00:00:00 IGIHE NETWORK KN KINYARWANDA EN ENGLISH FR FRANCAIS

Uburyo Amerika yadindijwe na ‘demokarasi’

Yanditswe na Léana Bisa
Kuya 3 June 2022 saa 07:46
Yasuwe :

Kuva kera Isi yarebaga Amerika nk’igihugu cy’igihangange, kirusha ibindi iterambere mu ikoranabuhanga, bikaba uko mu bukungu, byagera mu gisirikare bikaba ibindi mu gihe mu bijyanye na siyansi, ikoranabuhanga ryo mu isanzure n’ahandi henshi, Amerika yakomeza kwerekana impamvu iyoboye.

Ni inkubiri yatangiye nyuma y’Intambara ya Kabiri y’Isi, ubwo Amerika, ubusanzwe yari igihugu cyihagazeho, yatangiye kuguriza ibindi byari byazahajwe n’intambara, ifaranga ryayo ritangira gukoreshwa ku rwego rw’Isi.

Ubukungu bwayo bwabyungukiyemo, na yo igira uruhare mu kubaka uburyo bwo gutuma akaboko kayo kagera ku Isi, binyuze mu miryango, amahame n’amategeko mpuzamahanga yagize uruhare mu gushyiraho.

Iki gihugu cyakomeje guhashya abanzi bacyo, ku isonga hakaba ibintu bitavuga rumwe nacyo. Mu bihe byabanjirije Intambara y’Ubutita, Amerika yakomeje kwivuna umwanzi mu buryo bwose bushoboka, burimo kwica abayobozi mpuzamahanga, gukomanyiriza ibihugu mu bijyanye n’ubukungu, kohereza ingabo zayo zikajya gutera amahanga, kwivanga muri politiki z’imbere mu bihugu n’ibindi byinshi. Ibi bikorwa byarakomeje kugeza n’uyu munsi.

Muri ibi byose, Amerika yakunze gukoresha intwaro yitwa demokarasi. Byinshi muri ibi byaha byakozwe mu ishusho yo guteza imbere demokarasi n’ibindi nko kubahiriza amategeko mpuzamahanga. Ku bihugu bimwe na bimwe bitumvaga demokarasi nk’uko Amerika iyumva, byahuraga n’ingorane nyinshi.

Iyi myitwarire ya Amerika yakomeje kubangamira ubusugire bw’ibindi bihugu, bituma birushaho kugenda biyifata nabi. Ku rundi ruhande, ibibazo by’imbere mu gihugu, birimo nk’ikibazo cy’ikoreshwa ry’intwaro mu baturage, ikibazo cy’irondaruhu, ikibazo cy’ubusumbane bukabije, byose byarushijeho gutuma amahanga atangira gutakariza icyizere iki gihugu cy’igihangange.

Dufashe urugero, ikibazo cy’intwaro mu baturage ni kimwe mu bibazo byateje impagarara muri Amerika kuva kera kugeza n’uyu munsi.

Mu 2020 honyine, Abanyamerika barenga 43.671 bapfuye bishwe n’imbunda, habaye kurasira mu ruhame inshuro 610, abana bato bicishijwe imbunda bagera kuri 301 n’abangavu bagera kuri 1083.

Mu 2021, hagurishijwe imbunda zigera kuri miliyoni 18,8, zituma Abanyamerika batunze imbunda bagera kuri miliyoni 81,4. Muri aba, benshi batunze izirenze imwe, kuko muri Amerika yose habarurwa imbunda zirenga miliyoni 390 ziri mu baturuge. 44% by’Abanyamerika bose bavuze ko batuye mu bice bibamo irasanwa rya hato na hato, ku buryo bahorana igishyika.

Muri uwo mwaka, izi mbunda zagize uruhare mu kwica abagera kuri 40.012, habaho kurasira mu ruhame inshuro 692. Abana bato 313 n’abangavu 1257 bari mu baguye muri ibi bikorwa.

Muri uyu mwaka gusa, mu mezi atanu ashize, abantu bagera kuri 18,181 bamaze guhitanwa n’imbunda harimo abana 152 n’abangavu 539. Kurasana mu ruhame bimaze kubaho inshuro 233 harimo inshuro 27 byabereye mu bigo by’amashuri.

Biragaraga ko muri Amerika hari ikibazo cy’imbunda kandi ntabwo ari gishya, impamvu abayobozi ntacyo babikoraho ni uko muri Demokarasi ya Amerika hari itegeko riha abaturage uburenganzira bwo gutunga intwaro, nubwo bigira ingaruka ku bandi.

Kubera ubu bwisanzure, nk’uko Abanyamerika babyita, usanga n’umuntu utakagombye gutunga imbunda, nk’urugero kubera uburwayi bwo mu mutwe, aba ashobora kuyibona mu buryo bworoshye.

Abo mu Ishyaka ry’Aba-Républicains ni bo bakunze gushyigikira iki cyifuzo cyo gutunga imbunda kurusha abandi, bakabishingira ku kuba biri mu muco w’Abanyamerika aho abaturage batangiye gutunga imbunda kuva mu myaka yo gushaka ubwigenge bw’icyo gihugu.

Bavuga ko gutunga imbunda ari kimwe n’ubundi burenganzira bwose bwifuzwa n’abaturage, bityo ko bikwiriye kubahirizwa hatitawe ku ngaruka mbi bishobora kugira ku bandi bantu.

Mu Ihuriro ry’Abaharanira gutunga imbunda riherutse guteranira muri Leta ya Texas, Donald Trump wahoze ari Perezida wa Amerika, yavuze ko kuba ibyaha byo kurasanira mu ruhame bikomeje kwiyongera, ari ikimenyetso cy’uko abantu benshi bakwiriye gutunga intwaro kugira ngo birinde, aho kuzamburwa.

Uretse ikibazo cy’intwaro mu baturage, kwisubiranamo hagati yabo nabyo bikomeje gufata indi ntera. Usanga uruhande rumwe, cyane cyane nk’urw’abazungu biyita abenegihugu b’ukuri, rukunze kumva ko ari rwo rwagena ibikorwa na Leta.

Abirabura ku rundi ruhande, usanga bimwa uburenganzira butandukanye, bagakunda kurenganywa n’inzego z’umutekano n’ubutabera kandi ugasanga bari mu bukene bukabije ugereranyije na bagenzi babo b’abazungu.

Ibibazo byo kubona ubuvuzi buhendutse, iby’ubukene, ibyo kubona inzu zo kubamo n’ibindi byinshi, biba bishobora gukemuka mu buryo bworoshye mu gihugu gifite ubukungu nk’ubwa Amerika, ariko ugasanga bidakunda kubera kutumvikana imbere mu Banyamerika.

Ibi byose, kongeraho iterambere ry’ibindi bihugu birimo nk’u Bushinwa, bituma ibihugu byinshi, byiganjemo ibyakandamijwe na Amerika mu gihe kirekire, birushaho gutera umugongo icyo gihugu, nubwo gifite imbaraga zidasanzwe, kuko ubukungu bwacyo bugize hafi 25% by’ubukungu bw’Isi muri rusange.

Demokarasi ishobora kuzaba umutwaro kuri Amerika mu gihe ubuyobozi bw'iki gihugu butafata ingamba zikakaye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .