Perezida Kagame yahaye umukoro urubyiruko kugira ngo Afurika izihaze mu biribwa

Yanditswe na Ferdinand Maniraguha
Kuya 10 Nzeri 2020 saa 03:53
Yasuwe :
0 0

Perezida Paul Kagame yasabye urubyiruko rwa Afurika kugira uruhare mu buhinzi bugezweho kugira ngo uwo mugabane uzagere ku ntego yo kwihaza mu biribwa, ari nako ubuhinzi n’ubworozi bigira uruhare rugaragara mu iterambere ry’ubukungu.

Yabitangaje kuri uyu wa Kane mu nama mpuzamahanga yiga ku iterambere ry’ubuhinzi muri Afurika, African Green Revolution Forum iri kuba mu buryo bw’ikoranabuhanga.

Ubuhinzi ni rumwe mu rwego rurimo abantu benshi muri Afurika ariko umusaruro warwo ku iterambere ry’ubukungu bw’ibihugu ni ruto cyane. Ishami ry’Umuryango w’abibumbye ryita ku biribwa n’ubuhinzi, FAO, rigaragaza ko nibura mu bihugu byinshi bya Afurika uruhare rw’ubuhinzi ku musaruro mbumbe w’igihugu rutajya rurenga 15 %.

Ni mu gihe Afurika ifite abantu miliyoni 257 bugarijwe n’inzara, by’umwihariko muri Afurika yo munsi y’ubutayu bwa Sahara, nyamara bagomba kuba bari mu murongo w’uko uwo mugabane wihaza ku biribwa bitarenze mu mwaka wa 2030.

Mu kiganiro cyahurije hamwe urubyiruko cyiswe ‘Youth Town Hall of the AGRF Virtual Summit’ , Perezida Kagame yavuze ko kugira ngo intego yo kwihaza mu biribwa igerweho, urubyiruko rukwiriye kubanza kubyibazaho, rukanatekereza ku ruhare rwarwo ngo bigerweho.

Yagize ati “Urubyiruko rukwiriye kuba rwibaza kuri ibi bibazo, ese bo ubwabo barashaka ko ahazaza ibiribwa muri sosiyete babamo biba bimeze gute? Ese uruhare rwabo ni uruhe mu gufasha abanyafurika kugera aho bashaka kugera. Ni ibyo nifuza ku rubyiruko ariko tugomba gukorera hamwe baba abato n’abakuru ngo tuhagere.”

Perezida Kagame ko hakenewe urubyiruko rufite umuhate wo guhanga udushya ku buryo ubuhinzi n’ubworozi biba moteri y’iterambere ry’ubukungu bwa Afurika.

Yavuze ko za Guverinoma nazo zigenda zishyira imbaraga mu bijyanye n’ibikorwa remezo, ikoranabuhanga ndetse n’ubushakashatsi byorohereza abahinzi n’abakora muri urwo rwego.

Ati “Amahirwe ari mu buhinzi ku mugabane wacu ni menshi. Dukeneye gushoramo byinshi kugira ngo tuvanemo byinshi bitewe n’ibyo twashoyemo [..] Inyungu nyinshi izaturuka ku musaruro mwinshi, wongerewe agaciro nko mu bijyanye n’imboga n’imbuto, ubworozi bw’inkoko, ingurube, uburobyi n’ibindi.”

Perezida Kagame yavuze ko intego ari uko ubuhinzi bwa Afurika buva ku bw’amaramuko, bukaba ubugamije isoko, kwihaza mu biribwa no guteza imbere ibihugu.

Ati “Intego ni uguhindura ubuhinzi, bukava kubw’amaramuko bukaba ubugezweho, bushingiye ku bumenyi butuma haboneka ibiribwa bihagije ariko bukagira n’uruhare mu bukungu bwacu. Ibyo bivuze uruhare runini rw’abikorera harimo n’abahinzi.”

Nubwo urubyiruko rudakunze gushishikarira ubuhinzi, ni rumwe mu bafite ubushomeri buri hejuru. Banki y’isi igaragaza ko mu bantu badafite akazi muri Afurika, urubyiruko rwihariye 60 %.

Mu kugabanya icyo cyuho, Umukuru w’inama y’ubutegetsi y’Ihuriro nyafurika ryita ku buhinzi, AGRA, Hailemariam Desalegn yavuze ko urubyiruko rukwiriye kubyaza umusaruro amahirwe ari mu buhinzi, kuko harimo imirimo myinshi.

Ati “Hari amahirwe menshi mu buhinzi no kuba bwatanga akazi. Ntabwo urubyiruko rwa Afurika rurabona neza ubuhinzi nk’ahantu habaha imibereho myiza. Ntabwo tuvuga gukora bwa buhinzi bw’amaramuko, turavuga ubuhinzi bugamije isoko, bwifashishije ikoranabuhanga.”

Banki y’isi ivuga ko kugira ngo Afurika ibonere imirimo urubyiruko ruzaba ruyirimo mu mwaka wa 2035, bisaba guhanga imirimo mishya miliyoni 350.

Perezida Kagame yavuze ko urubyiruko rukeneye gufasha Afurika kwihaza mu biribwa hashingiwe ku buhinzi bw'umwuga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .