Perezida Kagame yashimiye Abiy Ahmed wahawe igihembo cy’amahoro cyitiriwe Nobel

Yanditswe na Ferdinand Maniraguha
Kuya 11 Ukwakira 2019 saa 06:51
Yasuwe :
0 0

Perezida Paul Kagame yashimiye Minisitiri w’Intebe wa Ethiopia, Dr Abiy Ahmed nyuma yo gutangazwa ko ari wahawe igihembo cy’amahoro cyitiriwe Nobel muri uyu mwaka wa 2019.

Abiy yatsindiye iki gihembo cyane cyane kubera umuhate we mu kubanisha igihu cye na Erithrea byari bimaze imyaka 20 mu ntambara.

Komite yo muri Norvège ishinzwe gutoranya abahabwa iki gihembo kandi yahisemo Abiy kubw’umuhate we mu gushakisha amahoro mu karere k’ihembe rya Afurika igihugu cye kirimo no ku rwego mpuzamahanga.

Abinyujije kuri Twitter, Perezida Kagame yashimiye Abiy Ahmed, ashimangira ko igihembo yahawe yari agikwiriye kandi ko ari urugero rwiza kuri benshi.

Yagize ati “Ndagushimiye muvandimwe kandi nshuti yanjye Minisitiri w’Intebe Abiy Ahmed, wahawe igihembo cy’amahoro cyitiriwe Nobel. Uragikwiriye rwose! Umuhate wawe mu guharanira ubumwe bwa Ethiopia, amahoro n’ubutwererane mu karere ni urugero kuri benshi muri Afurika.”

Abiy Ahmed abaye umuntu wa 100 uhawe igihembo cy’amahoro cyitiriwe Nobel, akazagishyikirizwa mu mujyi wa Oslo muri Norvège mu Ukuboza uyu mwaka.

Iki gihembo kiba giherekejwe n’ishimwe ry’ibihumbi 900 000 by’amadolari, ni ukuvuga 832 500 000 Frw.

Minisitiri w’Intebe Abiy Ahmed akimenya ko yahawe igihembo, yashimiye abamutoranyije avuga ko ari igihembo cya Afurika.

Yagize ati “Mwakoze cyane. Ni igihembo gihawe Afurika, gihawe Ethiopia kandi nizeye ko abandi bayobozi ba Afurika bizabaha imbaraga zo gukora ibyubaka amahoro ku mugabane wacu.”

Ibiro bya Minisitiri w’Intebe muri Ethiopia byasohoye itangazo bishimira abatoranyije Abiy ngo ahabwe igihembo cyitiriwe Nobel uyu mwaka.

Abatoranyije Ahmed bavuze ko kuva yajya ku butegetsi muri Mata 2018, yashyize imbere amahoro n’ubwumvikane, arekura imfungwa nyinshi za politiki, atanga imbabazi ku binyamakuru n’imitwe ya politiki byashinjwaga gushyigikira iterabwoba, aha n’urubuga abanyapolitiki n’imitwe yabo itandukanye kugira ngo batange umusanzu mu iterambere ry’igihugu.

Akigera kandi ku butegetsi yahise ashyiraho Komisiyo ishinzwe ubumwe n’ubwiyunge itarabagaho.

Azwi kandi nk’umuhuza mu mvururu zadutse muri Sudani guhera muri Mata uyu mwaka ubwo uwayoboraga icyo gihugu Omar Al Bashir yahirikwaga ku butegetsi.

Ibiro bya Minisitiri w’Intebe byatangaje ko igihembo Abiy ahawe ari ijwi rihamagarira Abanya-Ethiopia bose guharanira amahoro mu gihugu cyabo no mu ihembe rya Afurika by’umwihariko, ryakunze kurangwa n’imvururu.

Igihembo cy’amahoro cyitiriwe Nobel gitangwa buri mwaka, kigahabwa umuntu wakoze ibikorwa by’indashyigikirwa bigamije amahoro.

Umwaka ushize cyahawe umuganga wo muri Repubulika Iharanira Demokarasi ya Congo, Denis Mukwege Mukengere ndetse n’umugore wo muri Iraq, Nadia Murad.

Abiy Ahmed yatoranyijwe mu bakandida 301 bari batanzwe ngo batoranywemo uhabwa icyo gihembo, barimo abantu bwite 223 n’imiryango 78.

Perezida Kagame (ibumoso) na Minisitiri w'Intebe Ahmed ubwo baganiraga muri Gicurasi umwaka ushize wa 2018

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza