Igikorwa cyo kubashyikiriza ibyo bikoresho birimo iby’isuku, ibiribwa, ibiryamirwa n’amatungo cyabereye ku Biro by’Umurenge wa Nkanka ku wa 02 Gicurasi 2025.

Mukarugwiza Seraphine wo mu Kagari ka Kinyaga wiciwe abantu 24 muri Jenoside yavuze ko ubuzima bwari bumugoye kuko nta n’itungo yagiraga.

Ati “Iyi hene bampaye igiye kumfasha ibintu byinshi, izampa ifumbire, izororoka nkureho izo nikenuza.”

Umuyobozi Wungirije w’Akarere ka Rusizi, ushinzwe imibereho myiza y’Abaturage, Mukakalisa Francine, yashimye iki gikorwa cyakozwe n’abaguye n’abavuka mu Murenge wa Nkanka uri mu mirenge ikennye y’icyaro, asaba indi mirenge kubigiraho.

Ati “Kwibuka dukwiye kubijyanisha n’ibikorwa, tuba hafi abarokotse ubona bafite ubuzima bubagoye mu mibereho ya buri munsi. N’abandi dukwiye kubireberaho icyo Nkanka yakoze n’indi mirenge ikajya igikora.”

Ibikoresho byatanzwe ni matela, amabati, ihene, ibitenge n’amafaranga yo kubidodesha, amasabune, ubwisungane mu kwivuza n’ibiribwa birimo kawunga, ibishyimbo, umuceri n’amavuta yo guteka

Harimo n'abahawe ibiryamirwa n'ibyo kwiyorosa

Abahawe ihene bavuze ko zigiye kubafasha kwiteza imbere binyuze mu kubaha ifumbire bakongera umusaruro w'ubuhinzi