00:00:00 IGIHE NETWORK KN KINYARWANDA EN ENGLISH FR FRANCAIS

Mukamana yambukije imbizi z’u Rwanda umuco wo ‘guca imyeyo’ (video)

Yanditswe na Thamimu Hakizimana
Kuya 8 June 2022 saa 01:24
Yasuwe :

Benshi bajya mu ndege bwa mbere bagiye kwiga, abandi bakaba bagiye mu kazi, gusura imiryango n’izindi gahunda zitandukanye. Mukamana Dative yagiye mu ndege bwa mbere agiye guca imyeyo y’abagore b’i Burundi, bamwifuje cyane kugera ubwo bidashoboka kiwabo.

Uyu mugore w’imyaka 45, yabwiye IGIHE ko atunzwe na serivisi aha abagore n’abakobwa akabacira imyeyo ndetse akavuga ko muri iyi minsi akazi kari kugenda neza cyane kuko ari kuganwa na benshi.

Ikimenyimenyi ni uko abamugana batakiri Abanyarwanda gusa, kuko uyu mugore ari no kubaka isoko rikomeye mu Burundi, aho yahindutse imari ishyushye kubera gushakishwa cyane. Kuri ubu akubutse muri icyo gihugu, aho yamaze ukwezi kose atanga aya masomo yo guca imyeyo.

Ati “Mu minsi ishize Abarundi barantumiye bambwira ko banyifuza i Burundi kandi ari benshi batabona uko baza bose mu Rwanda. Bateranyije amafaranga bantegera indege mbasangayo kubera ko bifuzaga ko mbigisha uwo muco, nkanabibakorera kuko babonye ari mwiza nyuma yo kumenya akamaro kawo.”

Yongeyeho ko umwuga wo guca imyeyo umaze kumugeza kuri byinshi, avuga ko mu Burundi bamwishimiye cyane ku buryo kubona uko agaruka mu Rwanda bitari byoroshye.

Mu kwezi yamazeyo, yaciriye imyeyo abagore n’abakobwa 150, ahakura miliyoni 3 Frw. Yashimangiye ko abagore bafite abagabo ari bo biganje mu bakenera serivisi atanga.

Mukamana ufite abana bane, avuga ko intego ya mbere ari ugufasha ingo zibanye nabi kandi ugasanga imibonano mpuzabitsina yagira uruhare mu gukemura ibibazo zifitanye. Icyakora ngo amaze no gusaruramo agatubutse kuko abara miliyoni 10 Frw yakuye muri uyu mwuga.

Yagize ati “Abantu benshi bazaga kundeba bambwiraga ko barara ukubiri n’abagabo babo, abandi bakambwira ko babaca inyuma kuko bataciye imyeyo, ku buryo hari n’abo abagabo birukanaga bababwira ko batazongera kuryamana bataraca imyeyo.”

Yongeraho ko ashimishwa no gukemura ibyo bibazo, ati “Nubwo nkuramo amafaranga, kenshi na kenshi mba nshaka gufasha ingo kugira ngo zidasenyuka.”

Akomeza avuga ko afite intego yo kugeza uyu muco wo guca imyeyo mu mahanga kuko hari abagabo benshi babimusabye.

Ati “Hari abo muri Amerika no muri Canada n’i Burayi babinsabye, baba babishaka ku buryo ndi guteganya kuzajyayo bitewe n’uko hari abagabo bahakomoka bambwiye ko bakunda gushakana n’Abanyarwandakazi kuko benshi baba baraciye imyeyo.”

Yakomeje avuga ko anafite intego yo gushinga ishuri ryo guca imyeyo mu Rwanda mu gihe yaba amaze kubona ubushobozi bitewe n’uko abantu babimusaba.

Mukamana asobanura byinshi ku rugendo akubutsemo mu Burundi aho yaciriye abagore imyeyo

Mukamana agiye kwigisha ‘guca imyeyo’ ku rwego mpuzamahanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .