00:00:00 IGIHE NETWORK KN KINYARWANDA EN ENGLISH FR FRANCAIS

Ngororero: Ubupfumu bwatunzwe urutoki mu kibazo cy’igwingira ry’abana

Yanditswe na Hakizimana Jean Paul
Kuya 18 May 2022 saa 08:54
Yasuwe :

Ababyeyi bo mu Karere ka Ngororero baravuga ko hakiri imyumvire ya bamwe muri bo barwaza imirire mibi aho kujyana abana kwa muganga, bakayoboka inzira y’abapfumu bakeka ko babaroze, ibi bikaba biri mu bituma imibare y’abana bagwingiye itagabanuka vuba.

Ibi barabivuga nyuma y’aho aka Karere ariko gasigaye inyuma y’utundi mu kurwanya igwingira. Ubushakashatsi bwakozwe na DHS mu 2015 bwagaragaje ko aka Karere gafite abana bari munsi y’imyaka itanu bagwingiye bangana na 55,5%.

Ubundi bushakashatsi bwongeye gukorwa mu 2020 bwagaragaje ko Ngororero igeze kuri 50,5% irwanya igwingira, bivuze ko mu myaka itanu yakuyeho 5% mu gihe kuri ubu u Rwanda rugeze kuri 33% rurwanya igwingira, intego ikaba ari uko 2024 izarangira nibura igihugu cyose kiri munsi ya 19%.

Kuki Ngororero ikomeje kuza inyuma?

Bamwe mu baturage bo mu Murenge wa Gatumba baganiriye na IGIHE, bavuze ko bimwe mu bituma kurwanya imirire mibi bitihuta, biterwa na bamwe mu baturage bafite imyumvire yo kutamenya gutegura indyo yuzuye. Hari ubwo usanga umubyeyi aketse ko umwana we ufite imirire mibi yarozwe, akajya kumuvuriza mu bapfumu aho kumujyana kwa muganga cyangwa kujya kwiga uko bategura indyo yuzuye mu gikoni cy’umudugudu.

Niyomukiza Gorethi utuye mu Mudugudu wa Kimisagara mu Kagari ka Karambo, yavuze yagiraga ipfunwe ryo kujya kwa muganga kuvuza umwana we ikibazo cy’imirire mibi.

Ati “Ku giti cyanjye nari mfite ubumenyi buke mu gutegura indyo yuzuye, njye nkishyiramo imyumvire yanjye nti ‘ni za nzoka z’abana’, ariko nageze kwa muganga baranyigisha ubu umwana yarakize ameze neza.”

Niyomukiza avuga ko umwana we yamutwaye mu bapfumu ubwo yabonaga agiye kumupfiraho, agakeka ko bamuroze kuko yasaga umutuku cyane.

Ati “Icyo gihe nabonaga agiye gupfa, ni uko turamujyana ngenda muteruye mu ntoki, nahuye n’umuvuzi [umupfumu] ampa umuti ndetse ushaka no kumwica. Yantegetse kumuheka kugera mu rugo.”

Yakomeje ati “Yanciye 1000 Frw kuko yabonaga bigiye kurangira [umwana agiye gupfa], tugeze mu nzira yararutse ngira ngo arutse ya marozi, bukeye abajyanama b’ubuzima baza kundeba baramupima birangira banyohereje ku kigo nderabuzima bamwitaho.”

Nyiratuza Clemence utuye mu Mudugudu wa Gitega nawe avuga ko yajyaga ateka amateke n’ibijumba akumva ko bihagije ku bana be. Nyuma umwana we yaje kugaragaza ibimenyetso by’imirire mibi, undi agira ngo ni uburozi.

Ati “Nahise njya gusuzumisha nkeka ko bamuroze, urabona hano mu cyaro iyo umwana arwaye urabanza ugakeka ko bamuroze. Nagiyeyo rero baramurutsa ntiyaburuka, abajyanama b’ubuzima baza kunyegera bambwira ko agaragara mu mirire mibi batangira kunyigisha guteka indyo yuzuye.”

Nyiratuza avuga ko yasanze guteka indyo yuzuye bitagoranye kuko imboga, imbuto n’ibindi byatuma buri mubyeyi wese aha umwana we indyo yuzuye bitagoranye kubibona, ahubwo ikigoranye ari imyumvire.

Amakimbirane yo mu miryango atuma imirire mibi yiyongera

Kayiranga Alexandre usanzwe ari umujyanama w’ubuzima mu Mudugudu wa Rugara mu Kagari ka Karambo, avuga ko hari abana bamwe bagaragara mu mirire mibi kubera uburyo ababyeyi babo babanye mu makimbirane, bigatuma aho gushyira hamwe ngo babatekere indyo yuzuye, kenshi baba bahanganye.

Umuyobozi w’Akarere ka Ngororero wungirije ushinzwe Imibereho myiza y’Abaturage, Mukunduhirwe Benjamine, avuga ko nta makuru afatika bafite ku babyeyi bajyana abana mu bapfumu ariko ko ikibazo cy’imirire mibi bagihagurukiye.

Ati “Twabegereje ubuvuzi bwa hafi, nta mpamvu yo kujya gushaka amakuru ku mwana wawe warenze ku mujyanama w’ubuzima, warenze ku ivuriro ry’ibanze twabegereje, ku bigo nderabuzima, ibitaro ndetse natwe ubwacu, turashishikariza abaturage kugana inzego z’ubuzima zashyizweho.”

Yavuze ko nk’Akarere hari byinshi bari gukora kugira ngo bahashye ibi bibazo, mu byo bari gukora ngo harimo kwigisha ababyeyi kwita ku bana kuva bakibatwite kugera umwana akuze.

Mukunduhirwe yavuze ko bari gushyira imbaraga mu ngo mbonezamikurire kuko “Umwana wagiyeyo akabona serivisi zihatangirwa zirimo imirire myiza, isuku no gukangura ubwonko bwe, uwo mwana tuba twizeye ko azakura neza kuko afite ababyeyi bamwitaho.”

Uretse iyi gahunda, yavuze ko bari gushyira imbaraga mu bikoni by’Umudugudu, gupima abana buri kwezi mu kumenya imibare y’abari gusubira inyuma n’ibindi.

Ku rundi ruhande, uyu muyobozi ashimangira ko gahunda yiswe ‘Ni uwacu nakure neza’ y’ababyeyi bishyize hamwe, bagashyiraho ikigega cyihariye cyunganira ingo mbonezamikurire no kugenzura imiryango irimo abana bafite ibibazo by’imirire mibi, izatanga umusaruro.

Iyi gahunda yatangirijwe mu Murenge wa Gatumba igiye gukwirakwizwa mu yindi mirenge bigizwemo uruhare n’urubyiruko rw’abakorerabushake aho rugenzura ababyeyi bafite abana bagaragaweho n’ikibazo cy’imirire mibi, bagahabwa Shisha kibondo ndetse bakanagenzura niba umwana wagaragaye mu mirire mibi abona ibyo kurya byujuje ubuziranenge.

Umuyobozi w’Akarere ka Ngororero wungirije ushinzwe Imibereho myiza y’Abaturage, Mukunduhirwe Benjamine, yagaragaje ko bafite gahunda nyinshi zigamije kurandura ikibazo cy'imirire mibi
Abana bitabwaho mu ngo mbonezamikurire

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .