00:00:00 IGIHE NETWORK KN KINYARWANDA EN ENGLISH FR FRANCAIS

Ubushakashatsi: Abagabo bo mu Rwanda basambana cyane, abikoza agakingirizo ni mbarwa

Yanditswe na Ferdinand Maniraguha
Kuya 9 Ukuboza 2020 saa 10:18
Yasuwe :
0 0

Ubushakashatsi bwa gatandatu ku bwiyongere n’ubuzima bw’abaturage, DHS, bw’umwaka wa 2019-2020, bwagaragaje ko abagabo mu Rwanda baza ku isonga mu kuryamana n’abagore barenze umwe ugereranyije n’uko bimeze ku gitsina gore.

Imibare yavuye muri ubwo bushakashatsi bwashyizwe hanze mu cyumweru gishize n’Ikigo cy’Igihugu gishinzwe Ibarurishamibare, igaragaza ko ku babukoreweho, abagore bangana na 1 % bavuze ko baryamanye n’abagabo barenze umwe mu mezi 12 yari ashize, naho abagabo bangana na 6% nibo bavuze ko baryamanye n’abagore barenze umwe mu mezi 12 ashize.

Habajijwe abagabo bagera ku bihumbi bitanu n’abagore basaga ibihumbi icumi bari hagati y’imyaka 15 na 49.

Igiteye inkeke muri ubwo bushakashatsi, ni uko abenshi mu bavuze ko babonanye n’abagabo cyangwa abagore barenze umwe, abakoresheje agakingirizo ari bake cyane, byumvikana ko bishobora kuba inzira yo kwandura indwara zandurira mu mibonano mpuzabitsina nka virusi itera SIDA n’izindi cyangwa inda zitateganyijwe.

Mu bagore bavuze ko baryamanye n’abagabo barenze umwe, 45 % nibo bakoresheje agakingirizo mu gihe mu bagabo, 29 % aribo bavuze ko bakoresheje agakingirizo.

Muri rusange, ubushakashatsi bwa DHS bwagaragaje ko umugore wo mu Rwanda mu buzima bwe abarirwa kuba yarabonanye n’abagabo 1,7 (ugereranyije ni babiri), mu gihe umugabo we abarirwa kuba mu buzima bwe yarabonanye n’abagore 2,8 (nibura ni batatu).

Kuki abagabo baza ku isonga, urubyiruko rukarusha?

Ntabwo imibare ya DHS ku bagabo cyangwa abagore baryamanye n’abarenze umwe ikabije cyane ariko ingaruka zayo zishobora kuba mbi cyane.

Umuyobozi w’umuryango Save Generations Organisation uharanira Iterambere ry’umwana, urubyiruko n’umugore, Yvette Nyinawumuntu, yabwiye IGIHE ko kuba abenshi badakoresha agakingirizo, bishobora kuba intandaro zo kubyara abana batateganyijwe.

Kuba umwana yavuka atateganyijwe, Nyinawumuntu avuga ko biteza ibindi bibazo mu muryango birimo gukura adakunzwe no kuba ababyeyi be bajya bahora mu makimbirane kuko umwe yamubyaye yaciye inyuma mugenzi we.

Yagize ati “Urya mwana na we uburyo aba yasamwemo aba ari inzirakarengane, aravuka adakunzwe. Kuba atateguwe n’uburyo azarerwa nyuma yo kuvuka, nabyo bimugiraho ingaruka. Umwana niba atishimimwe bishobora guteza amakimbirane mu babyeyi. Ibi bishobora gutuma ingo zisenyuka kandi byongera umubare w’abaturage, no ku gihugu ku buryo bw’ubukungu bifite ingaruka nyinshi.”

Imibare imaze iminsi itangazwa igaragaza ko gatanya ziyongereye mu Rwanda, nubwo impamvu y’ubwo bwiyongere itavugwaho rumwe. Ikigo cy’ibarurishamibare cyatangaje ko mu 2019 imiryango 8941 yatandukanye, ivuye ku 1311 mu 2018.

Kuba abagabo aribo benshi mu baryamana n’abagore barenze umwe, Nyinawumuntu yavuze ko bishobora kuba bituruka ku bintu byinshi birimo n’umuco.

Yavuze ko ubusanzwe mu muco nyarwanda, kugira cyangwa kuryamana n’abagore benshi byafatwaga nk’ikintu gikomeye, mu gihe umugore waryamanye n’abagabo benshi yafatwaga nk’ikirara.

Ati “ Mu muco wacu umugabo kuba yajya hanze, yabyara hanze cyangwa agakora imibonano mpuzabitsina hari aho byafatwaga nk’aho uwo muntu ari umugabo, apfa kuba afite ubushobozi cyangwa nta nabwo. Ku mugore, umugore mwiza ni udaca inyuma uwo bashakanye. Ubikoze bigaragara nk’aho ari uburara cyangwa nk’ubugwari.”

Nyinawumuntu yavuze ko ikindi gishobora gutuma abagabo baza ku isonga mu kuryamana n’abagore benshi, ari ibijyanye n’ubukungu. Yavuze ko mu miryango myinshi mu Rwanda, usanga abagabo aribo bafite umutungo kurusha abagore, bikaba byabasunikira mu kuwukoresha bajya mu bagore benshi.

Ati “Uyu munsi dufite amategeko meza agaragaza ko umugabo n’umugore bafite uburenganzira bumwe ku mutungo ariko iyo tugiye mu buryo bufatika umugabo aracyari imbere mu gushaka umutungo no kuwugira. Kujya hanze bigendana n’ubutunzi, umugabo ufite amafaranga ni na we ushobora kujya mu mibonano mpuzabitsina hanze.”

Ubushakashatsi bwa DHS kandi bugaragaza ko abagore bari hagati y’imyaka 20 na 29 aribo benshi bagaragaje ko baryamanye n’abagabo barenze umwe. Ni mu gihe ku bagabo, bari hagati y’imyaka 25 na 39, nubwo abari hagati y’imyaka 40 na 49 nabo babagwa mu ntege.

Nyinawumuntu yavuze ko kuba nk’abagore bari mu myaka 20 aribo benshi baryamanye n’abagabo barenze umwe, bishobora guterwa n’impamvu zitandukanye zirimo kutabona amakuru ahagije ku bijyanye n’imibonano mpuzabitsina ku rubyiruko, gushaka ubukire bwihuse n’ibindi.

Yagize ati “Urubyiruko rw’uyu munsi hariho umuvuduko wo gushaka ubutunzi byihuse, irari ry’amafaranga aho abato bifuza amafaranga y’abakuze, abakuze nabo bakaba batakifuza abagore bakuze ishakira abana bato.”

“Hari no kubura amakuru […] Urasanga umukuru wakabimubwiye (amuhana) nta mwanya abifitiye cyangwa ayo makuru ntayo afite. Hari no gushaka kumera nka kanaka akaba yakururwa n’iryo rari. Biroroshe kujya kuri Youtube akabona icyamamare runaka akaba yashaka kuba nkawe. Hari icyo ashobora kwifuza akaba atakibonera ubushobozi aka kanya, nyamara hari umuntu ukunze ufite ubwo butunzi, inzira yihuse ikaba iyo gukoresha imibonano mpuzabitsina.”

Ibindi byagaragajwe mu bushakashatsi

Ubushakashatsi bwa DHS bwagaragaje ko mu bagore bavuze ko baryamanye n’abagabo barenze umwe, 1,4 % ni abatarashaka abagabo, 0,7 % bafite abo bashakanye, naho 4,1 % ni abatandukanye n’abagabo cyangwa abapfakaye.

Mu mijyi niho hagaragaye umubare w’abagore benshi baryamanye n’abagabo barenze umwe kuko bangana na 2,5 % naho mu cyaro bangana na 1 %.

Hashingiwe ku cyiciro cy’amashuri, abagore bavuze ko baryamanye n’abagabo barenze umwe, abarangije amashuri abanza baza imbere kuko bari ku kigero cya 1,5 %, bakurikirwa n’abarangije amashuri yisumbuye bangana na 1,2 % naho abize muri Kaminuza bangana na 1%.

Ku bagabo, abavuze ko baryamanye n’abagore barenze umwe ku isonga haza abatandukanye n’abagore babo cyangwa abapfakaye, bagakurikiranwa n’ababana n’abagore babo. Abagabo bo mu mijyi nibo benshi bagaragaje ko baryamanye n’abagore barenze umwe ugereranyije no mu cyaro.

Ugendeye ku mashuri bize, abagabo bavuze ko baryamanye n’abagore barenze umwe, abize amashuri ari hejuru y’ayisumbuye (Kaminuza) nibo baza ku isonga kuko bangana na 6,3 %, abize amashuri yisumbuye bangana na 5,2 %, abize amashuri abanza bangana na 5,5% naho abatarageze mu ishuri bangana na 5,9 %.

Incamake y'imibare y'ingenzi ku bijyanye n'ikorwa ry'imibonano mpuzabitsina n'abarenze umwe mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .