00:00:00 IGIHE NETWORK KN KINYARWANDA EN ENGLISH FR FRANCAIS

U Bufaransa: Hatashywe agace kitiriwe Aminadabu Birara mu Mujyi wa Paris (Amafoto)

Yanditswe na Karirima A. Ngarambe
Kuya 14 May 2022 saa 10:57
Yasuwe :

Umuryango Ibuka-France ku bufatanye n’ubuyobozi bw’Umujyi wa Paris, Abanyarwanda batuye muri icyo gihugu n’inshuti zabo, batashye agace kitiriwe Aminadabu Birara wari umwe mu bayoboye ibikorwa byo kwihagararaho byabereye mu Bisesero, ubwo Abatutsi bageragezaga gukiza amagara yabo muri Jenoside yakorewe Abatutsi.

Uretse Abanyarwanda batuye mu Bufaransa n’inshuti zabo, uyu munsi wanitabiriwe n’Abanyarwanda baturutse mu bihugu nk’u Busuwisi, u Budage, u Bubiligi n’ibindi bitandukanye.

Muri uyu muhango, hagarutswe ku butwari bwaranze Aminadabu Birara n’Abatutsi bo mu Bisesero muri rusange, hagaragazwa uburyo birwanyeho mu gihe kirekire cyane mu bihe bya Jenoside yakorewe Abatutsi mu 1994.

Ornella Kaze uhagarariye Ambasade y’u Rwanda i Paris, yavuze ko Umunsi watashyweho aka gace wahuriranye n’itariki ya 13 Gicurasi 2021, ubwo mu Bisesero hagabwaga ibitero bikomeye bigahitana Abatutsi basaga ibihumbi 40. Yashimangiye ko byerekana uburyo Umujyi wa Paris wahaye agaciro uyu munsi.

Yagize ati “Kuba Umujyi wa Paris warahisemo iyi tariki ni agaciro gakomeye. Byari uruhurirane rwo kwibuka no gusingiza no kurata ubutwari bw’Abasesero n’ubutwari bwa Aminadabu Birara.”

Yongeyeho ko iki kimenyetso cyashyizweho kizagira uruhare mu kwigisha amateka ya Jenoside yakorewe Abatutsi mu 1994.

Ati “Ishyirwaho ry’iki kimenyetso aha hantu ni ibintu byiza kuko iyo abantu bahanyura, nk’uko mwabibonye muri uyu muhango, abantu batambukaga bakareba icyabaye, bakareba amateka. Ni ibintu bitera amatsiko ku muntu ubibonye, iyo abonye handitseho amazina yibaza icyabaye. Nk’uko mubizi imihanda yose iba igiye yitwa amazina, kumva ko hari umuhanda witirirwa umuntu wazize Jenoside ni ikimenyetso gikomeye ku mateka yacu nk’Abanyarwanda.”

Uyu muyobozi yavuze ko yashimiye Umujyi wa Paris ku buryo witwaye muri ibi bihe, ati "Umunsi wo gutaha Umwanya witiriwe Aminadabu Birara ni ikimenyetso gikomeye cyane [kandi] cy’agaciro Umujyi wa Paris na Leta y’u Bufaransa bigenera igikorwa cyo kwibuka [mu rwego] rwo gukomeza kwibuka no guharanira ko amateka adasibangana."

Yaboneyeho kwibutsa ko bazakomeza gukorana n’Umujyi wa Paris kugira ngo ibimenyetso biranga amateka ya Jenoside yakorewe Abatutsi birusheho kongerwa muri uwo Mujyi.

Ati "Twashimiye Leta y’u Burafaransa cyane ku bw’iki gikorwa cyagizwemo uruhare n’Umujyi wa Paris na Ibuka-France. Ni site ya 11 itashywe, turanifuza ko n’izindi site zo kwibuka zizagenda zishyirwaho kuko ni ibintu bifasha gusigasira amateka no guharanira ko abakiri bato bayiga bakayamenya, ndetse no guharanira ko [aya mateka] atazasibangana uko ibihe biha ibindi."

Ku ruhande rw’Umuyobozi wa Ibuka-France, Étienne Nsanzimana, yavuze ko yishimiye uburyo uyu munsi wagenze muri rusange.

Yagize ati "Uyu munsi twari tuwiteguye kandi twizeye ko uzaba nk’uko byagenze…Twagize n’amahirwe y’uko iki gikorwa cyitabiriwe n’umuhungu wa Birara Aminadabu, witwa Marcel Harerimana, akazana n’umuntu wafatanyije na se urugendo rwo kwihagararaho witwa Eric Nzabonimana.”

Yongeyeho ko ari ikimenyetso gikomeye ku mateka ya Jenoside yakorewe Abatutsi. Ati "Ni ikintu cyari gishimishije kugira ngo umunsi nk’uyu Paris ibe yahindutse nka Bisesero. Itariki ya 13 Gicurasi [1994] ifite igisobanuro gikomeye kubera ko habaye ubwicanyi ndengakamere kuri uwo munsi, none nyuma y’imyaka 28, tugize ahantu muri Paris hitiriwe intwaro Aminadabu Birara.”

Yashimiye Abanyarwanda batuye mu mahanga, baturutse mu bihugu nk’u Bubiligi, u Busuwisi, u Budage n’ahandi. Yanashimiye ubuyobozi bw’Umujyi wa Paris kuko bwashyize imbaraga muri iki gikorwa.

Yavuze ko bazakomeza gukorana n’ubu buyobozi bw’Umujyi kugira ngo burusheho gusigasira amateka ya Jenoside yakorewe Abatutsi, ashimangira ko kuyasigasira ari "Ingenzi kandi uko bagenda bayandika mu mihanda yabo, bigenda biduha ingufu mu kurwanya abashobora gupfobya Jenoside yakorewe Abatutsi.”

Yongeyeho ko bifasha mu kwigisha urubyiruko, ati “Binafasha mu kwigisha Abafaransa n’urubyiruko rwabo rutabizi…bakibaza bati ‘Aminadabu Birara ni muntu ki?’ bigatuma bajya gucukumbura mu bindi bitabo bakamenya amateka ya Jenoside yakorewe Abatutsi mu Rwanda. Ni ibintu by’ingenzi cyane.”

Eric Nzabonimana wari kumwe na Birara Aminadabu yavuze ko itariki ya 13 Gicurasi ari umunsi ufite amateka akomeye mu buzima bwe kuko ari bwo batewe.

Ati "Yatubereye umuyobozi mwiza, atubera komanda n’inkingi ikomeye muri icyo gihe. Kuba yashyiriweho urwibutso mu Mujyi wa Paris ni ibintu bikomeye mu kwigisha amateka yo mu Bisesero ndetse n’aya Jenoside yakorewe Abatutsi muri rusange."

Ikiganiro na Marcel Harerimana, umuhungu wa Aminadabu Birara nyuma yo kumurika ku mugaragaro agace kitiriwe se

Ubutumwa bwa Etienne Nsanzimana uyobora Ibuka France

Umuyobozi wa Ibuka-France, Étienne Nsanzimana, yashimye abitabiriye iki gikorwa barimo Abanyarwanda n'ubuyobozi bw'Umujyi wa Paris
Umuyobozi wa 18ème Arrondissement de Paris, Eric Lejoindre, ageza ubutumwa ku bitabiriye iki gikorwa
Emery Gahuranyi avuga umuvugo wa Beata Umubyeyi Mairesse usanzwe ari Umwanditsi w’Ibitabo
Eric Nzabonimana wari kumwe na Birara Aminadabu yatanze amateka y'ibyabereye mu Bisesero
Eric Nzabonimana wari kumwe na Birara Aminadabu yavuze ko itariki ya 13 Gicurasi ari umunsi ufite amateka akomeye mu buzima bwe kuko ari bwo batewe
Ornella Kaze uhagarariye Ambasade y’u Rwanda i Paris, yavuze ko Umunsi watashyweho aka gace wahuriranye n’itariki ya 13 Gicurasi 2021, ubwo mu Bisesero hagabwaga ibitero bikomeye bigahitana Abatutsi basaga ibihumbi 40
Guillaume Ancel wari umusirikare mukuru mu bageze mu Bisesero mu bitabiriye iki gikorwa

  Amafoto yaranze ibiganiro byibanze ku buzima bwa Birara Aminadabu

François Robinet, Umunyamateka akaba n’Umwarimu muri Kaminuza ya Versailles Saint-Quentin-en-Yvelines
Marcel Harerimana, Umwana wa Aminadabu Birara yatanze ubuhamya muri iki gikorwa
Marcel Harerimana, umuhungu wa Birara Aminadabu yari yitabiriye iki gikorwa
Visi Meya w'Umujyi wa Paris, Emmanuel Grégoire, ni we wari umuyobozi mukuru muri iki gikorwa
François Robinet, Marcel Harerimana, Eric Nzabihimana, Marcel Kabanda, Eric Lejoindre, Laurent Larcher na Esperance Patureau ubwo bari mu biganiro mbwirwaruhame ku mateka ya Birara Aminadabu na Bisesero muri Jenoside yakorewe Abatutsi
Ibuka-France ifatanyije n’ubuyobozi bw’Umujyi wa Paris, Abanyarwanda batuye muri icyo gihugu n’inshuti zabo, ku wa 13 Gicurasi 2022, batashye agace kitiriwe Aminadabu Birara uri mu bayoboye ibikorwa byo kwihagararaho byabereye mu Bisesero, ubwo Abatutsi bageragezaga gukiza amagara yabo muri Jenoside

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .