Perezida Kagame yasabye ko hatekerezwa uko ibice byose byagezwamo internet

Yanditswe na Nshimiyimana Jean Baptiste
Kuya 23 Nzeri 2018 saa 05:09
Yasuwe :
0 0

Perezida Paul Kagame yasabye ko mu gihe Isi yitegura kugera mu gihe kidasanzwe aho kimwe cya kabiri cy’abayituye bagerwaho na Interineti, hagomba no gutekerezwa uburyo buri wese yagerwaho n’iryo koranabuhanga mu buryo bungana kandi ntawe ubangamiwe.

Perezida Kagame yabigarutseho kuri iki Cyumweru ubwo yitabiriraga inama ya Komisiyo y’Umurongo Mugari wa Interineti, i New York. Ni komisiyo afatanya kuyobora na Carlos Slim.

Iyi nama yitabiriwe n’abandi bayobozi barimo Umunyamabanga Mukuru wa ITU, Houlin Zhao n’Umuyobozi Mukuru wa UNESCO, Audrey Azoulay.

Perezida Kagame yatangiye aha ikaze abakomiseri bashya muri iyi komisiyo, avuga ko umusanzu wabo uzaba ingirakamaro ku bikorwa byayo.

Yakomeje agira ati “Turitegura kugera mu gihe kidasanzwe aho kimwe cya kabiri cy’abatuye Isi bagerwaho na Interineti. Iyi ni intambwe tugomba kwishimira nubwo iri terambere ritagabanyijwe ku buryo bungana mu bice byose by’Isi.”

“Ubwo abantu benshi bamaze kugerwaho na Interineti, tugomba gutekereza ku buryo buri wese yagerwaho n’iryo koranabuhanga mu buryo bungana kandi ntawe ubangamiwe. Kugira ngo tubyaze umusaruro udushya tuzanwa n’Ikoranabuhanga tugomba no gutekereza ku birigenga.”

Perezida Kagame yavuze ko uburyo bwiza bwo kubikora ari ugukorana bya hafi hagati y’abafatanyabikorwa bose yaba za leta, abikorera n’abashakashatsi.

Iyi komisiyo y’Umuryango w’Abibumbye yashyizweho mu 2010, igamije kwihutisha ikoranabuhanga rya interineti muri gahunda z’iterambere za buri gihugu.

Imibare yo muri Kamena 2018 igaragaza ko nko mu Rwanda abakoresha internet bageraga kuri 5,475,448 nk’uko imibare y’Urwego Ngenzuramikorere, RURA, ibigaragaza.

Muri abo bose abakoresha internet igezweho ya 4G bari 34,922.

Perezida Kagame yitabiriye Inama ya Komisiyo y'Umurongo Mugari wa Internet i New York

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza