Perezida Kagame aragaragaza raporo ku mavugurura y’inzego zigize AU

Yanditswe na IGIHE
Kuya 9 Gashyantare 2020 saa 08:29
Yasuwe :
0 0

Perezida Paul Kagame wahawe inshingano zo kuyobora itsinda ryiga ku mavugurura akenemwe mu muryango wa Afurika Yunze Ubumwe (AU) kuri iki Cyumweru arageza ku bakuru b’ibihugu na Guverinoma bitabiriye inteko rusange y’uwo muryango raporo ku mavugurura y’inzego zawo.

Perezida Kagame ari i Addis Abeba muri Ethiopia aho yitabiriye inama isanzwe ya 33 ya AU. Ni inama ihurije hamwe abakuru b’ibihugu na za Guverinoma, abaminisitiri b’ububanyi n’amahanga b’ibihugu bigize AU, abayobozi muri Komisiyo ya AU, abahagarariye ibihugu byabo muri uwo muryango n’abandi batumirwa.

Umuhango wo gufungura iyo nama uteganyijwe saa tanu n’igice zo kuri iki cyumweru tariki 9 Gashyantare 2020. Perezida Kagame kandi aritabira inama y’abayobozi b’amashami n’imiryango bigize AU.

Biteganyijwe ko kandi haratorwa umukuru w’igihugu uzayobora umuryango wa Afurika Yunze Ubumwe mu mwaka wa 2021, asimbura Cyril Ramaphosa wa Afurika y’Epfo uzayobora mu 2020.

Ku gicamunsi cyo kuri iki cyumweru, Perezida Kagame arageza ku bitabiriye inama mu muhezo, raporo ku mavugurura y’inzego zigize AU.

Biteganyijwe ko Perezida Kagame na madamu Jeannette Kagame aritabira umugoroba wo gusangira wateguwe na Minisitiri w’intebe wa Ethiopia, Abiy Ahmed.
Mu Nteko rusange ya 28 y’Umuryango wa Afurika Yunze Ubumwe yateraniye Addis Ababa muri Mutarama 2019, nibwo Perezida Kagame yagejeje raporo ku bakuru b’ibihugu 54 bigize AU, ku mavugurura akenewe mu mikorere y’uyu muryango.

Ni inshingano yari yaraherewe mu nama ya 27 ya AU yabereye i Kigali muri Nyakanga 2016, ndetse atoranya inararibonye icyenda zamufashije muri ako kazi.

Mu nzego zari zikeneye amavugurura, harimo imikorere ya Komisiyo ya AU, uburyo bwo gupima uko inzego zigera ku byo ziyemeje, kwishakamo ubushobozi nk’ibihugu bihuriye mu muryango, uko abayobozi bahagararirwa mu nama za AU n’ibindi.

Mu nama yabereye mu muhezo muri Ethiopia kuwa 29 Mutarama 2017, Perezida Kagame yagaragarije abakuru b’ibihugu bigize AU ko hari ikibazo cyo kuba imiryango ishamikiye kuri AU itagaragara neza uko igabana inshingano n’abanyafurika bakaba batabona akamaro k’uyu muryango.

Byiyongeraho kuba kenshi abakuru b’ibihugu bakorana inama, bagafata imyanzuro bakayumvikanaho ariko ntishyirwe mu bikorwa, ashimangira ko kugira ngo aya mavugurura ashoboke bisaba indi mikorere bityo icyo kibazo kigakemuka mbere y’ibindi.

Yavuze ko kugira ngo imyanzuro ifatirwa mu nama za AU ijye irushaho gushyirwa mu bikorwa, hakwiye kubaho uburyo abayobozi ba AU basimburana ku rwego rw’abakuru b’ibihugu, utahiwe akazajya atorwa mbere y’umwaka umwe.

Mu mavugurura ya AU harimo no kuvugurura imikorere ya Komisiyo y’uwo muryango ari nayo ikurikirana umunsi ku munsi ibikorwa byawo.

Mu 2018 u Rwanda rwagaragaje ko kugira ngo iyo Komisiyo igere ku ntego, hakwiriye kwigwa ku buryo bwo kuyishakira abakozi bashoboye kandi hagategurwa n’uburyo bwo gukorera ku mihigo abatakoze ibyo bashinzwe bakabibazwa.

Umwe mu myanzuro iri gushyirwa mu bikorwa n’ibihugu, harimo ko ibikorwa bya AU, bigomba gushingira ku bushobozi bw’abanyafurika, aho buri gihugu cyajya gitanga 0.2% by’amahoro y’ibyinjira mu gihugu, ukajya muri AU, amafaranga akomoka kuri ayo mahoro yose hamwe akazagera kuri miliyari $1.2 buri mwaka.

Ibi byatanze umusaruro kuko Umuryango wa Afurika yunze Ubumwe (AU), urimo gukoresha ingengo y’imari uzakoresha mu 2019, yagabanutseho 12% ugereranyije n’iy’umwaka ushize, ariko ikagaragaramo ukwigira kwa Afurika.

Mu 2019, ingengo y’imari ya AU ingana na miliyoni 408 z’amadolari. Ibihugu bya Afurika biyifitemo uruhare rwa 66%, bingana na miliyoni 269 z’amadolari naho abaterankunga bakagiramo uruhare rwa 34% bingana na miliyoni 139 z’amadolari.

Perezida Kagame arageza ku bakuru b'ibihugu na Guverinoma bigize AU, raporo ku mavugurura y’inzego zigize uwo muryango

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza