Aba banyeshuri basuye Urwibutso rwa Kigali mu mwaka ushize, babifashijwemo n’umuhanzi Benjamin Kayiranga uzwi nka Ben Kayiranga, ukora muri iki kigo bigamo, ugaragaza ko abakiri bato ku Isi hose bagomba kumenya aya mateka ubundi bagaharanira ko bitazasubira ukundi.

Iri shuri risanzwe rifitanye umubano n’iryo mu Rwanda rya Nyamata Blue Lakes International aho amashuri yombi afatanya mu mishinga itandukanye irimo kurengera urusobe rw’ibinyabuzima ndetse no guteza imbere umuco.

Nyuma yo kuza mu Rwanda, abanyeshuri biga muri Lycée Blaise Pascal d’Orsay bahise bashyira amateka mu busitani bw’iri shuri mu Mujyi wa Orsay. Ben Kayiranga yavuze ko nyuma yo kwiga amateka ya Jenoside ubwo baheruka i Kigali, bahisemo gushyira ibimenyetso bitandukanye birimo amateka ya Jenoside kuri iryo shuri.

Ati “Ubwo baheruka mu Rwanda bize amateka akomeye yatumye biyemeza kwigisha ibisekuru bizabakurikira amateka ya Jenoside yakorewe Abatutsi. By’umwihariko bahise bashyira mu busitani mu kigo cy’ishuri ryabo ibintu bitandukanye bivuga ku mateka ya Jenoside. Ni ibintu bavuga ko bizabafasha bo ubwabo mu guhangana n’ingebitekerezo y’ivangura ndetse n’ikintu cyatanya abantu.”

Uretse ibyo kandi, bashaka ko na barumuna babo bazabakurikira n’abasura iki kigo, bose bazagenda bamenya amateka, bakayiga ndetse bakamenya ububi bwa Jenoside.

Aba banyeshuri bo muri Lycée Blaise Pascal d’Orsay mu Bufaransa, kuri ubu banasuwe na bagenzi babo ba Nyamata Blue Lakes International mu rwego rwo gukomeza gushimangira ubufatanye mu buryo butandukanye.

Mu mujyi wa Orsay mu Bufaransa hubatswe ubusitani burimo inyandiko zitandukanye zivuga ku mateka ya Jenoside yakorewe Abatutsi mu 1994

Ni ubusitani bugamije gutanga ubutumwa ku kwamagana Jenoside no kumenyekanisha ibyabaye mu Rwanda mu 1994

Ubwo ubu busitani bwatahwaga ku mugaragaro

Ubu busitani burimo ubutumwa butandukanye bugaruka kuri Jenoside yakorewe Abatutsi

Umuhanzi Ben Kayiranga yagize uruhare rukomeye mu kubaka ubu busitani

Abantu batandukanye bari bitabiriye iki gikorwa

Nyuma yo gusura ubu busitani hatanzwe ibiganiro

Abanyeshuri bo muri Nyamata Blue Lakes International basuye bagenzi babo muri Lycée Blaise Pascal d’Orsay aho bubatse ubusitani bugaruka ku mateka ya Jenoside

Ubwo abanyeshuri bo muri Nyamata Blue Lakes International na bagenzi babo bo muri Lycée Blaise Pascal d’Orsay bafataga ifoto