Yabigarutseho mu gitaramo cy’Inkera y’Imihigo cyasoje Ihuriro rya 17 ry’Umuryango wa Unity Club Intwararumuri cyabaye ku wa 16 Ugushyingo 2024.

Perezida Kagame yagaragaje ko igihugu cyemera kuyoborwa n’abantu bagishyiraho iterabwoba ryo gukora ikintu runaka bitewe n’icyo bashaka kiba cyaratakaje ubuzima.

Ati “Icyo baba bashaka ni ukukurangaza, kugushyiraho iterabwoba, bakakwita izina ndetse bakakubwira ngo turagufatira n’ibyemezo, ubwo uw’ubwoba uwo mwanya agahindura akumva ko akwiye kumva ibyo bamubwiye. Ibyo biba mu gihugu cyatakaje ubuzima bwacyo, iyo ubyemera ntuba uriho.”

Yongeyeho ati “Iyo ubyemera ngo abantu bakuyobore bakubwire ibyo ukora, uko wifata…ariko se ko duhora turi mu biganiro byinshi, ubu muri iyi si nagira ngo twese twaremwe kimwe hari abantu bamwe Imana yaremye irangije ibasigira ububasha bwayo ngo bareme abandi? Ubu mwaremwe n’abandi? Ntabwo mwaremwe n’Imana? Ngira ngo twese twaremwe n’Imana ariko hari aho bigera ukagira ngo abantu bamwe baremwe n’abandi.”

Yagaragaje ko abo biyita ko Imana yaba yarabasigiye ububasha, atazi aho bari bari ubwo Abatutsi barenga miliyoni imwe bicwaga mu minsi 100 gusa.

Ati “Abo abacu bajya kurimbuka bagashira bari he? Cyangwa ubu bari he? Igihugu gishaka kwiyubaka kibaza ibyo bibazo byose kigashaka ibisubizo. Ukamenya ngo nta bandi baza ngo bakubwire uko ukwiye kuba wararemwe.”

Yagaragaje ko nta muntu ukwiye kuba abwira undi uko agomba kwifata nyuma yo kuremwa.

Ati “Uwaturemye we yaduhaye n’ubwonko ngo dutekereze, tugomba kubukoresha. U Rwanda n’amateka yacu n’isi nyine dukwiriye kuba tumenya uko iteye, nta mpamvu n’imwe yatuma tutagira izo mbaraga, ubwo bushake, uko kumenya kw’ibyo tugomba gukora.”

“Uko tugomba kwifata ubwacu, uko tugomba kwivana hamwe tukigeza ahandi aho dushaka kujya. Nta mpamvu n’imwe bwa bushake bwa burakari, bwa bushobozi navugaga buturimo ariko n’udashaka kubukoresha uzaba wa wundi usa n’uwaremwe n’undi.”

Perezida Kagame yasabye abitabiriye Ihuriro rya 17 rya Unity Club Intwararumuri kunga ubumwe kuko bizafasha mu gutuma ibivugwa n’abanga u Rwanda batarwifuriza ibyiza batsindwa.

Yavuze ko hari abirirwa basebya u Rwanda, abandi bakaruharabika bashingiye ku miyoborere yarwo bamwe ntibanatinye kuvuga ko ruyobowe n’igitugu ashimangira ko ubumwe bw’Abanyarwanda buzabaca intege.

Ati “Ibyo byose bivugwa cyangwa bigirirwa nabi u Rwanda, iyo abantu bashyize hamwe bafite iyo ntego, kwa gushaka ndetse n’uburakari buvuga ngo ariko kuki abantu batugira batya cyangwa twagaragara nk’ibimeze bitya, ibyo byose bihinduka ubusa.”

Yashimangiye ko ibyo igihugu gisezeranya Abanyarwanda bikorwa nta mususu.

Yasabye buri wese gutanga umusanzu we mu guharanira ko u Rwanda rukomeza kubaho kandi rukabaho neza nk’uko Abanyarwanda barwifuza.

Yavuze ko buri muntu mu mwanya we mu gihe yagerageza agakora ibyo ashoboye agatanga umusanzu ashoboye kugira ngo rwa Rwanda rukomeze rubeho kandi rubeho neza uko Abanyarwanda babyifuza.

Perezida Kagame yanenze ibihugu byemera gushyirwaho igitutu n'amahanga, asaba abanyarwanda kunga ubumwe

Perezida Kagame na Madamu Jeannette Kagame mu gitaramo cy’Inkera y’Imihigo cyasoje Ihuriro rya 17 ry’Umuryango wa Unity Club Intwararumuri

Minisitiri Ushinzwe Ibikorwa by'Ubutabazi, Albert Murasira, mu bitabiriye Ihuriro rya 17 rya Unity Club Intwararumuri

Minisitiri w'Uburezi, Joseph Nsengimana, ni umwe mu banyamuryango bashya ba Unity Club Intwararumuri

Perezida wa Sena, Dr. Kalinda François Xavier, na we yitabiriye iri huriro rya Unity Club Intwararumuri

Ibyishimo byari byose kuri Ambasaderi mushya w’u Rwanda mu Bwami bwa Luxembourg, Munyangaju Aurore Mimosa, mu nkera y’Imihigo ya Unity Club Intwararumuri isoza ihuriro rya 17 ry’uwo muryango

Umunyamabanga wa Leta muri Minisiteri y'Ububanyi n'Amahanga, Gen (Rtd) Kabarebe na Minisitiri mu Biro bya Perezida wa Repubulika, Judith Uwizeye mu Nkera y'Imihigo yashoje iri huriro rya 17 rya Unity Club Intwararumuri.

Depite Muhakwa Valens na we yari mu bitabiriye iyi Nkera y'Imihigo yatangiwemo impanuro na Perezida Kagame

Perezida wa Komisiyo y’Igihugu y’Amatora, Oda Gasinzigwa, na we yari yakereye Inkera y'Imihigo yasoje Ihuriro rya 17 rya Unity Club Intwararumuri.

Minisitiri w'Umutekano, Dr. Vincent Biruta, na we yitabiriye iri huriro rya 17 rya Unity Club Intwararumuri.

Minisitiri w'Ikoranabuhanga na Inovasiyo, Ingabire Paula, na we yitabiriye iri huriro nk'abandi banyamuryango ba Unity Club Intwararumuri.

Minisitiri wa Siporo, Nyirishema Richard, na we nk'umunyamuryango mushya wa Unity Club Intwararumuri, yishimiye kwitabira iri huriro.

Senateri Evode Uwizeyimana ubwo yari mu Nkera y'Imihigo yasoje Ihuriro rya 17 rya Unity Club Intwararumuri.

Umuyobozi wa DGPR Green Party, Dr. Habineza Frank, ari kumwe n'uwahoze ari Umunyamabanga Mukuru wa FPR Inkotanyi, Ngarambe François, mu nkera y'Imihigo ya Unity Club Intwararumuri.

Mufti w'u Rwanda, Sheikh Sindayigaya Mussa, mu bitabiriye Ihuriro rya 17 rya Unity Club Intwararumuri.

Umuyobozi Mukuru wa RDB, Francis Gatare na we ari mu bitabiriye iri huriro rya Unity Club Intwararumuri ndetse n'Inkera y'Imihigo.

Minisitiri w'Intebe, Dr. Ngirente Edouard, na we yari mu nkera y'Imihigo yasoje Ihuriro rya 17 rya Unity Club Intwararumuri muri Convention Centre.

Minisitiri w'Imari n'Igenamigambi, Murangwa Yusuf, na we ni umunyamuryango mushya wa Unity Club Intwararumuri.

Amafoto: Kwizera Hervé}}

---