00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda rwungutse hoteli ebyiri z’inyenyeri enye, icumi zo hanze ya Kigali zihabwa inyenyeri

Yanditswe na Ndahayo Emmanuel
Kuya 21 May 2022 saa 09:50
Yasuwe :

U Rwanda rwungutse hoteli 32 zahawe inyenyeri, zirimo icumi ziri hanze ya Kigali mu rwego rwo kurushaho kunoza serivisi no guteza imbere ubukerarugendo. Muri izo zahawe inyenyeri harimo ebyiri zahawe inyenyeri enye harimo Virunga Inn Resort and Spa iri i Musanze na M-Hotel iherutse kuzura i Kigali.

Ni umuhango wo gutanga uzwi nka ’Star Awarding Ceremony 2022 wabaye ku nshuro ya gatanu kuri uyu wa Gatanu tariki 20 Gicurasi 2022.

Ibi birori byabaye mu gihe habura ukwezi kumwe ngo u Rwanda rwakire inama mpuzamahanga ihuza ibihugu bihuriye mu muryango ukoresha Icyongereza (CHOGM), izaba muri Kamena. Ni inama ikomeye izitabirwa n’abasaga ibihumbi bitanu.

Hoteli zashyizwe mu byiciro bine, kuva ku zahawe inyenyeri imwe kugera ku zahawe inyenyeri enye, bitewe n’urwego rwa buri yose. Nta hoteli yahawe inyenyeri eshanu muri uyu mwaka.

Muri rusange, hoteli 10 muri 32 zahawe inyenyeri ziri hanze ya Kigali, mu gihe izindi zose ziri mu Mujyi wa Kigali. Nta hoteli yo mu Ntara y’Amajyepfo yahawe inyenyeri muri uyu mwaka, mu gihe Nyungwe Top View Hill Hotel yo mu Karere ka Nyamasheke yahawe inyenyeri eshatu.

Icyiciro cyahawe inyenyeri imwe kirimo DV Apartments iri i Kigali, Havana Guest House iri i Rubavu, Igitego Hotel iri i Kigali , Nyungwe Hotel iri i Kigali, Plata Guest House iri i Kigali na Silver Motel iri i Kigali.

Icyiciro cyahawe inyenyeri ebyiri harimo Emma-O Apartment iri i Kigali, Avisha Town Hotel iri i Kigali, Eastern Country Hotel iri i Kayonza, Elegance Hotel iri i Kigali, Great Hotel Kiyovu iri i Kigali, Kaizen Hotel iri i Kigali, New Sainte Anne iri i Musanze, Solace Guest House iri i Kigali na Peace Guest House iri i Rusizi.

Icyiciro cyahawe inyenyeri eshatu harimo Madras Apartments iri i Kigali, Rose Garden iri i Kigali , Nyungwe Top View Hill Hotel Lodge iri i Nyamasheke, Vintage Cottage Lodge iri i Rwamagana , Grazia Apartments iri Kigali , Ruzizi Tented Lodge iri i Kayonza, Chez Lando Hotel iri i Kigali, Cozy Safari Hotel iri i Kigali, Hotel Isimbi iri i Kigali, King Fisher Hotel iri i Kigali, Lebanon Hotel iri i Kigali, Select Boutique Hotel iri i Kigali, Urban Park Suites iri i Kigali , Galaxy Kivu Hotel iri i Rubavu na Rushel Resort iri i Rutsiro.

Icyiciro cyahawe inyenyeri enye harimo Virunga Inn Resort and Spa iri i Musanze na M-Hotel iri Kigali.

Umuyobozi w’Urwego rw’Igihugu rushinzwe Iterambere (RDB), Clare Akamanzi yashimiye hoteli zahawe inyenyeri, azisaba kurushaho gutanga serivisi nziza kugira ngo u Rwanda ruhore ku isonga.

Akamanzi yagaragaje ko hari ikibazo cy’aho gutanga serivisi nziza bikiri ingorabahizi muri hoteli zo mu Rwanda, aho usanga abakiliya bakunze gutanga ibibazo birimo internet idafatika, ububiko budahagije bw’ibikenerwa n’abakiliya (stock), imyitwarire y’abayobozi n’abakozi ba hoteli n’ibindi bitandukanye birimo n’ikibazo cy’ibiryo bike, bitatse nk’uturabyo kandi bihenze,’ cyigeze kugaragazwa mu minsi yashize.

Hafashwe ingamba zikakaye

Clare Akamanzi yagarutse ku kamaro k’ubukerarugendo ku bukungu bw’u Rwanda, avuga ko “Bugira ingaruka kuri buri rwego rw’iterambere, kuva ku buhinzi, ikoranabuhanga, ubucuruzi n’ibindi.”

Ni muri urwo rwego Leta y’u Rwanda ishora akayabo mu kwamamaza ubukerarugendo, kugira ngo ikomeze ikurure abakerarugendo bityo ubukungu bw’u Rwanda bubyungukiremo.

Icyakora ibi byose bishobora guhinduka umuyonga mu gihe amahoteli yo mu Rwanda atakwikubita agashyi ngo ahindure umuvuno, yige kujya atanga serivisi nziza igihe cyose kandi kuri buri wese, kabone n’uwaba agiye kunyweramo amazi gusa.

Nk’urwego rureberera amahoteli, RDB iri kwiga ku ngamba zizatuma itangwa rya serivisi rirushaho kugenda neza mu Rwanda, bityo ntiribe agatotsi mu mbaraga zishyirwa mu guteza imbere ubukerarugendo.

Zimwe muri izo ngamba harimo ko hoteli zose zigiye kujya ziyoborwa n’abantu babyigiye, babikora kinyamwuga kandi babifitiye impamyabushobizi.

Ubusanzwe hari ubwo hoteli yabaga iyobowe n’umuryango utabifite ubumenyi, umukiliya yabona serivisi nziza ugasanga uwo aregeye ni umubyeyi w’umwana wamuhaye serivisi mbi, bityo ntibitange umusaruro.

Ati “Tugiye kandi gusaba hoteli zose gukoresha abantu bafite impamyabushobozi zikwiriye. Nta muntu uzayobora hoteli atabifitiye ubushobozi."

Ikindi ni uko hoteli zigiye gutegekwa gushyiraho uburyo bwemerera abakiliya bazo kuzibwira uko bahawe serivisi (feedback), kugira ngo niba hari ibikenewe gushyirwamo imbaraga bikosorwe mu gihe cya vuba.

Indi mpinduka igiye kuba muri uru rwego ni uko hazashyirwaho uburyo hoteli zimanurirwa urwego, ku buryo nka hoteli yari ifite inyenyeri eshanu ishobora gusubizwa ku nyenyeri eshatu, byose bigaterwa na serivisi izajya itanga ku bakiliya bayo.

Uyu muyobozi yongeyeho ko uburyo bwiza bwo kwamamaza igihugu atari ugukoresha amakipe nka Arsenal na Paris Saint Germain gusa, ahubwo ko ari “Ugutanga serivisi nziza. Dukwiriye kumenya ko umuntu wese uje muri hoteli [akwiriye] kuhagirira ibihe byiza.”

Yanagarutse ku kamaro ko gutanga inyenyeri kuri hoteli, ati “Bituma abakiliya bamenya icyo bitega kuri hoteli, bigatuma hoteli zahawe inyenyeri zigira inshingano yo gukora ibijyanye n’urwego rwazo.”

Umuyobozi w’Agateganyo w’Ishami ry’Ubukerarugendo muri RDB, Ariella Kageruka, yavuze ko batazihangira serivisi mbi, ati ““Gukomeza gukora amakosa ni ibintu tutakwihanganira kuko bigira ingaruka ku byo dukora no ku isura y’igihugu muri rusange. Tugomba gukoresha uyu mwanya tureba icyo ibisubizo twakiriye twabyigiraho.”

Hagaragajwe ko rusange urwego rw’ubukerarugendo mu Rwanda rurimo kwigobotora ingaruka za Covid-19, kuko abakiliya n’amafaranga yakirwaga y’uru rwego yamaze kuzamuka, abanyamahoteli basabwa gukomeza gukorana imbaraga.

M-Hotel ni imwe muri hoteli zimaze iminsi zuzuye mu mujyi wa Kigali
Virunga Inn Resort iherereye mu Kinigi yahawe inyenyeri enye
Umuyobozi Mukuru wa RDB, Clare Akamanzi, yagaragaje ingamba zafashwe mu guhangana n'ikibazo cya serivisi mbi muri hoteli zo mu Rwanda
Hoteli zitwara neza zashimiwe
Abayobozi ha hoteli zitandukanye bahawe ibyemezo by'inyenyeri za hoteli zabo
Umuyobozi w'Umujyi wa Kigali, Rubingisa Pudence, ni umwe mu bari bitabiriye iki gikorwa aho yanatanze ibihembo
Hoteli zahawe ibyiciro zasabwe gukomeza gukora cyane kugira ngo zirusheho guhabwa ibyiciro byisumbuyeho
Byari ibyishimo kuri hoteli zahawe ibyiciro kuri uyu munsi
Abakuriye hoteli zitandukanye babwiwe ko izajya yitwara nabi izajya imanurirwa urwego
Ikibazo cya serivisi mbi muri hoteli cyagarutsweho
Abakuriye hoteli zitandukanye bagize umwanya wo kuganira
Hoteli 32 zahawe inyenyeri kuva kuri imwe kugera kuri enye
Abayobozi ba hoteli zitandukanye bari bitabiriye iki gikorwa
Hoteli zigiye kujya ziyoborwa n'abantu babyigiye
Hoteli 32 zari zitabiriye iki gikorwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .