RDF yungutse abapilote babiri baminuje muri Qatar

Yanditswe na Akayezu Jean de Dieu
Kuya 28 Mutarama 2021 saa 01:24
Yasuwe :
0 0

Ingabo z’u Rwanda, RDF, zungutse abapilote babiri basoje amasomo yabo mu bijyanye no gutwara indege mu ishuri rya Al Zaeem Air College muri Qatar.

Abanyarwanda basoje ayo masomo ni Sous Lieutenant Eloge Nyiringabo na Sous Lieutenant Josia Rugema, bashyikirijwe impamyabumenyi zabo kuri uyu wa Gatatu tariki 27 Mutarama 2021.

Abarangije amasomo ni 85, barimo abapilote 71 n’abandi 14 bakora indi mirimo, bava muri Qatar, Kuwait n’u Rwanda.

Umuhango wo gutanga izi mpamyabumenyi wari ubaye ku nshuro ya munani, witabiriwe na Emir wa Quatar Sheikh Tamim bin Hamad al-Thani.

Muri uyu muhango u Rwanda rwari ruhagarariwe n’Umuyobozi w’Ishuri rya Gisikare rya Gako, Maj Gen Kabandana Innocent n’Umuyobozi ushinzwe ibikorwa mu Ngabo zirwanira mu kirere, Lt Col Dany Gatsinzi.

Mu bandi bitabiriye uyu muhango harimo Minisitiri w’Intebe wa Qatar, Sheikh Khalid bin Khalifa bin Abdulaziz al-Thani, Abayobozi muri Guverinoma y’iki gihugu ndetse n’Ubuyobozi bukuru bw’Ingabo za Qatar.

Mu ijambo yagejeje ku bitabiriye uyu muhango, Umuyobozi w’Agateganyo wa Al Zaeem Air College, Brigadier Pilot Abdullah Mubarak al-Mohannadi yavuze ko abahawe impamyabushobozi bamaze imyaka itatu bahabwa amasomo.

Yakomeje avuga ko abahawe impamyabushobozi basoje neza amasomo yabo abemerera guhabwa impamyabushobozi z’icyiciro cya Kaminuza mu bijyanye no gutwara indege.

Al-Mohannadi yashimiye abasoje amasomo ashimangira ko iri shuri ryabahaye ubushobozi bwose buzabafasha mu bihe biri imbere.

U Rwanda na Qatar bisanzwe bifitanye umubano ushingiye kuri byinshi harimo n’ubufatanye mu bya gisirikare n’umutekano.

Muri Mutarama 2020, Umugaba Mukuru w’Ingabo za Qatar, Lt Gen Ghanim bin Shaheen al-Ghanim yagiriye uruzinduko rw’iminsi ibiri mu Rwanda rugamije gushimangira umubano usanzwe urangwa hagati y’u Rwanda na Qatar ndetse no kurebera hamwe uko hakwagurwa umubano mu bijyanye n’ibya gisirikari hagati y’ibihugu byombi.

Lt Gen Ghanim bin Shaheen al-Ghanim yavuze ko hari byinshi ibihugu byombi bishobora gufatanyamo kandi ibiganiro yagiranye na mugenzi we w’u Rwanda, byitezweho umusaruro.

Abasirikare Sous Lieutenant Eloge NYIRINGABO na Sous Lieutenant Josia RUGEMA basoje amasomo mu bijyanye no gutwara indege
Habaye imyiyereko ya gisirikare mu muhango wo gutanga impamyabushobozi ku barangije amasomo muri Al Zaeem Air College
Amasomo atangirwa muri iyi kaminuza arahambaye mu byo gutwara indege za gisirikare
Ishuri rya Al Zaeem Air College riri mu akomeye ku Isi
Umuhango wo gutanga impamyabumenyi ku basoje amasomo muri Al Zaeem Air College witabiriwe na Emir wa Quatar Sheikh Tamim bin Hamad al Than

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .