucuruzi ntabwo burasubira ku kigero bwariho mbere y’uko uyu mupaka ufungwa, nk’uko bitangazwa na Minisiteri y’Imari ya Uganda.

Iyi Minisiteri igaragaza ko agaciro k’ibicuruzwa Uganda yohereza mu Rwanda kagabanutse cyane, kuko kari ku mpuzandengo y’ibihumbi 220$ ku kwezi, ugereranyije na miliyoni 16.6$ ku mpuzandengo y’ukwezi mu 2019.

Minisitiri w’Intebe w’u Rwanda, aherutse gutanga icyizere avuga ko ubucuruzi hagati ya Uganda n’u Rwanda buri mu nzira yo gusubira ku murongo nyuma y’ifungurwa ry’umupaka munini wa Gatuna.

Hagati aho, ubucuruzi Uganda ikorana n’ibindi bihugu nka Repubulika Iharanira Demokarasi ya Congo ndetse na Sudan y’Epfo bukomeje kwiyongera muri rusange.

Abacuruzi bo muri Uganda bavuga ko ubucuruzi butarasubira ku kigero bwahozeho nyuma y'ifungurwa ry'umupaka wa Gatuna

Congo: Abarenga ibihumbi 158 bamaze kuva mu byabo mu mezi atatu ashize

Kuva muri Werurwe uyu mwaka, abaturage barenga ibihumbi 158 bamaze kuva mu byabo mu Burasirazuba bwa Repubulika Iharanira Demokarasi ya Congo, kubera intambara yongeye kubura hagati y’umutwe na M23 n’Ingabo za Leta ya Congo, ndetse n’indi mitwe myinshi imaze igihe mu gukongeza umwuka mubi muri icyo gihugu.

Ishami ry’Umuryango w’Abibumbye ryita ku bana, UNICEF, ritangaza ko abana barenga ibihumbi 41 bamaze gukurwa mu byabo ndetse bakava no mu ishuri. Aba bana bari hagati y’imyaka itanu na 17. Abarenga ibihumbi 29 nabo bavuye mu ishuri kuko aho bigira hakambitse impunzi.

Muri rusange, abarenga miliyoni 1.9 bakeneye ubufasha muri Kivu ya Ruguru, kuko bagizweho ingaruka n’intambara zikomeje guca ibintu muri ibyo bice. UNICEF itangaza ko hakenewe miliyoni 1.9$ zo gufasha abana mu buryo bwihutirwa, ariko ikavuga ko amafaranga ihabwa adahagije.

Abana bakomeje kugirwaho ingaruka n'intambara muri Congo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .