00:00:00 IGIHE NETWORK KN KINYARWANDA EN ENGLISH FR FRANCAIS

Nta mwana cyangwa umugore wigeze apfa! Gatete wigereye i Kishishe yavuze

Yanditswe na Akayezu Jean de Dieu
Kuya 10 Mutarama 2023 saa 01:03
Yasuwe :

Umunyamategeko akaba n’umugishwanama muri politiki, Gatete Nyiringabo Ruhumuliza uherutse i Kishishe muri Repubulika Iharanira Demokarasi ya Congo, yasobanuye ko nta mwana cyangwa umugore wapfuye ndetse nta nzu yatwitswe muri ako gace nk’uko bivugwa.

Kishishe ni icyaro giherereye muri Teritwari ya Rutshuru, iri mu zigize Kivu y’Amajyaruguru, hakaba mu birometero 70 uvuye mu Mujyi wa Goma muri Repubulika Iharanira Demokarasi ya Congo.

Tariki 1 Ukuboza 2022, Umuvugizi w’Igisirikare cya Leta ya Congo, FARDC, Général Major Sylvain Ekenge Bomusa yasohoye itangazo rivuga ko muri aka gace ko hishwe ‘abasivile’ bagera kuri 50, ashimangira ko byakozwe n’Umutwe wa M23.

Guverinoma y’icyo gihugu yaje kunga mu ryavuzwe na we ariko yo ivuga ko abishwe barenga 100, ndetse hashyirwaho iminsi itatu y’icyunamo cyo kubibuka.

Ibyatangajwe na Leta ya Congo byaje kugaragara ko ari ibinyoma kuko nubwo ako gace ka Kishishe kabereyemo imirwano tariki 28-29 Ugushyingo 2022, ndetse ikagwamo abantu ariko ibyakurikiyeho ni byo byateje urujijo.

Nibyo byatumye abanyamakuru bakora inkuru zicukumbuye bakorera urugendo mu gace ka Kisheshe ndetse mu bo bajyanye na bo harimo n’Umunyamategeko akaba n’umugishwanama mu bya politiki yo mu karere, Gatete Nyiringabo Ruhumuliza.

Uyu munyamategeko yatumiwe mu kiganiro kuri RBA asobanura ibyo yiboneye n’amaso ye ndetse n’ubuhamya biherewe n’abaturage batuye i Kishishe.

Agaruka ku mpamvu yatumye bajyayo yagize ati “Twagiye Kishishe tuzi iki? Mbere y’uko tujyayo twasomye amatangazo yose yashyizwe ahagaragara, ayakozwe na Loni, akorwa na Leta ya Congo, ibinyamakuru mpuzamahanga byose uko byakabaye bibisubiramo bityo birega M23 kuba yaramaze abantu.”

Yakomeje agira ati “Mukwege wahawe igihembo cyo kuba ari umunyamahoro [Denis Mukwege wigeze guhabwa igihembo kitiriwe Nobel], aravuga ngo si bwo bwa mbere M23 igiye ahantu […] ngo inyeshyamba zihisha mu baturage zikabashyira imbere kugira ngo zibikingemo ngo M23 ikaza ntirobanure ikica abantu bose.”

Gatete avuga ko ibintu byose byashinjwe M23 bihabanye n’ukuri kuko nta bana bigeze bicwa cyangwa ngo abaturage bashimutwe.

Ati “Twari tuzi ko bareze M23 ko yishe abantu bose harimo abagore, n’abana, irangije itwika amazu, yasanze ngo abantu basenga mu rusengero ari Abadivantisiti, irangije ibiciramo, bica abagabo, abagore n’abana, batwika amazu, bashimuta abagore […] niyo makuru twari dufite.”

Yakomeje agira ati “Mu by’ukuri, nta mwana n’umwe wigeze upfa i Kishishe, nta mugore n’umwe, ibiganiro turabifite byose […] Twageze i Kishishe, dusanga nta mwana wigeze apfa, nta mugore wigeze apfa, nta nzu yigeze itwikwa. Amazu yose aracyahari, nta muntu wigeze ashimutwa, nta muntu wigeze afatwa ku ngufu […] abantu baragenda bakagaruka ni urujya n’uruza.”

Abaturage baravuze

Itsinda ry’abasuye Kishishe ryasanze abenshi mu baturage batuyeyo bavuga Ikinyarwanda. Aba baturage basobanuye uburyo imirwano yahuje Ingabo za Leta ya Congo na M23, imibare ya nyayo y’abantu bishwe cyane ko bari abavandimwe n’abaturanyi babo.

Mu byo bahurijeho, harimo kuba abishwe babarirwa muri 19 n’abandi bakomerekeye muri iyi mirwano. Ni imvugo inyomoza cyane iya Guverinoma ya RDC kuko yo yari yatangaje ko ahubwo abishwe bagera muri 300.

Umuturage waganiriye n’iri tsinda ry’abanyamakuru yagize ati “Tariki 21 Ugushyingo ni ho bageze aha ngaha, hanyuma guverinoma iragenda ubwo M23 ibona kuhafata. Kuva icyo gihe bahafashe nta bibazo byigeze bihaba. Hano turatuje ntabwo twavuga ibyo kubeshya bitigeze bibaho.”

Undi muturage yagize ati “Mu kugaruka ni ho bahuye na Mai Mai, niba uri kumva ngo bishe abantu, bishe barimo kugaruka ariko ntabwo […] ubwa mbere barimo kurwana na guverinoma nta muturage wigeze apfa.”

Mugenzi we yagize ati “Ariko aha ngaha twahasanze imirambo 11 […] kuva icyo gihe ibyo byamara kuba, bakoresheje inama hariya hepfo ku muhanda, babwira abaturage bati ‘muhumure, kandi ibi byabaye mubyihanganire, mutubabarire kuko bariya bantu gupfa ntabwo ari yo ntego yacu.”

Ababaturage kandi bavuga ko Umutwe wa M23 uramutse usubiye inyuma, ukabasiga bonyine bagira ibibazo bikomeye kuko bashobora kwicwa n’indi mitwe y’inyeshyamba ikorana na FARDC.

Umwe yagize ati “Twazagira ikibazo kubera Mai Mai bumvise ko M23 yagiye, bahita bagaruka hano, ugasanga batumereye nabi, ikindi cyiyongereyeho na FDLR na yo, hari igihe batumerera nabi, ngo ko mwavugaga ngo Abatutsi banyu none ko bagiye, ugasanga itumereye nabi.”

Gushyigikira RDC ni ukudaha agaciro ikiremwa muntu

Umushakashatsi kuri Jenoside, Tom Ndahiro, Umuryango Mpuzamahanga n’abandi bakomeje gushyigikira ibinyoma bya Leta ya Congo n’ingabo zayo muri rusange, ari ukudaha agaciro ikiremwamuntu.

Ndahiro ati “Ni ukudaha agaciro ikiremwa muntu, ni ugufata uruhare, ubundi hari ukubogama no kurambarara, hari umuntu ubogama n’ugenda hasi akarambarara. Hari ikimenyetso abantu bagombaga kumva kijyanye n’itangazo ry’ushinzwe itumanaho muri Leta ya Congo.”

Avuga ko bibabaje kuba amahanga akomeje gushaka gutwerera M23 ibyo bikorwa byo kwica abaturage yirengagije ibikorwa by’Ingabo za Congo zifatanyije n’abarimo Umutwe w’iterabwoba wa FDLR, ugizwe na bamwe mu basize bakoze Jenoside yakorewe Abatutsi mu Rwanda mu 1994.

Umunyamategeko Gatete Ruhumuliza (uri hagati wambaye imyenda y'umukara) yavuze ibyabereye i Kishishe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .