Perezida Kagame yakiriye impapuro zemerera ba ambasaderi batatu guhagararira ibihugu byabo mu Rwanda

Yanditswe na Rabbi Malo Umucunguzi
Kuya 27 Ukwakira 2020 saa 02:50
Yasuwe :
0 0

Perezida Paul Kagame yakiriye impapuro zemerera ba ambasaderi batatu bashya guhagararira ibihugu byabo mu Rwanda, barimo Jin-weon Chae wa Korea, Saleh Bin Suleiman Bin Ahmed Al-Harthi wa Oman na Nguyen Nam Tien wa Vietnam.

Ambasaderi Jin-weon Chae uzaba afite icyicaro mu Rwanda, yavuze ko mu gihe cye azaharanira kongera imbaraga mu mubano w’u Rwanda na Korea, hagamijwe ko utanga umusanzu mu iterambere rirambye ry’iki gihugu.

Ati "Ndifuza kuzita cyane ku guteza imbere ubutwererane mu iterambere n’ubukungu n’ubufatanye hagati y’abaturage b’ibihugu byombi."

Iki gihugu gisanzwe gifatanya n’u Rwanda binyuze mu Kigo cya Korea Gishinzwe Ubutwererane Mpuzamahanga (KOICA), binyuze mu nzego z’uburezi no kubaka ubushobozi, iterambere ry’icyaro, ubuhinzi, isakazamakuru n’itumanaho.

Kuva mu 2012 kugeza mu 2020, u Rwanda rwakiriye ishoramari ry’ibigo icyenda byo muri Korea, ryose hamwe rifite agaciro kagera kuri miliyoni 268.5 $, ni ukuvuga asaga miliyari 262 Frw. Iryo shoramari ririmo KT Corporation yahoze ari Korea Telecom, ikigo cyashoye akayabo mu kubaka umuyoboro wa 4G LTE mu Rwanda.

Hari n’ikigo HeWorks Ltd cyashoye imari mu gutunganya indodo zituruka ku magweja ndya-buberi, ndetse cyatangiye kohereza mu mahanga ibikomoka kuri ubu buhinzi muri uyu mwaka. Giteganya no kubaka uruganda mu Karere ka Bugesera bitarenze umwaka wa 2021, ruzaha akazi abantu 3000.

Ambasaderi Saleh Bin Suleiman wa Oman uzaba afite icyicaro i Nairobi muri Kenya, we yavuze ko ibihugu byombi kandi by’inshuti, bisanganywe umubano umeze neza kandi umaze igihe kinini.

Umubano mu bya dipolomasi hagati y’ibihugu byombi watangiye mu 1998, mu gihe mu mateka y’ubucuruzi mu Rwanda, abanya-Oman bari mu babugejeje muri iki gihugu mu myaka ya 1900.

Yagize ati “Tumaze igihe kinini hano, dufitanye umubano w’amateka hagati y’ibihugu byombi, navuga ko dufitanye umubano mu nzego nyinshi, hari ibijyanye n’uburezi, ubukerarugendo, ibikomoka kuri peteroli n’ubucukuzi bw’amabuye y’agaciro kandi dukomeje gukorana ubucuruzi.”

Yagarutse ku itsinda ry’abacuruzi bo muri Oman ryaje mu Rwanda muri Gashyantare rigizwe n’abasaga 200 bagirana inama na bagenzi babo, banagira umwanya wo kumurika ibyo bakora birimo ibikoresho by’ubwubatsi, ibiribwa, ibijyanye n’uburezi, ibikoresho byo mu nzu n’ibindi.

Yakomeje ati “Turifuza kubona ibigo byanyu nabyo bishora imari muri Oman, abikorera banyu bakajya gushaka amahirwe babyaza umusaruro muri Oman. Dufite amahirwe menshi kubera ko twegereye inyanja y’u Buhinde, dufite icyambu kinini, ibice byahariwe inganda, ndifuza gutumira abacuruzi bo mu Rwanda gusura Oman, tukareba uko twateza imbere umubano mu bucuruzi hagati y’impande zombi.”

Ambasaderi Saleh Bin Suleiman yavuze ko Oman yiteguye kwakira ishoramari ry’abanyamahanga, ndetse nk’uko Perezida Kagame yabishimangiye, u Rwanda narwo ruri muro uwo mujyo.

Yavuze ko yiteguye ko ibihugu byombi bizarushaho kunoza uwo mubano.

Imibare igaragaza ko ubucuruzi hagati y’u Rwanda na Oman yavuye ku 920 000$ mu mwaka wa 2017 bukagera kuri miliyoni 2.3$ mu 2018. Mu bicuruzwa u Rwanda rutumiza muri Oman, 82% ni ibikomoka kuri peteroli.

Ni mu gihe ibicuruzwa u Rwanda rwohereje muri Oman ku bwinshi mu 2018 harimo imboga, ibiribwa bitunganyije n’ibinyampeke.

Ambasaderi Nguyen Nam Tien wa Vietnam, we yavuze ko uyu ari umunsi ukomeye kuri we. Azaba afite icyicaro muri Tanzania.

Yavuze ko azashyira imbaraga mu guteza imbere umubano w’ibihugu byombi, hagamijwe kubaka u Rwanda na Vietnam biteye imbere.

Yakomeje ati “Turifuza kwagura ibijyanye n’ubufatanye n’amahanga no gusangira ubunararibonye, kandi Vietnam n’u Rwanda dushobora gufatanya muri byinshi binanyuze mu miryango nk’Umuryango w’Abibumbye, ndetse Vietnam yifuza kuba indorerezi mu Muryango wa Afurika yunze ubumwe mu gihe kiri imbere, bityo twiteze uruhare rw’u Rwanda.”

U Rwanda na Vietnam byatangiye umubano mu bya dipolomasi mu 1975, mu 2000 ibihugu byombi bisinyana amasezerano y’ubutwererane.

Muri Gicurasi 2008, Perezida Paul Kagame yagiriye uruzinduko muri Vietnam ku butumire bwa mugenzi we. Ni uruzinduko rwasojwe hasinywe amasezerano y’ubufatanye mu nzego zirimo ubuhinzi, ubuzima n’uburezi.

Perezida Paul Kagame mu ifoto y’urwibutso na Ambasaderi Nguyen Nam Tien wa Vietnam (uwa kabiri ibumoso) na Minisitiri w’Ububanyi n’amahanga, Vincent Biruta (ubanza ibumoso)
Amb. Saleh Bin Suleiman Bin Ahmed Al-Harthi nyuma yo gushyikiriza Perezida Kagame impapuro zimwemerera guhagararira igihugu cye, yatumiye abacuruzi bo mu Rwanda muri Oman
Ambasaderi Jin-weon Chae wa Korea yiyemeje gushimangira umubano usanzwe hagati y'ibihugu byombi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .