Perezida Kagame ntiyumva akamaro k’ubwinshi bwa Kaminuza ziri mu Rwanda

Yanditswe na Philbert Girinema
Kuya 16 Gashyantare 2020 saa 02:37
Yasuwe :
0 0

Perezida Kagame yavuze ko atumva impamvu mu Rwanda hari kaminuza nyinshi ariko wareba umusaruro wazo ukawubura, ndetse Minisitiri w’Intebe Dr Edouard Ngirente ashimangira ko koko hakwiye kugira igikorwa kuko bitabaye ibyo mu myaka 15 “ushobora kuzashaka uwo ugira meya ukamubura”.

Umukuru w’Igihugu yavuze ku mubare wa Kaminuza nyinshi ziri mu Rwanda ariko zidatanga umusaruro ukwiye kandi zari zikwiye gufasha igihugu mu iterambere.

Magingo aya mu Rwanda habarurwa kaminuza n’amashuri makuru ya leta ebyiri mu gihe izigenga ari 29.

Iyi ngingo Perezida Kagame yayigarutseho mu kiganiro cyarimo Minisitiri w’Ubutegetsi bw’Igihugu, Prof Shyaka Anastase; uw’Ikoranabuhanga na Inovasiyo, Paula Ingabire; uw’Ubucuruzi n’Inganda, Soraya Hakuziyaremye na Donald Kaberuka.

Muri iki kiganiro, Kaberuka yagarutse ku buryo uburezi ari ingenzi, kandi ko ibihugu byateye imbere usanga umubare muto w’abanyeshuri ariwo ujya muri za Kaminuza aho yatanze urugero mu bihugu birimo u Budage.

Perezida Kagame yahereye kuri iyi ngingo, avuga ku bwinshi bwa Kaminuza ziri mu Rwanda, avuga uburyo yaganiriye na Prof Nshuti Manasseh usanzwe ari Umujyanama we amubaza impamvu yashoye imari mu bijyanye na Kaminuza (aha yavugaga Kaminuza ya Kigali).

Ati “Kuki utashoye mu kindi kintu gishobora gutanga inyungu ku gihugu kurushaho, urugero wenda nk’ishuri ry’imyuga aho kuba Kaminuza isanzwe.”

Perezida Kagame yavuze ko byagaragaye ko kugira Kaminuza nyinshi atari cyo cy’ingenzi, ahubwo ko abantu bahitamo gukora ibibaha inyungu nubwo umusaruro waba ari ntawo.

Yavuze ko “Sinzi umubare wa Kaminuza dufite, uwahoze ari Minisitiri w’Intebe arayifite, Manasseh arayifite” ndetse ko kugira ngo ishuri ryitwe Kaminuza hari ibyo riba rikwiye gushingiraho kugira ngo ryitwe gutyo, kandi ko igomba kuba ifite icyo igiye gukora.”

“Bigendanye n’ibyo turi gukora, ntabwo izi wazifata nka kaminuza za nyazo. Ni gute twemera ko ibi bibaho mu izina runaka mu gihe tubizi neza ko zitabikwiye?”

Perezida Kagame yavuze ko yaganiriye na Minisitiri w’Intebe, yaba uriho ubu n’abandi bamubanjirije kuri iki kibazo cya Kaminuza zidatanga umusaruro, kugeza nubwo yabasabye urutonde rwazo mu nama y’Abaminisitiri.

Ati “Inshuro nyinshi, Minisitiri w’Intebe urabyibuka, twagiranye ibi biganiro mu nama y’Abaminisitiri. Bazanye urutonde rwa kaminuza, harimo n’indi igenzurwa n’uwari Minisitiri w’Uburezi, Prof Lwakabamba.”

“Bazanye uru rutonde rwa kaminuza mu nama y’abaminisitiri, ariko ntabwo zari zujuje 10% bisabwa kugira ngo zibe kaminuza, barangiza bakazana igitutu ngo urumva hari abana benshi…ngo urumva iriya ni kaminuza ya Kibungo, ni iy’Abapadiri, ibyo bikaza ku isonga ry’ibishingirwaho aho kuba uburezi.”

Perezida Kagame yavuze ko yahoraga abaza Minisitiri w’Uburezi impamvu atazana urutonde rwa kaminuza zikwiriye gufungwa kuko hari “izihari zidakwiye kwitwa za kaminuza.”

Yavuze ko zimwe muri izi kaminuza arizo zisubiza inyuma igihugu, ko bitumvikana n’uburyo zinanirwa kuzuza ibisabwa za kaminuza nibura zo mu bihugu byo munsi y’ubutayu bwa Sahara.

Donald Kaberuka yavuze ko nta gihugu na kimwe gishobora gutera imbere kidashyize ingufu mu burezi, ko hakwiye kubaho uburyo hagenzurwa ibyo abantu bakura mu mashuri, byakorwa mu buryo bwifashishije siyansi cyangwa ubundi ariko bikwiye gukorwa.

Minisitiri w’Intebe, Dr Edouard Ngirente, yavuze ko ari ikibazo gikomeye kuko mu myaka 15 iri imbere ushobora “kuzashaka umuntu ugira meya cyangwa minisitiri ukamubura”.

Yavuze ko hakwiye gushyirwa imbaraga mu mashuri yigisha imyuga, za Kaminuza zisanzwe zigasigara ari nke nazo ziri ku rwego rwo hejuru zunganira ya mashuri asanzwe.

Minisitiri w’Ikoranabuhanga na Inovasiyo, Ingabire Paula yavuze ko “uyu munsi dufite imihigo dusinya, bifata imyaka itatu kugira ngo wirukane umuntu ukora nabi, ni ukubera iki bifata icyo gihe cyose ? Byari bikwiye kuba igihe gito, ariko hakabaho uburyo butarenganya umuntu”.

Mu 2017, Minisiteri y’Uburezi yahagaritse amashami atandukanye yigishwaga muri kaminuza n’amashuri makuru 10 akorera mu Rwanda, nyuma y’igenzura ryakozwe bagasanga batujuje ibisabwa. Kaminuza zimwe zasabwe gukosora ibyo zasabwaga zarakomorewe, eshatu zitabikoze zifungwa burundu.

Perezida Kagame yavuze ko kugira ngo ishuri ryitwe Kaminuza ryakabaye rifite ibyangombwa byose biri ku rwego rukomeye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .