Ibiro by’Umunyamabanga Mukuru wa SADC byemeje ko iyi nama idasanzwe yari imaze igihe itegerejwe izaba tariki ya 13 Werurwe 2025, bisobanura ariko ko izakorwa hifashishijwe ikoranabuhanga ry’iyakure.

Izakurikira iyabaye tariki ya 6 Werurwe, yahuzaga abakuru b’ibihugu bitanu muri 16 bigize SADC. Icyo gihe bafashe imyanzuro izagezwa ku bakuru b’ibihugu byose by’uyu muryango.

SADC imaze iminsi ku gitutu nyuma y’aho abasirikare 18 bapfiriye mu mirwano bari bahanganyemo na M23 mu mpera za Mutarama 2025, yabanjirije ifatwa ry’umujyi wa Goma.

Nyuma yo gutsindwa, aba basirikare baturutse muri Afurika y’Epfo, Tanzania na Malawi bahungiye mu bigo by’ingabo z’Umuryango w’Abibumbye mu nkengero za Goma na Sake, aho bazengurutswe na M23.

Mu bihe bitandukanye, M23 yasabye SADC gucyura aba basirikare barenga 1000, isobanura ko badashobora kuzana amahoro n’umutekano mu burasirazuba bwa RDC, ahubwo ko benyegeza intambara.

Perezida Lazarus Chakwera wa Malawi muri Gashyantare 2025 yatangaje ko abasirikare babo bazava muri RDC, Cyril Ramaphosa wa Afurika y’Epfo na we aca amarenga ko n’ab’igihugu cyabo bazataha.

Mu nama yabaye tariki ya 6 Werurwe, abakuru b’ibihugu bitanu bagejejweho igitekerezo cyo kuba ingabo za SADC zisigaye muri RDC zataha, hagashyigikirwa ibiganiro hagati y’impande zishyamiranye.

Ntabwo icyo abakuru b’ibi bihugu bemeranyijeho icyo gihe cyamenyekanye. Ikizwi ni uko ari cyo kiri muri raporo bateganya kugeza bagenzi babo bazahurira mu nama idasanzwe tariki ya 13 Werurwe.

Inama yabaye ku wa 6 Werurwe yateguriwemo raporo izagezwa ku nama idasanzwe ya SADC yose

Inama idasanzwe y'abakuru b'ibihugu bya SADC izaba tariki ya 13 Werurwe