Twagize Imana tubona umuyobozi ufite ubushake - Nduhungirehe avuga kuri Tshisekedi

Yanditswe na Ferdinand Maniraguha
Kuya 26 Mutarama 2020 saa 06:17
Yasuwe :
0 0

Umunyamabanga wa Leta muri Minisiteri y’Ububanyi n’Amahanga ushinzwe umuryango wa Afurika y’Iburasirazuba, Amb. Olivier Nduhungirehe, yavuze ko u Rwanda rwagize Imana rubona Perezida wa Repubulika Iharanira Demokarasi ya Congo ufite ubushake bwo kugarura amahoro no guhashya imitwe y’inyeshyamba mu Burasirazuba bw’icyo gihugu.

Perezida Félix Tshisekedi uri kwizihiza umwaka amaze atorewe kuyobora Congo, amaze gukora impinduka zitandukanye zirimo kugaba ibitero ku nyeshyamba zari zimaze imyaka 20 ziyogoza uburasirazuba bw’igihugu.

Ni inkubiri yatangiye umwaka ushize igasiga benshi mu bayobozi bakuru b’imitwe yitwaje intwaro irimo iyarwanyaga u Rwanda bahasize ubuzima, abandi bagafatwa mpiri.

Amb. Nduhungirehe yavuze ko Tshisekedi ari umuyobozi utanga icyizere kandi ufite ubushake, ku buryo yizeye ko uyu mwaka uzashira imitwe y’inyeshyamba ishize mu Burasirazuba bwa Congo.

Icyakora, ibitero ingabo za Congo, FARDC zimaze iminsi zigaba ku mitwe y’inyeshyamba muri Kivu y’Amajyepfo n’Amajyaruguru, ntibyavuzweho rumwe. Hari ababizamukiyeho bavuga ko ari ingabo z’u Rwanda ziri gufasha iza Congo guhashya iyo mitwe, nubwo Guverinoma z’ibihugu byombi zitigeze zibyemeza.

Mu kiganiro Urubuga rw’Itangazamakuru cyatambutse kuri Televiziyo na Radiyo Isango Star kuri iki Cyumweru, Amb. Nduhungirehe yavuze ko ingabo za Congo zitigeze zibura imbaraga, ngo icyaburaga ni ubushake.

Yagize ati “Na Mbere ntabwo habayeho ikibazo cyo kuneshwa cya FARDC, nta bitero byakorewe FDLR ngo bakore imirwano batsindwe noneho ngo bavuge bati ‘ntabwo dufite ingabo zikomeye reka twifashisha abaturanyi’.”

Amb. Nduhungirehe yavuze ko icyagiye kibura ku bayobozi bagiye bayobora RDC ari ubushake.

Yatanze urugero rwo mu 2014 ubwo u Rwanda rwari mu kanama ka Loni gashinzwe umutekano, rwari rumaze igihe rusaba Congo na Loni guhashya imitwe y’inyeshyamba irimo FDLR, ariko ntibikorwe.

Ngo u Rwanda rwabwirwaga ko aho iyo mitwe iri batahazi, ruza gutungurwa n’uko muri uwo mwaka, Ingabo za Loni muri Congo zahamagaye zisaba u Rwanda kuvaniraho ibihano abarimo Byiringiro Victor uyobora FDLR ngo babone uko bajya gusaba imishyikirano i Roma mu Butaliyani.

Amb. Nduhungirehe yagize ati “Twabazaga Monusco bakatubwira ngo ntabwo dushobora kubarwanya kuko ntituzi aho bari. Tuza kumva umunsi umwe, bafashe Byiringiro Victor n’abandi bayobozi ba FDLR, babajyana Kinshasa bagomba kubajyana i Roma mu Butaliyani […] Ku munota wa nyuma badusaba ngo tubavanireho ibihano turabyanga. Tukababaza tuti abo bantu mwahoze mutubwira ko mutazi aho bari?”

Tshisekedi akijya ku butegetsi mu 2018, yijeje ko azakora igishoboka cyose amahoro mu Burasirazuba bwa Congo akagaruka.

Amb. Nduhungirehe yavuze ko amaze kubyerekana kuko afite ubushake, ku buryo bizeye ko uyu mwaka uzashira imitwe y’inyeshyamba yabaye amateka.

Agaruka ku bufasha u Rwanda ruvugwaho guha Congo, Amb. Nduhungirehe yavuze ko icya mbere ari ubushake ari nabwo Tshisekedi yagaragaje.

Ati “Ubufasha bifuza nibwo tubaha twebwe cyane cyane ibyerekeye amakuru. Ntabwo u Rwanda ruvuga ngo hariya hari umutwe witwaje intwaro reka tuhatere, ni igihugu cyigenga gifite ubuyobozi n’ingabo. Twagize Imana tubona umuyobozi ufite ubwo bushake, iyo batubajije ubufasha turabubaha.”

Yagarutse ku makuru avugwa ko u Rwanda rushaka kwigarurira ibice bimwe bya Congo, mu mugambi bamwe mu banye-Congo babatije ‘Balkanisation’.

Uwo mugambi umaze iminsi uvugwa n’abayobozi batavuga rumwe n’ubutegetsi n’abihayimana barimo Arikiyepiskopi wa Kinshasa, Cardinal Fridolin Ambongo na Adolphe Muzito wabaye Minisitiri w’Intebe wa RDC, ubu ni umuvugizi w’ihuriro Lamuka.

Amb. Nduhungirehe yongeye kubihakana, avuga ko ari ibinyoma, ko ibyo ari ibirego byakabaye bishinjwa imitwe yitwaje intwaro.

Ati “Ahubwo iyo mitwe navuga ko ariyo ishaka gutwara ibice bya Congo kuko niba bafite agace ka Congo, bagakora ubucuruzi bwabo […] naho Congo yo irayihashya ku buryo twizera ko uyu mwaka uzashira iyo mitwe yarangiye. Ibyo bindi ni ukurangaza abantu.”

Mu cyumweru gishize, Perezida Tshisekedi wari mu Bwongereza aho yari yitabiriye inama ku ishoramari hagati y’u Bwongereza na Afurika, yabwiye abanya-Congo baba i Londres ko mu gihe cyose ari Perezida wa Repubulika Iharanira Demokarasi ya Congo, nta na santimetero igihugu cye kizatakaza.

Ati “ Mu gihe cyose ndi Perezida wa RDC, nta na santimetero n’imwe igihugu cyacu kizamburwa. Izi ni inkuru z’ababuze ibyo bavuga. Ubwo twari mu badashyigikiye ubutegetsi, ntabwo twigeze tubeshya abaturage ku ngingo y’uko hari abashaka kwigabanya igihugu cyacu.”

Umubano w’u Rwanda na RDC umaze gutera imbere nyuma y’aho Tshisekedi agiriye ku butegetsi ndetse yagaragaje ko intego ze ari ukubana neza n’ibindi bihugu bituranye n’igihugu cye.

Ambasaderi Nduhungirehe yavuze ko u Rwanda rwagize Imana Congo ikabona umuyobozi ufite ubushake bwo guhashya imitwe yitwaje intwaro mu Burasirazuba bw'icyo gihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza