Muhanga: Abubaka amashuri barinubira amafaranga bakatwa arimo ay’umuganda

Yanditswe na Akayezu Jean de Dieu
Kuya 24 Mutarama 2021 saa 07:45
Yasuwe :
0 0

Abaturage bakora imirimo yo kubaka amashuri muri Muhanga n’abafasha muri iyo mirimo bazwi nk’abayede baravuga ko batishimira amafaranga agera ku bihumbi 8Frw bakatwa mu gihe cyo guhembwa, babwirwa ko arimo ay’umuganda.

Abagaragaje iki kibazo ni abubatse ku bigo by’amashuri ku Rwunge rw’Amashuri rwa Nyarusange [GS Nyarusange] ndetse n’ishuri ribanza rya Bengerana yombi ari mu Murenge wa Nyarusange.

Aba baturage baganiriye na IGIHE, bavuze ko batishimiye amafaranga bakatwa usanga nibura umuntu umwe akatwa hafi ibihumbi 8Frw bya buri kwezi.

Ku munsi, umufundi akorera ibihumbi 3Frw mu gihe umuyede ari 1500Frw. Ni ukuvuga ngo iyo bakoze ibyumweru bibiri [ikenzeni], amafaranga bacibwa ni 1500Frw yo kwizigamira mu kigega Ejo Heza, 1500Frw y’umuganda ndetse na 500Frw bakatwa iyo bagiye kubikuza ku Umurenge Sacco [niho umushahara wabo unyuzwa].

Umuyede utifuje ko dutangaza imyorondoro ye ku bw’umutekano yavuze ko yatangiye gukora iyi mirimo muri Mata 2020, aho nibura abaze neza acibwa ibihumbi 8Frw bya buri kwezi.

Yagize ati “Hari igihe usanga byageze muri 4000Frw iyo bayakase bose, ugasanga iyo wakoze nta kintu ukuyemo mubyo uba upanga. Hari n’abavamo kubera imbogamizi zo gukatwa amafaranga.”

Yakomeje “Tubwira abayobozi bakatubwira ngo no mu nzego zo hejuru niryo tegeko ryajeho, ngo utabashije kubikurikiza azakihorere, wareba ugasanga urakennye kandi nta handi wajya ukemera bakayakata ariko biba bikubangamiye.”

Umwe mu bahagarariye abafundi yavuze ko babangamiwe n’aya mafaranga bakatwa, bikabangamira imishinga baba barateguye gushyira mu bikorwa, bakifuza ko ubuyobozi bwabavuganira nibura ay’umuganda akavanwaho.

Umuyobozi w’Akarere ka Muhanga, Kayitare Jacqueline yabwiye IGIHE, ko ikijyanye n’amafaranga y’umuganda yakwa aba baturage atakizi ariko aya Ejo Heza ari inshingano za buri Muturarwanda gusobanukirwa akamaro ko kwizigamira ahazaza he.

Yakomeje agira ati “Ibijyanye na Ejo heza ni gahunda buri muntu ajyamo abishaka, kandi ni ukwizigamira we ubwe, ayo SACCO yo bibaye ari serivisi za banki birumvikana. Aho ntabwo navuga ngo ntacyo bakuramo, n’ubundi birabagarukira, ibisigaye nta kindi nabivugaho ni ku nyungu z’abaturage. “

Akarere ka Muhanga gatangaza ko muri gahunda ya leta yo kubaka ibyumba by’amashuri bamaze kugera kuri 85%, aho mu byumba birenga 380 hatanzwe imirimo ku baturage batandukanye barimo abafundi, abayede n’abakora indi mirimo itandukanye.

Mu karere ka Muhanga, hari abaturage bubaka ibyumba by'amashuri bavuga ko bakatwa amafaranga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .