00:00:00 IGIHE NETWORK KN KINYARWANDA EN ENGLISH FR FRANCAIS

Rutsiro: Abacukuzi b’amabuye y’agaciro baratabaza

Yanditswe na Nsanzimana Erneste
Kuya 21 May 2022 saa 04:38
Yasuwe :

Abacukuzi b’amabuye y’agaciro bakorera mu Karere ka Rutsiro bavuga ko abakora uyu mwuga mu buryo butemewe n’amategeko n’abagura aya mabuye mu buryo bwa magendu babateza igihombo, bagasaba ubuyobozi bw’Akarere guhagurukira iki kibazo.

Rutsiro ni Akarere ko mu Ntara y’Iburengerazuba kabonekamo amabuye y’agaciro nka wolfram, coltan na gasegereti.

Aya mabuye acukurwa n’ibigo bifite ibyangombwa byemerewe gukora uwo mwuga, gusa bamwe muri bo bavuze ko bahura n’igihombo giterwa n’abitwikira ijoro bakajya gucukura, ariko hakaba n’ababikora ku manywa bitwaje intwaro gakondo.

Mu kiganiro na IGIHE, Manirarora Jean Claude ukora muri ‘Alli Group’ ikorera mu Murenge wa Mukura, yagize ati "Sosiyete iba yatanze umusoro, yashatse ibyangombwa byose, abo bantu bakaza gucukura rimwe na rimwe bitwaje intwaro gakondo. Iyo aje gucukura aho wagacukuye uwo musaruro arawujyana kandi ni wo wagakuyemo wa musoro.”

Yongeyeho ko aba bacukura mu buryo butemewe babikora mu buryo budakurikije amabwiriza yemeranyijweho, bigatuma bangiza ibidukikije kandi bikitirirwa ibigo byahawe ibyangombwa byo gucukura.

Hejuru y’ibi kandi, aba bacukuzi banakora ibikorwa by’urugomo bishobora kubyara ibibazo bikomeye, ati "Mu cyumweru gishize bafashe abaturindira umutekano batanu barabakubita barabanoza.”

Uretse aba bacukuzi bakora mu buryo butemewe, hari n’abagura aya mabuye mu buryo bwa magendu. Kubera aba bakiliya, bituma abaturage benshi bifuza kwinjira muri ubu bucukuzi butemewe.

Igihombo kirakabije

Umuyobozi Mukuru wa CPMC Ltd ikorera ubucukuzi bw’amabuye y’agaciro mu Murenge wa Rusebeya, Zitoni Innocent, yavuze ko ibi bikorwa bihombya ikigo ayoboye hafi 60% by’inyungu bakabonye buri mwaka.

Ati "Kubera ko ikigo cy’ubucukuzi kiba gifite n’ibindi kibazwa, hari ibiciro dushyiraho. ’Abaforoderi’ rero baraza bakabirenza kugira ngo bashuke abaturage babizere. Iyo ku kilo turi gutanga ibihumbi 15 Frw, bo baba bari gutanga ibihumbi 18 Frw cyangwa ibihumbi 20 Frw kuko nta kindi babazwa. Igihombo badutera ukibaze usanga kitajya munsi ya 60%.”

Uyu muyobozi kandi yavuze ko iki gihombo kigera no ku baturage muri rusange kuko inyungu bagakoresheje mu iterambere ryabo, ku bufatanye n’inzego za Leta, igabanuka.

Hari kandi kuba aba bacukuzi batemewe basiga bangije ibidukikije, ku buryo bigira ingaruka zikomeye ku mibereho y’abaturage muri rusange, bikaba bishobora no kubagiraho ingaruka mbi zirimo nko kubateza ibiza n’ibindi nk’ibyo.

Nisingizwe Valens, Umutekinisiye wa Koperative Abahizi ikorera ubucukuzi bw’amabuye y’agaciro mu Murenge wa Murunda, avuga ko amabuye y’agaciro arigiswa n’abaforoderi ashobora kuvamo inyungu nyinshi ku bukungu bw’igihugu binyuze mu kongera imisoro n’umusaruro muri rusange.

Ati "Iyo Leta ibonye umusoro mwinshi n’ibikorwaremezo igeza ku baturage biba byinshi, ikindi na kampani iyo yungutse, yubaka ibikorwa by’iterambere mu bice ikoreramo.”

Umuyobozi w’Akarere ka Rutsiro wungirije ushinzwe Ubukungu n’Iterambere, Havugimana Etienne, yabwiye IGIHE iki kibazo bakizi kandi bari kugishakira ibisubizo birambye.

Ati "Nibyo koko mu Karere kacu haracyagaragara abantu bishora mu bucukuzi butemewe n’amategeko. Twatangiye kwegeranya amakuru ariko twabonye ko impamvu iki kibazo kidakemuka ari uko usanga abaturage bajya muri ubwo bucukuzi butemewe baba bafite abandi bantu babagurira umusaruro.”

Uyu muyobozi yashimangiye ko ubucukuzi bw’amabuye y’agaciro butemewe bugira ingaruka nyinshi zirimo n’uko butwara ubuzima bw’abaturage, ati “Ni ibintu bigira ingaruka nyinshi. Abo babikora ntibatanga umusoro, hari ukuba bangiza ibidukikije, hari n’abantu bagenda bagwamo byose twifuza ko bihagarara, niyo mpamvu natwe dushyizemo imbaraga mu kubihagarika.”

Mu Karere ka Rutsiro hakorera ibigo by’ubucukuzi bw’amabuye y’agaciro bigera kuri 25. Ibicukura bikanohereza umusaruro ku isoko mpuzamahanga ni ibigo icyenda.

Abacukuzi b'amabuye y'agaciro i Rutsiro bavuze ko umwuga wabo ubangamiwe n'ababikora mu buryo butemewe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .