Perezida Kagame yavuze ko ubufatanye aribwo buzafasha Afurika kwigobotora ingaruka za Coronavirus

Yanditswe na Ferdinand Maniraguha
Kuya 8 Ukuboza 2020 saa 03:18
Yasuwe :
0 0

Perezida Paul Kagame yatangaje ko ubufatanye bw’ibihugu bya Afurika no gushyira mu bikorwa amasezerano ashyiraho isoko rusange rya Afurika ari ipfundo rizafasha uyu mugabane kwigobotora ingaruka zasizwe na Coronavirus.

Yabitangaje kuri uyu wa Kabiri ubwo yifashishije ikoranabuhanga yitabiraga Ihuriro ryiswe “Kusi Ideas Festival” ryateguwe n’Ikigo cy’Abanyakenya kimaze imyaka 60 gikora itangazamakuru, rigamijwe kurebera hamwe ibyakorwa mu nyungu z’ahazaza heza ha Afurika.

Uyu mwaka, iri huriro riri kwiga ku buryo Afurika yakwifashisha yivana mu bibazo byasizwe na Coronavirus kugira ngo igere ku iterambere yifuza.

Perezida Kagame ko yavuze ko havuzwe byinshi ku kuba umugabane wa Afurika ari wo utarazahajwe cyane na Coronavirus, gusa avuga ko igikomeye ari ibyawufashije.

Ati “Hagiye havugwa byinshi ku mpamvu Afurika yabashije guhangana neza n’icyo cyorezo bitandukanye n’ibyari byitezwe, gusa icy’ingenzi ni uko amasomo twabivanyemo n’ibisubizo twifashishije bizadufasha twese kuzahuka. Ubufatanye nibwo buzadufasha kuva muri ibi bibazo neza.”

Perezida Kagame yavuze ko nubwo Coronavirus yasubije byinshi inyuma, abaturage ba Afurika bagikeneye guhahirana no gutembererana kugira ngo batere imbere.

Yavuze ko ibyo byerekena ko amasezerano ashyiraho isoko rusange rya Afurika azatangira muri Mutarama umwaka utaha, afite agaciro.

Ati “Nubwo hari Covid-19, abaturage bacu baracyakeneye gutembera byoroshye hirya no hino muri Afurika bagahura na bagenzi babo bo muri Afurika. Ibi tuzabigeraho dukomeza gushyigikira amasezerano ashyiraho isoko rusange rya Afurika n’ibindi twiyemeje gukorera hamwe. Icya kabiri, tuzabigeraho twifashishije ikoranabuhanga.”

By’umwihariko, yavuze ko Afurika y’Iburasirazuba isanganywe impano karemano yo guhanga ibisubizo biteza imbere abaturage.

Yavuze ko igikenewe ari ugushyiraho uburyo bushya bwo gushora mu bikorwa remezo bifasha izo mpano kubyazwa umusaruro no gushyiraho politiki zorohereza izo mpano.

Perezida Kagame yavuze ko ibyo bizagerwaho habayeho ubufatanye butagira uwo buheza.

Kusi Festival ibaye ku nshuro ya kabiri iri kubera muri Kenya. Yitabiriwe n’impuguke mu burezi, abacuruzi, abanyapolitiki, abanyamakuru n’abandi baganirira hamwe ahazaza ha Afurika mu myaka 60.

Afurika ubu ituwe n’abaturage barenga miliyari 1.2 bavuye kuri miliyoni 477 bariho mu 1980 ndetse bazakomeza kwiyongera mu myaka iri imbere.

Mu 2050, ubwiyongere bw’abaturage ba Afurika ku mwaka buzaba burenze miliyoni 42 ndetse abaturage bose bazaba ari miliyari 2,4. Ibi bigaragaza nibura ubwiyongere bw’abaturage ba Afurika bangana na miliyoni 3,5 mu kwezi cyangwa se ubwiyongere bw’abantu 80 mu munota umwe.

Mu 2050 nibura biteganyijwe ko abakozi bane mu 10 ku Isi bazajya baba baturuka muri Afurika. Uyu munsi abarenga 50% by’abanyafurika ni urubyiruko rufite imyaka 20 mu gihe muri rusange ku Isi bari mu myaka 30. Ibi bigaragaza ko ahazaza hihariwe n’Abanyafurika.

Perezida Kagame yavuze ko isoko rusange rya Afurika rizafasha uwo mugabane kwigobotora ingaruka zasizwe na Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .