U Rwanda rwihanganishije u Bushinwa ku cyorezo cya Coronavirus

Yanditswe na Habimana James
Kuya 7 Gashyantare 2020 saa 04:37
Yasuwe :
0 0

Perezida Paul Kagame yoherereje mugenzi w’u Bushinwa, Xi Jinping, ubutumwa bumwihanganisha ku cyorezo cya Coronavirus gikomeje guhitana abatuye iki gihugu, anamwizeza ubufasha bwose bushoboka ngo gihashywe.

Kuva mu Ukuboza 2019, u Bushinwa bwibasiwe n’icyorezo cya Coronavirus, kugeza ubu kimaze kwica Abashinwa 637, abandi 31,240 baranduye.

Ni icyorezo muri rusange gihangayikishije Isi, kuko n’Ishami ry’Umuryango w’Abibumbye ryita ku buzima, OMS, ryamaze kwemeza ko iki ari icyorezo kireba buri wese mu guhangana nacyo.

Ambasaderi w’u Bushinwa mu Rwanda, Rao Hongwei, yavuze ko nubwo iki cyorezo gikomeje guhitana abatari bake, muri iyi minsi ibiri harimo kugaragara impinduka zerekana ko kirimo kugabanuka.

Yabigarutseho kuri uyu wa Gatanu, ubwo iki gihugu cyahaga u Rwanda inguzanyo ya miliyari 203 Frw yo kubaka urugomero rw’amashanyarazi rwa Nyabarongo II.

Uyu muyobozi akaba yaboneyeho gushimira u Rwanda uko rukomeje kuba inshuti nziza muri iki kibazo cyugarije u Bushinwa.

Yavuze ko kuri uyu wa Gatatu, Perezida Paul Kagame, yoherereje mugenzi we w’u Bushinwa, Xi Jinping, ubutumwa bwifatanya na we.

Yagize ati “Kuri uyu wa Gatatu, Perezida Paul Kagame, yoherereje ubutumwa bwo kwihanganisha mugenzi we w’u Bushinwa, Xi Jinping, akaba kandi yemera ko leta y’u Bushinwa izatsinda iyi ndwara. Hejuru y’ibyo Perezida Kagame yijeje ubufasha bushoboka bwose kuri leta y’u Bushinwa, ibi turabishima cyane.”

Yakomeje agira ati “Nk’uko babivuga, burya inshuti nziza uyibonera mu byago, Abanyarwanda ni basaza bacu bakaba na bashiki bacu, turi inshuti nziza.”

Ambasaderi Hongwei kandi yavuze ko tariki 31 Mutarama 2020, Minisiteri y’Ububanyi n’Amahanga y’u Rwanda, nayo yasohoye itangazo rigaragaza ko u Rwanda rwifatanyije na leta y’u Bushinwa muri iki kibazo.

Ambasaderi, Rao Hongwei, yavuze ko imibare ihari ari uko abantu 31,240 aribo banduye coronavirus mu Bushinwa, 26,359 bakaba bakekwaho kugira ubu bwandu, 1, 576 baravuwe barakira, naho 637 nibo bamaze gupfa.

Kugeza ubu kandi hanze y’u Bushinwa, imibare igaragaza ko abantu 268 bamaze kumenyekana ko bafite ubu bwandu, umwe ni we umaze gupfa.

Ambasaderi Hongwei yavuze ko kugeza uyu munsi hari icyizere ko iki cyorezo kizatsindwa.

Yagize ati “Hari ibimenyetso byiza cyane cyane mu minsi ibiri ishize, ubwiyongere bw’abarwayi burimo kugabanuka. Nk’uko mubizi iki cyorezo cyagaragaye mu Ukuboza 2019 mu Mujyi wa Wuhan mu Ntara ya Hubei, kuva icyo gihe leta y’u Bushinwa yashyize ingufu mu guhangana nacyo.”

Yavuze ko mu minsi 10 gusa bubatse ibitaro bibiri, bakaba bafite icyizere ko bagomba gutsinda uru rugamba kandi vuba cyane.

Ibimenyetso by’indwara ya Coronavirus birimo kugira umuriro, gukorora no guhumeka nabi.

Umuntu yanduzwa Coronavirus n’uwayanduye. Yandurira mu mwuka wahumetswe n’uwakoroye ayanduye. Yandura iyo umuntu akoze ku wayanduye cyangwa amusuhuje; iyo umuntu akoze ku kintu cyangwa ahantu hari iyo virusi noneho agakora ku munwa, ku izuru cyangwa ku maso mbere yo gukaraba intoki ndetse rimwe na rimwe ishobora kwandurira mu mwanda wo mu musarani.

Perezida Kagame yihanganishije u Bushinwa kubw'icyorezo cya Coronavirus gikomeje guhitana abaturage

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .