00:00:00 IGIHE NETWORK KN KINYARWANDA EN ENGLISH FR FRANCAIS

Perezida Kagame yitabiriye Inama igaruka ku ruhare rwa Siporo mu guhuza abatuye Isi

Yanditswe na IGIHE
Kuya 23 May 2022 saa 06:11
Yasuwe :

Perezida Paul Kagame yitabiriye Inama Mpuzamahanga igaruka ku ruhare rwa Siporo mu guhuza abatuye Isi, iri kubera i Davos mu Busuwisi.

Iyi nama yitabiriwe n’abayobozi ndetse n’abakinnyi b’umupira w’amaguru ku rwego rw’Isi, barimo Emir wa Qatar, Sheikh Tamim Bin Hamad Al Thani. Qatar ni cyo gihugu kizakira imikino y’Igikombe cy’Isi muri uyu mwaka.

Harimo kandi Perezida w’Ishyirahamwe ry’Umupira w’Amaguru ku Isi (FIFA) Gianni Infantino, Perezida w’Ishyirahamwe ry’Umupira w’Amaguru muri Afurika (CAF) Patrice Motsepe na Arsène Wenger wabiciye bigacika ubwo yari umutoza wa Arsenal yo mu Cyiciro cya Mbere mu Bwongereza, ubu akaba ashinzwe Iterambere ry’Umupira w’Amaguru ku Isi muri FIFA.

Iyi nama kandi yitabiriwe na Perezida w’Ikipe ya San Diego Wave FC, Jillian Anne Ellis ndetse akaba yarigeze kuba umutoza w’Ikipe ya Leta Zunze Ubumwe za Amerika y’umupira w’amaguru mu Bagore.

Umuzamu wa Chelsea FC n’Ikipe y’Igihugu ya Senegal, Édouard Osoque Mendy ndetse n’Umunya-Brésil Ronaldo Luís Nazário de Lima bari muri iyi nama.

Ronaldo yigeze kubica biracika mu makipe nka Real Madrid, AC Milan, Inter Milan n’andi atandukanye, ukongeraho Igikombe cy’Isi yatwaye mu 2002 ari kumwe na Brésil na Ballon d’Or ebyiri, zirimo iya mbere yatwaye afite imyaka 21 gusa, aho afite agahigo ko kuba ari we mukinnyi wayitwaye akiri muto.

Imikino ni kimwe mu bikorwa bihuza abantu benshi kandi bafite inkomoko, imico n’ikigero bitandukanye, ikaba imwe mu mpamvu yakunze gukoreshwa mu guhangana n’ibibazo birimo amakimbirane aturutse ku nkomoko, ubwoko n’ibindi bitandukanye.

Umupira w’amaguru kandi ni igikoresho gikomeye mu kunga abatuye Isi, aho wakunze gukoreshwa nyuma y’ibihe by’intambara, uba nk’inzira yo kongera kubaka umubano mu bantu usanga barahoze batumvikana.

Perezida Paul Kagame ku wa 23 Gicurasi 2022 yitabiriye Inama Mpuzamahanga igaruka ku ruhare rwa Siporo mu guhuza abatuye Isi, yabereye i Davos mu Busuwisi
Abafite aho bahuriye n'umupira w'amaguru batanze ibiganiro muri iyi Nama

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .