Ubu butumwa bwajyanywe n’Umunyamabanga Mukuru Wungirije w’Urwego rw’Igihugu Rushinzwe Umutekano n’Iperereza (NISS), Brig Gen Jean Paul Nyirubutama.

Nk’uko ibiro ntaramakuru Akorda byabitangaje kuri uyu wa 26 Nzeri 2024, Perezida Tokayev yagaragaje ko hari intambwe nziza Kazakhstan imaze gutera mu mubano wayo na Afurika, agaragaza ko ari ngombwa ko igihugu cyabo cyagura umubano n’u Rwanda.

Uyu Mukuru w’Igihugu yaboneyeho kugaragaza ko yishimiye amasezerano yasinywe hagati ya Kazakhstan n’u Rwanda yo gukuriraho abaturage Visa mu rwego rwo koroshya urujya n’uruza.

Aya masezerano yashyizweho umukono na Minisitiri w’Ububanyi n’Amahanga n’Ubutwererane w’u Rwanda, Olivier Nduhungirehe, na Minisitiri w’Intebe akaba na Minisitiri w’Ububanyi n’Amahanga wa Kazakhstan, Murat Nurtleu, kuri uyu wa 25 Nzeri 2024.

Minisitiri Nduhungirehe na Nurtleu bahuriye i New York muri Leta Zunze Ubumwe za Amerika, aho bagiye guhagararira abakuru b’ibihugu mu Nteko Rusange y’Umuryango w’Abibumbye.

Perezida Tokalev na Brig Gen Nyirubutama baganiriye ku nzego Kazakhstan n’u Rwanda byagiriramo ubufatanye, zirimo ubucuruzi ndetse no guhererekanya umuco.

Umubano w’u Rwanda na Kazakhstan watangiye mu mwaka wa 2016. Lt Gen (Rtd) Charles Kayonga ni we uruhagarariye muri iki gihugu kiri ku mugabane wa Aziya.

Ubwiza bwa Kazakhstan

Brig Gen Nyirubutama yari kumwe na Lt Gen (Rtd) Kayonga ubwo yakirwaga na Perezida Tokalev

Brig Gen Nyirubutama ni Umunyamabanga Mukuru Wungirije wa NISS

Lt Gen (Rtd) Kayonga ni Ambasaderi w'u Rwanda mu bihugu birimo Kazakhstan

Bagiranye ibiganiro byo kwagura ubufatanye bw'u Rwanda na Kazakhstan

Iki gihugu gifite ubwiza buhebuje

Umurwa Mukuru wa Kazakhstan, Astana urimo inyubako nyinshi ziteye imbere