Ngirabatware wahamijwe ibyaha bya Jenoside yakorewe Abatutsi arasubira imbere y’Urukiko

Yanditswe na Akayezu Jean de Dieu
Kuya 17 Ukwakira 2019 saa 09:09
Yasuwe :
0 0

Urwego rwasigariye Urukiko Mpuzamahanga Mpanabyaha rwashyiriweho u Rwanda (MICT), ku cyicaro cy’Umuryango w’Abibumbye i Arusha muri Tanzania, ruburanisha Ngirabatware Augustin wahamijwe ibyaha bya Jenoside yakorewe Abatutsi mu 1994.

Umucamanza Vagn Joensen ni we uraburanisha uru rubanza rwa Ngirabatware ushinjwa kwivanga no guha ruswa abatangabuhamya ngo bahindure imvugo. Iburanisha riteganyijwe kuba mu gitondo cyo kuri uyu wa Kane tariki 17 Ukwakira 2019.

Ngirabatware wari Minisitiri w’Igenamigambi mu Rwanda mu gihe cya Jenoside yakorewe Abatutsi akaba n’umukwe w’umuherwe Kabuga Félicien na we ushakishwa, yahamijwe ibyaha ku wa 20 Ukuboza 2012 na ICTR birimo ibyaha bya Jenoside, gushishikariza abantu gukora Jenoside ndetse no gufata ku ngufu nk’ibyaha byibasiye inyokomuntu akatirwa gufungwa imyaka 35.

Ku wa 18 Ukuboza 2014 Urugereko rw’Ubujurire rwashimangiye ko Ngirabatware ahamwa n’ibyaha bya Jenoside, ariko rumuvanaho icyaha cyo gufata ku ngufu, igihano cye kiragabanywa kigirwa imyaka 30.

Muri Nzeri 2018, nibwo u Rwanda rwashyize mu bikorwa ubusabe bw’Umushinjacyaha Mukuru wa MICT, Dr Serge Brammertz bwo guta muri yombi abanyarwanda batanu bashinwaga kunaniza urukiko no gutanga ruswa mu itangabuhamya.

Abo banyarwanda ni Maximilien Turinabo, Anselme Nzabonimpa, Jean de Dieu Ndagijimana na Marie Rose Fatuma.

Bafashwe ku wa 3 Nzeri 2018 bashinjwa ko ubwabo cyangwa banyuze ku bandi bantu, batanze ruswa bakanashyira igitutu ku batangabuhamya bagamije guhindura imvugo yabo mu rubanza rw’uyu Ngirabatware.

Ku wa 27 Nzeri 2019, nibwo Urugereko rw’Ubujurire rwanze ibyo Ngirabatware yagerageje gukora, ashaka kwerekana, mu iburanisha ryerekeranye no gusubiramo imikirize y’urubanza rwe.

Yasabaga ko abatangabuhamya bane b’ingenzi Urugereko rwashingiyeho rumuhamya icyaha cyo guhamagarira abantu gukora Jenoside, n’icyo gukangurira abantu kuyikora no kubashyigikira mu kuyikora, bisubiyeho, nta kubeshya, bakavuguruza ubuhamya batanze mu Rukiko mu rw’iremezo.

Urugereko rw’Ubujurire rwafashe umwanzuro uvuga ko icyemezo cyafashwe mu bujurire, aho Ngirabatware yakatiwe igihano cy’igifungo cy’imyaka 30 kigumyeho.

Ngirabatware Augustin afite impamyabushobozi y’ikirenga (PhD) mu bukungu yakuye muri Kaminuza ya Fribourg mu Busuwisi, guhera mu 1986 akaba yari umwarimu muri Kaminuza Nkuru y’u Rwanda, mu 1990-1994 yari Minisitiri w’Igenamigambi.

Ngirabatware yahamijwe ibyaha birimo ibya Jenoside, gushishikariza abantu gukora Jenoside ndetse no gufata ku ngufu nk’ibyaha byibasiye inyokomuntu

Nyuma ya Jenoside ari mu buhungiro yakoze mu bigo binyuranye muri Gabon no mu Bufaransa. Yafatiwe mu Budage ku wa 17 Nzeri 2007, aka ari mu biganza by’Urukiko Mpuzamahanga Mpanabyaha rwa Arusha kuva kuwa 8 Ukwakira 2008. Urubanza rwe rwatangiye ku wa 22 Nzeri 2009.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza