Rotary Club ni umuryango udaharanira inyungu ukora ibikorwa by’ubugiraneza birimo gufasha abatishoboye, gutanga amazi meza ku baturage, kurwanya indwara z’ibyorezo no gutanga umusanzu mu bikorwa byose bigamije guteza imbere sosiyete.

Urubyiruko ruwushamikiyeho rwiga muri kaminuza rwitwa Rotaract mu gihe abiga mu mashuri yisumbuye bawubarizwamo bo bitwa Interact.

Igikorwa cyo gutera ibiti muri ako Karere, cyabaye ku wa Gatandatu tariki ya 7 Ukuboza 2024, aho abagize Rotaract mu bice bitandukanye by’igihugu bishyize hamwe mu rwego rwo gushyira mu bikorwa zimwe mu ntego z’uwo muryango zirimo kubungabunga ibidukikije.

Binyuze mu gikorwa bise Ecoroto250 Forest Rehabilitation 2024, bateye ibiti 500 ariko bafite gahunda yo gusazura ishyamba ryose.

Umuyobozi uhagarariye icyo gikorwa cyo gutera ibiti usanzwe anabarizwa muri Rotaract Club KIE, Felix Mihigo, yerekanye ko iki gikorwa kibaye ku nshuro ya kabiri kuko babonye ko ari ngombwa guhuza imbaraga mu kubungabunga ibidukikije nk’urubyiruko.

Yavuze ko umwaka wabanje cyakorewe mu Karere ka Bugesera, aho bateye ibiti by’imbuto bakanatanga ibikoresho by’isuku ku bana b’abakobwa.

Ati “Twabonye ko ari igikorwa cyiza kandi ko dukenewe kugira ngo tubungabunge ibidukikije. Ni bwo twahereye aho tuvuga ngo reka dukore igikorwa nk’icyo kijye gihora kiba buri mwaka ariko twibanda ku kubungabunga ibidukikije.

Yongeyeho ati “Impamvu ni uko turi abanyamuryango ba Rotary kandi hari ingingo zirindwi tugenderaho harimo n’iyo kwita ku bidukikije ari nayo uyu mushinga wacu ushingiyeho. Twita ku mashyamba kubera ko dukeneye umwuka mwiza, dukeneye ikirere gisukuye, gufata ubutaka no kurwanya isuri n’ibindi.”

Uretse gutera ibiti muri ako Karere ka Rulindo, abanyamuryango ba Rotaract Clubs zo mu Rwanda bishyuriye mituweri abaturage 200.

Mihigo yavuze ko nk’urubyiruko basanga ari imbaraga z’igihugu n’umuryango nyarwanda bityo ko biyemeje gukora mu bushobozi bwabo bagamije gukemura bimwe mu bibazo biri muri sosiyete no gutanga umusanzu wabo uko bashoboye.

Yasabye urundi rubyiruko guharanira gutegura ahazaza heza no gushaka ibisubizo ku bibazo biri muri sosiyete, binyuze mu kugendera ku ntego, kurangwa n’ubunyangamugayo, kudacika intege no kwiyemeza gukora cyane.

Ishyamba rigiye gusazurwa na Rotaract Clubs zo mu Rwanda

Abanyamahanga baba mu Rwanda na bo bitabira ibikorwa bya Rotaract Club

Urubyiruko rwitabiriye umuganda wo gutera ibiti, rwawishimiye

Urubyiruko rwagaragaje ko gutera ibiti rugomba kubigiramo uruhare

Akanyamuneza kari kose ku bitabiriye uwo muganda

Urubyiruko rwishimiye gusazura ishyamba ryo mu Karere ka Rulindo

Rotaract Clubs zo mu Rwanda ziyemeje gusazura iryo shyamba

Hagaragajwe ko hakenewe ubufatanye mu kubungabunga ibidukikije

Uyu muganda wanitabiriwe n'abaturage bo mu Murenge wa Shyorongi

Rotaract Clubs zo mu Rwanda zifatanyije n'abaturage mu muganda wo gutera ibiti

Abaturage bo mu Karere ka Rulindo bishimiye gukorana n'urubyiruko

Aha yacukuraga umwobo wo guteramo igiti

Ibiti byatewe n'ibigamije gusazura ishyamba

Abagize Rotaract Clubs zo mu Rwanda biyemeje ko iryo shyamba bagomba kurisazura

Batanze na mituweri ku bantu 200

Amafoto: Ingabire Nicole