U Bushinwa bwagaragaje kutambara udupfukamunwa nk’amakosa ibihugu biri gukora mu kwirinda COVID-19

Yanditswe na IGIHE
Kuya 1 Mata 2020 saa 10:51
Yasuwe :
0 0

Umuyobozi w’Ikigo gishinzwe kurwanya indwara z’ibyorezo mu Bushinwa, George Gao, yagaragaje ko hari amakosa akomeye ibihugu bihanganye na Coronavirus biri gukora, arimo kudashishikariza abaturage kwambara udupfukamunwa, mask.

Gao yabitangaje mu kiganiro yagiranye n’ikinyamakuru cyandika ku buzima, Science Magazine.

Uyu muyobozi yavuze ko kimwe mu byabafashije kugabanya umubare w’abandura Coronavirus mu Bushinwa, ari ingamba zirimo gupima abaturage, gufunga ibikorwa bihuriza hamwe abantu benshi, gushyira mu kato abanduye, kwirinda kw’abaturage bambara udupfukamurwa n’ibindi.

Yavuze ko abandura muri iyi minsi mu gihugu cye batakiri benshi, nubwo yemeza ko abashakashatsi bagikora amanywa n’ijoro bashaka umuti cyangwa urukingo rwa Coronavirus.

Abajijwe amakosa ibindi bihugu biri gukora mu guhangana n’icyo cyorezo, Gao yavuze ko kudashishikariza abaturage kwambara udupfukamurwa ari amakosa.

Yagize ati “Ikosa rikomeye muri Leta Zunze Ubumwe za Amerika n’i Burayi, uko mbibona ni uko abaturage batambara udupfukamunwa. Iyi virusi yandurira mu guhererekanya amatembabuzi no guhuza imibiri. Amatembabuzi ariko agira uruhare rukomeye.”

“Uba ugomba kwambara agapfukamunwa kuko nk’igihe uri kuvuga, hari amatembabuzi ava mu kanwa kawe. Hari abagiye bandura mu buryo butandukanye. Baramutse bambaye udupfukamunwa rero, byarinda ko virusi iva kuri bamwe ngo ijye ku bandi.”

Mu minsi ishize, havuzwe ibitandukanye, abantu bagaragaza ko Coronavirus yaba yaravuye mu isoko ryo muri Wuhan ricuruza inyama z’inyamaswa zo mu gasozi, bityo abariye kuri izo nyama bakaba barakwirakwije virusi.

Gao yavuze ko nta gihamya ihari kuko ubushakashatsi bukomeje ngo bamenye aho virusi yaturutse.

Hari umuti witwa “Remdesivir” uri gukorwaho ubushakashatsi, bivugwa ko utanga icyizere cyo kuvura Coronavirus.

Gao yavuze ko byitezwe ko nibura muri uku kwezi kwa Kane aribwo igeragezwa ryawo mu Bushinwa rizaba rirangiye.

Yabajijwe kandi ku mvugo Perezida wa Leta Zunze Ubumwe za Amerika, Donald Trump akunze gukoresha, avuga ko Coronavirus ari virusi y’Abashinwa.

Gao yanenze iyo mvugo ati “Ntabwo ari byo kuyita virusi yo mu Bushinwa. Iyi virusi ni iy’isi yose. Ni umwanzi utwugarije twese, si umwanzi w’umuntu runaka cyangwa igihugu runaka gusa.”

Abanduye Coronavirus mu Bushinwa basaga ibihumbi 81, abo yahitanye ni 3300 naho abakize basaga ibihumbi 76.

George Gao yavuze ko kudashishikariza abaturage kwambara udupfukamunwa ari amwe mu makosa ibihugu biri gukora

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .