00:00:00 IGIHE NETWORK KN KINYARWANDA EN ENGLISH FR FRANCAIS

Perezida Kagame yagaragaje ko hari abihishe inyuma y’ikibazo cya FDLR badashaka ko kirangira

Yanditswe na IGIHE
Kuya 30 Ugushyingo 2022 saa 04:00
Yasuwe :

Perezida Paul Kagame yavuze ko hakurikijwe igihe ikibazo cy’abagize uruhare muri Jenoside yakorewe Abatutsi bahungiye mu bihugu birimo Repubulika Iharanira Demokarasi ya Congo kimaze, bigaragara ko hari abacyihishe inyuma bashaka ko kigumaho iteka ryose.

Ni bumwe mu butumwa yatanze nyuma yo kwakira indahiro za Minisitiri w’Ubuzima mushya, Dr Sabin Nsanzimana n’Umunyamabanga wa Leta muri iyi minisiteri ushinzwe ubuvuzi rusange, Dr Yvan Butera, kuri uyu wa Gatatu tariki 30 Ugushyingo 2022.

Perezida Kagame yavuze ko kuba iki kibazo kidakemuka atari uko gikomeye cyane ahubwo hari izindi mpamvu zibyihishe inyuma.

Ati “Mutekereza ko ari ukubera iki ikibazo cya FDLR kimaze imyaka ikabakaba 30 kidakemuka? Ese ni ukubera ko ari ikibazo kigoye kugikemura? Oya. Ntagiye kwemera ikintu ntari narigeze nemera. Narabikekaga ariko nta bimenyetso byari bihari. Ku bigaragara hari umuntu uri ahantu runaka ushaka ko iki kibazo gihoraho iteka ryose.”

Umukuru w’Igihugu yavuze ko bitumvikana ukuntu u Rwanda rusigaye rwitirirwa ibyaha abo muri FDLR bakoze muri Jenoside yakorewe Abatutsi mu 1994.

Ati “Ni nk’aho babayeho kubera ko hari ibyo twakoze bitari byiza. Ni nk’aho dusangiye ibyaha bakoze. Mu yandi magambo ni nk’aho abakoze ibyaha mu mateka mabi twanyuzemo n’abagizweho ingaruka na byo twese turi bamwe.”

Yakomeje ati "Abantu bagize uruhare muri Jenoside, bamwe bari hano, abandi bari hanze banze no kubaburanisha, banze kohereza mu Rwanda ngo kubera ibijyanye n’uburenganzira bwa muntu, hanyuma tukababwira tuti niba mudashaka kubohereza mu Rwanda, mwakire ibimenyetso mubaburanishe [...] nabyo ntibikorwe. Ni ukuvuga ngo ntiwemera n’urwego rwawe rw’ubutabera."

"Hanyuma nyuma bakazagaruka badutunga urotoki [...] bamwe muri aba bantu banze kohereza aba bantu, byararenze bakora ibyaha mu bihugu byabo nyuma bakifuza kubatwoherereza."

Yatanze urugero rw’umwe mu bakekwaho Jenoside, wishe umuntu aho ari mu mahanga n’undi wafashe ku ngufu, ariko ibyo bimaze kuba, ibyo bihugu bitangira gushaka uko bibohereza mu Rwanda, byirengagije ko u Rwanda rwari rumaze igihe kinini rusaba ko boherezwa ngo baburanishwe ku byaha bya Jenoside.

Ati "Mu myaka 28 ishize, iki kibazo kiracyahari. Hashize imyaka 22 ingabo za Loni zoherejwe muri Congo kugira ngo zijye kugikemura, kurwanya FDLR n’indi mitwe. Nta munsi n’umwe naba nzi, wenda mwe mwaba muwuzi, aho izi ngabo zarwanyije FDLR mu gushaka kuyirukana. Ariko zishishikajwe no kurwanya umutwe w’ikirangirire M23. Ibyo ni byo byabaye mu 2012, kandi twaburiye aba bantu, turababwira tuti ‘muri gukemura iki kibazo igice, ikindi gice kizatugiraho ingaruka.’”

Yavuze ko iki atari ikibazo cya gisirikare kigomba gukemurwa hifashishijwe imbunda ahubwo ko ari icya politiki.

Muri Gashyantare uyu mwaka ubwo Perezida Kagame yari amaze kwakira indahiro z’abaminisitiri bashya yavuze ko impamvu FDLR ikomeje kwidegembya mu mashyamba ya Congo ari uko ibikorwa byitwa ko byashyizweho bigamije kuyirwanya bisa n’aho ari byo byareze ikibazo cyayo kigakomeza gukura.

Ubufatanye bw’ingabo za Congo na FDLR MONUSCO irabuzi

Raporo zitandukanye zagiye zigaragaza imikoranire yeruye y’Ingabo za Repubulika Iharanira Demokarasi ya Congo zifitanye imikoranire na FDLR. Nka raporo y’Umuryango w’Abibumbye yo mu 2012 yerekanye ko abayobozi bo ku rwego rwo hejuru muri FDLR no muri leta ya Congo bagiye bagirana ibiganiro n’imikoranire mu bihe bitandukanye.

Vuba aha ku butegetsi bwa Joseph Kabila FDLR yavuzweho guhabwa intwaro zirimo imbunda n’amasasu bigakorwa mu buryo burimo kuyobya uburari.

Felix Antoine Tshisekedi akigera ku butegetsi yagerageje kurwanya imitwe yitwaje intwaro mu Burasirazuba bwa RDC by’umwihariko FDLR ari na bwo hicwaga abarimo Gen Sylvestre Mudacumura wayobora uyu mutwe ariko nyuma yaje kwiyunga na yo ihabwa n’imyambaro y’igisirikare cy’igihugu ngo ihangane n’abarwanyi ba M23.

Mu kiganiro Perezida Paul Kagame yagiranye na RBA ku itariki 4 Nyakanga 2022, yavuze ko RDC ishyigikira FDLR ihungabanya umutekano w’u Rwanda kandi ikibabaje ari uko ingabo z’Umuryango w’Abibumbye ziri muri Congo (MONUSCO) zibizi.

Ati " Ni na ko byagenze ijya kurasa ku butaka bw’u Rwanda. Hari ibyagiye biba kuva mu 2019 ubwo FDLR yinjiraga ku butaka bwacu mu Kinigi ariko ikaza guhashywa n’ingabo zacu, yari yaturutse muri RDC ndetse barahawe intwaro na RDC.”

Nyamara igisirikare cya Repubulika Iharanira Demokarasi ya Congo (FARDC) giherutse kuvuga ko FDLR idateye ikibazo ku Rwanda kuko abayigize ari abantu baba bishakira ibyo kurya gusa.

Ni amagambo yavuzwe n’umuvugizi w’igisirikare cya RDC, Gen Maj Léon-Richard Kasonga muri Kamena uyu mwaka.

Yagize iti "Mu biro byanjye mfite dosiye, urafungura ubonemo dosiye ndende ivuga kuri FDLR ariko nta gitero na kimwe uri bubone cyagabwe ku Rwanda, yewe n’umunsi n’umwe. Uyu mutwe twarawutsinze."

Perezida Kagame yavuze ko bitumvikana uburyo ikibazo cya FDLR kimaze imyaka ikabakaba 30 kitararangira

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .