Muri Kigali harakekwa ibyobo bigera 64 byajugunywemo abatutsi muri Jenoside

Yanditswe na Thamimu Hakizimana
Kuya 22 Mata 2021 saa 07:58
Yasuwe :
0 0

Ubuyobozi bw’Umujyi wa Kigali, bwatangaje ko mu bice bitandukanye by’Uturere tuwugize hakekwa ko harimo ibyobo bigera kuri 64 byajugunywemo imibiri y’abatutsi muri Jenoside yakorewe abatutsi mu 1994.

Ibi byatangajwe n’umuyobozi w’Umujyi wa Kigali, Rubingisa Pudence, mu muhango wo kwibuka ku nshuro ya 27 jenoside yakorewe abatutsi by’umwihariko bo mu Murenge wa Muhima mu Karere ka Nyarugenge.

Umuyobozi w’Umujyi wa Kigali, Rubingisa yabwiye IGIHE ko aya makuru yatanzwe n’abafungiwe kugira uruhare muri Jenoside yakorewe abatutsi mu 1994. Yavuze ko hagikusanywa amakuru kugira ngo bamenye koko aho ibyo byobo biherereye.

Yagize ati “ Amakuru tumaze gukusanya ubu agaragaza ko tumaze gukusanya amakuru y’ibyobo hafi 64 byiciwemo abatutsi muri jenoside, ni amakuru tukigerageza kugenzura niba ariko bimeze koko no kugira ngo tumenye aho ibyo byobo biherereye.”

Yakomeje avuga ko kugira ngo ibi byobo bimenyekane bisaba ko abazi ahiciwe abatutsi muri jenoside batanga amakuru.

Ati “ Icya mbere n’uko kuba hari abantu batari batanga amakuru ari ikibazo, biranadusubiza inyuma muri ya gahunda y’ubumwe n’ubwiyunge. Dushaka ko abafite ayo makuru ari ababihaniwe ari abakatiwe na Gacaca bayatange ariko noneho n’abandi baba bafite amakuru yadufasha bayatange.”

Umuhuzabikorwa w’Akarere ka Nyarugenge, Ngabonziza Emmy, yavuze ko aya makuru y’ibi byobo bakeka ko byiciwemo abatutsi muri Jenoside bari kuyakusanya bafatanyije n’abaturage.

Ati “ Hari nk’amakuru y’ibanze turimo guheraho turi gukura ku bafunzwe bazira icyaha cya Jenoside bari muri za gereza. Hariho amakuru y’ibanze twahereyeho ku byobo bigera 63, uyu munsi dufite amakuru ariko adahagije ubwayo.”

Uhagarariye Ibuka mu Murenge wa Muhima,Nizeyimana Olivier de Maurice yavuze ko ari iby’ingenzi kumenya aho ababo biciwe kuko bifasha kuruhuka no kubohoka muri gahunda y’ubumwe n’ubwiyunge.

Yashimye kandi ubuyobozi kuba bwarumvise ubusabe bw’abarokotse Jenoside hakubakwa Urwibutso rwo gushyinguramo abatutsi biciwe kuri Paruwasi ya Saint Famille, nk’ahantu hiciwe abantu benshi.

Mu muhango wo kwibuka ku nshuro ya 27 Jenoside yakorewe abatutsi mu 1994 by'umwihariko mu Murenge wa Muhima
Umuyobozi w Umujyi wa Kigali n uw Akarere ka Nyarugenge bacana urumuri rw icyizere
Umuyobozi w’Umujyi wa Kigali, Rubingisa Pudence n'uhagarariye Ibuka mu Murenge wa Muhima, Nizeyimana Olivier de Maurice bacana urumuri rw'icyizere
Umuyobozi w’Umujyi wa Kigali, Rubingisa yatangaje ko mu Mujyi wa Kigali hakekwa ko hari ibyobo bigera kuri 64 byiciwemo abatutsi muri Jenoside
Urwibutso rwa Jenoside yakorewe abatutsi rwo ku Muhima

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .