00:00:00 IGIHE NETWORK KN KINYARWANDA EN ENGLISH FR FRANCAIS

Rubavu: Abagore bajya gucuruza muri Congo barataka ihohoterwa (Amafoto)

Yanditswe na Mukwaya Olivier
Kuya 1 June 2022 saa 08:28
Yasuwe :

Abagore bakora ubucuruzi buciriritse bakunze kwambuka imipaka bajya gucuruza muri Repubulika Iharanira Demokarasi ya Congo, barataka ihohoterwa ribakorerwa mu gihe berekeje mu mijyi yo muri icyo gihugu, bakavuga ko ryakajije umurego nyuma y’uko umutwe wa M23 wubuye ibitero.

Kuri uyu wa 1 Kanama, aba bagore bakoraniye kuri Stade Umuganda iri i Rubavu kugira ngo bageze ku buyobozi iki kibazo, aho bavuga ko hari ubwo bamburwa ibicuruzwa byabo, ubundi bakabwirwa amagambo mabi ndetse ngo bakaba basigaye bangirwa kwambuka, nubwo umupaka w’ibihugu byombi ufunguye.

Uwimana Jeanne utuye mu Murenge wa Gisenyi avuga ko kuva umutwe wa M23 wakubura imirwano, barimo guhohoterwa.

Ati “Muri iyi minsi iyo tubashije kwambuka dukorerwa ihohoterwa. Iyo tugezeyo baraducyurira bitwaje ko turi Abanyarwanda, baratwambura tukabura aho turega. Noneho bitwaje intambara ya M23 banze ko twambuka, ubu turi kubura ibyo tugaburira abana.”

Uwineza Claudine wo Murenge wa Nyamyumba ibintu byahindutse muri iyi minsi, ati “Congo banze ko twambuka, barimo kutwaka icyangombwa kitwemerera kwambuka. Mu Rwanda bafunguye ariko bo banze kandi nta bushobozi dufite, nkanjye igishoro cyanjye ni ibihumbi 5 Frw, sinzi uko nabona ibihumbi 40 Frw byo kugura icyangombwa.”

Yongeyeho ko “N’ubundi kujya i Goma ni ibibazo kuko bari kuza batwiyenzaho, batubaza ibyangombwa bitabaho, wanasiga umuzigo ugasanga bawutwaye, wabaza [bakagusubiza] ngo subira iwanyu mu Rwanda. Turasaba ubuyobozi ko bwaduha ubufasha kuko dufite ubukene.”

Umuyobozi w’Akarere ka Rubavu, Kambogo Ildephonse, asaba aba bagore kwigengesera mu gihe bambutse umupaka.

Ati “Iyo urebye ahantu hatandukanye muri Congo, ubona ko hari ibikorwa byo kwanga Abanyarwanda cyangwa ibintu byose bifite aho bihuriye n’Abanyarwanda. Turabasaba kwigengesera, niba agize ikibazo akatubwira kugira ngo tuvugane n’ubuyobozi bwaho kuko tuvugana buri munsi.”

Ubusanzwe, aba bagore bambukaga bakoresheje ibyangombwa bya koperative zashyizweho mu rwego rwo gukomeza ubuhahirane. Iki cyemezo cyafashwe ubwo imipaka yari ifunzwe kubera icyorezo cya Covid-19.

Minisitiri w’Ububanyi n’Amahanga, Dr. Vincent Biruta, mu kiganiro n’abanyamakuru cyo kuri uyu wa Kabiri, yasabye abaturage bajya muri Repubulika Iharanira Demokarasi ya Congo (RDC) kwitwararika, nyuma y’amagambo n’ibikorwa by’urwango bikomeje kuvugwa muri iki gihugu cyo mu Burengerazuba bw’u Rwanda.

Abagore bacuruza muri Congo bateraniye kuri Stade Umuganda kugira ngo bagaragaje agahinda kabo
Aba bacuruzi bavuze ko gucururiza muri Congo bisigaye bigoranye muri iyi minsi
Aba bagore bavuze ko bari gusabwa ibyangombwa badafitiye ubushobozi kandi bitandukanye n'ibyo bari basanzwe basabwa
Aba bagore bari benshi kuri Stae Umuganda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .