Musanze: Hagiye gukazwa ingamba zirimo gupima abakorera mu masoko manini mu gukumira Covi-19

Yanditswe na N.Kubwimana Janvière
Kuya 8 Nzeri 2020 saa 02:01
Yasuwe :
0 0

Ubuyobozi bw’Akarere ka Musanze bwatangaje ko hagiye gukazwa ingamba n’amabwiriza yo gukumira no kwirinda Covi-19 , by’umwihariko mu masoko manini yo mu mujyi arimo isoko rinini rya GOICO n’irindi ry’ibiribwa rizwi nka Kariyeri.

Izi ngamba zirimo gushyiraho ibihano bikarishye zafashwe nyuma y’uko bwa Mbere mu Karere ka Musanze ku itariki ya 5 Nzeri 2020 mu bipimo byagaragajwe na Minisiteri y’ubuzima by’abarwayi ba Covi-19, habonetsemo abarwayi umunani muri aka Karere barimo batatu bo mu isoko rinini rya GOICO riri mu mujyi wa Musanze.

Bamwe mu baturage bo muri aka Karere barimo n’abakorera muri aya masoko manini, bavuga ko batewe impungenge no kubona bagenzi babo bakoreraga hamwe barasanzwemo icyo cyorezo, gusa nabo bakemeza ko hari bamwe batangiye kwirara ntibubahirize amabwiriza yashyizweho abafasha kwirinda Covi-19.

Mukamusonera Emeline, umucuruzi w’imyenda mu isoko rya GOICO yagize ati " Tumaze iminsi twumva ko iki cyorezo cyibasira cyane abakorera mu masoko, natwe twatunguwe no kumva cyatugezemo. Mu by’ukuri biteye ubwoba pe, cyane ko bigaragara ko hari abatangiye kwirara batubahiriza amabwiriza, basa n’abibwira ko icyorezo kidahari, gusa biduhaye isomo ko turi kumwe nacyo".

Karegeya Innocent na we yagize ati " Hari aho ugera ukabona agapfukamunwa bagatwaye mu ntoki nk’isakoshi, abandi kari mu mufuka nk’aho ari ikofi, bakibuka kukambara babonye umupolisi, kubera ko hano nta barwayi benshi bahabonekaga bibwiraga ko nta kibazo, ariko kuba habonetse abangana gutya bivuze ko natwe Covi-19 tuyifite atari iy’i Kigali".

Umuyobozi w’Akarere ka Musanze, Nuwumuremyi Jeannine yavuze ko abaturage badakwiye kwirara bumva ko icyorezo kiri mu tundi Turere ahubwo n’aho bari cyahageze, anashimangira ko ibihano bizakomeza gukazwa, ariko bikajyana no gupima abantu benshi cyane abakorera mu masoko manini.

Ati “Umuntu umwe wafashwe ubwabyo bikwiye guhabwa agaciro, ariyo mpamvu ingamba zikarishye zizakomeza kubahirizwa kugira ngo ejo tutazakomeza kugwiza imibare y’abandura. Tuzakomeza gukorana n’Ibitaro bya Ruhengeri hapimwe abantu benshi cyane muri aya masoko manini".

Yakomeje avuga ko gufunga aya masoko bitazakorwa kuko afatiye runini abayakoreramo n’abayarema, ahubwo ikiruta byose ari uko buri wese aharanira kwirinda no kurinda bagenzi be, gusa ngo n’aho bitazakorwa ibihano byateganyijwe bizabageraho, asaba abazahanwa kwakira igihano bahabwa, ariko bakanagikuramo isomo ryo kudakina n’ubuzima bwabo n’ubwa bagenzi babo.

Kuva icyorezo cya Covid-19 cyagera mu Rwanda, mu Karere ka Musanze hamaze kuboneka abarwayi bacyanduye bagera ku 10.

Abakorera mu masoko manini muri Musanze bagiye gutangira gupimwa mu rwego rwo kwirinda Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .