Ruhango: Bahawe Biogaz babura amase

Yanditswe na Mukahirwa Diane
Kuya 14 Mata 2021 saa 11:34
Yasuwe :
0 0

Abaturage batujwe mu Mudugudu w’icyitegererezo wa Muhororo ya kabiri uri mu Murenge wa Ruhango ho mu Karere ka Ruhango, bahawe Biogaz zo gucanaho ariko zibapfira ubusa bitewe no kudashyikirizwa inka bari bemerewe bakabura amase yo kuzatsa.

Imyaka ibiri irashize aba baturage batujwe muri uyu mudugudu mu kububakira bashyiriweho uburyo bwo gucana bakoreresheje Biogaz, mu kuborohereza kubona ibicanwa byoroheje banarengera ibidukikije.

Ubuyobozi bw’akarere bwari bwabemereye kubaha inka zizabafasha kubona amase yo gukoresha bacana, gusa kuva bahimukira kugeza ubu ntibarazibona.

Bamwe mu baturage baganiriye na Radio1 bayibwiye ko uburyo bwo gucana bwa Biogaz bashyiriweho babuheruka umunsi bataha inzu, ubu bakaba bateka bakoresheje ubuyo busanzwe.

Umwe muri bo yavuze ko Biogaz baziheruka bataha izi nzu bikaba bibangamiye kuko nta bushobozi bw’ibicanwa bisanzwe bafite ibyo babasha kubona bikaba byangiza izi nzu.

Ati “Biogaz ziheruka kwaka hano umunsi dutaha izi nzu bazanye amase bakuye ku karere, kuva icyo gihe kugeza ubu ntiturazicanaho kuko nta mase dufite.”

“Hari abafite ubushobozi bashaka uko bacana hakaba n’abatabufite bagacanamo inkwi ugasanga imyotsi yabaye myinshi, bigatuma inzu zangirika urumva ko bitubangamiye.”

Ku ruhande rw’umuyobozi w’akarere ka Ruhango, Habarurema Valens, yavuze ko inka zitahise ziboneka ariko ko mu kwezi gutaha zizaba zamaze kuboneka abaturage bagatangire gucana kuri Biogaz.

Ati “Ibintu byose ntibyabonekeye rimwe, habanje amazu n’ibindi bikoresho bitandukanye amafaranga yose yo kuzuza umudugudu ntiyabonekeye rimwe, ibijyanye na Biogaz rero ntiberenza uku kwa gatanu ibintu byose bitaraboneka.”

Biogaz ni umushinga washyizweho mu rwego rwo kugabanya ibicanwa byangiza ikirere ndetse no korohereza mu bushobozi abaturage, gusa henshi ubona ari umushinga utaragezweho ku kigero cyo hejuru.

Abaturage bavuga ko bahawe biogaz ariko amaso ahera mu kirere bategereje inka bemerewe zizajya zibaha amase

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .