00:00:00 IGIHE NETWORK KN KINYARWANDA EN ENGLISH FR FRANCAIS

Mudasobwa mu byumba, aho gusengera...:Injira mu nyubako izatuzwamo Abimukira bazava mu Bwongereza

Yanditswe na Akayezu Jean de Dieu
Kuya 11 June 2022 saa 07:44
Yasuwe :

Ntabwo ndabasha kugera mu gihugu cy’inzozi za bamwe mu bimukira bazaturuka mu Bwongereza bazanwa mu Rwanda ariko ibyo nabonye kuri ‘Hope Hostel’, aho aba bagore n’abagabo bazatuzwa mu minsi iri imbere, nahise ntekereza ko abenshi bazikanga bageze ku butaka bw’isezereno.

Iminsi irabarirwa ku ntoki, icyiciro cya mbere cy’Abimukira bazaturuka mu Bwongereza bakaba bagejejwe i Kigali. Kugeza ubu amakuru ahari avuga ko ku wa Kabiri tariki 14 Kamena 2022, aribwo bazafata indege iberekeza i Kigali.

Hope Hostel ifite ibyumba 50, ni imwe mu nzu zizatuzwamo aba bimukira. Ntabwo haratangazwa umubare w’abazaza mu cyiciro cya mbere gusa iyi nyubako ifite ubushobozi bwo kwakira abantu 100 kandi bakabaho bisanzuye.

Iherereye mu Karere Gasabo, mu Murenge wa Kinyinya. Kimwe n’abandi, abimukira n’impunzi bazacumbikirwa muri iyi nzu bazaba bafite uburenganzira bwo gusohoka no kwinjira igihe babishakiye.

Kuri uyu wa Gatanu tariki 10 Kamena 2022, IGIHE yasuye ahari iyi nyubako, Umuyobozi wayo, Bakinahe Ismaël ayidutemberezamo anagaruka by’umwihariko ku buryo biteguye kubakira.

Yavuze ko imyiteguro yose yarangiye kandi biteguye guha ikaze no kwakira neza abimukira ba mbere bazava mu Bwongereza.

Ati “Icyo nakwizeza abantu ni uko imyiteguro yose yararangiye, aho bazaba barara harateguye, hari aho bidagadurira, aho bazajya barira, abakenera kujya gusenga hari ahantu habugenewe n’ibindi byinshi.”

Bakinahe avuga ko hari abakozi batandukanye barimo abakora mu gikoni, abashinzwe ubujyanama, abashinzwe umutekano n’abandi bazafasha aba bimukira kwisanga nk’abari mu rugo ahantu hatekanye kandi hari buri kimwe nkenerwa.

Ati “Urabona ko ari abantu bafite imico itandukanye ndetse n’ibibazo bishingiye ku buzima banyuzemo bagera mu Bwongereza cyangwa kuba batarabashije kugera ku nzozi zabo, twe rero dufite abakozi barimo n’abajyanama bazabafasha kwiyakira neza bakumva batekanye.”

Dutemberane muri Hope Hostel….

Muri rusange iyi nzu iri ku muhanda uturuka kuri MTN Rwanda ugana mu Kabuga ka Nyarutarama, ukigera ku gipangu, kugira ngo wemererwe kwinjira wakirwa n’abashinzwe umutekano, bakakubaza ikikugenza nyuma bakabona kugufungurira.

Ku muntu uri ku gipangu utari winjira, ubona imbere ahantu handitse ngo ‘Come as a guest, leave as a friend’ bishatse kuvuga ko uhagera waje nk’umushyitsi ariko ukajya gutaha wamaze kuba inshuti y’abo uhasanze.

Iyo ugeze imbere mu gipangu uhita wakirwa n’ubuyobozi bw’iyi nyubako ukagaragaza ikikugenza, bakabanza bakagusobanurira ibijyanye n’imiterere y’iyi nyubako yagenewe kwakira aba bimukira bazava mu Bwongereza.

Ntaribagirwa ariko, ubwo babanza kugusaba gukaraba intoki n’amazi n’isabune kubera ko icyorezo cya Covid-19 kirahari kandi n’isuku ni isoko y’ubuzima; nzi neza ko Abanyarwanda icyo kintu bakizi bose.

Aho hafi ubona ahari aho icyumba bariramo ari na cyo giteganye n’inyubako nyirizina abantu bazajya babamo. Aho barira niho hari igikoni gitekwamo, abakozi bamaze kugeramo.

Mbere gato yo kwinjira aho barira ariko unyura ku iduka rito ribamo imyenda y’imbere [singlet], itabi, ikibiriti n’utundi tuntu dutangirwa ubuntu kubera ko iryo duka rito ryitwa ‘Gift Shop’. Nanjye ‘Singlet’ nayitahanye bayimpaye.

Tukiri hanze, hari ubusitani bugari bwiza cyane kandi bwisanzuye, ahantu haparikwa imodoka zaba iz’abazaba bahatuye cyangwa abashyitsi. Hari kandi n’ahantu abantu bicara bakanywa itabi.

Iyo ugiye kwinjira imbere mu nyubako nyirizina, uhita ubona hejuru ku muryango handitse amagambo y’Icyongereza aguha ikaze, anasemuye mu rurimi rw’Icyarabu. Amagambo yose yanditse ahantu hatandukanye agiye afite ibisobanuro byayo mu Cyarabu.

Impamvu ni uko nibura 90% by’aba bimukira bazazanwa mu Rwanda ari abo mu bihugu by’Abarabu nk’uko byasobanuwe na Bakinahe Ismaël uyobora Hope Hostels.

Dukomeje gutembera hanze hari indi nyubako irimo televiziyo, aho bakinira Billiards, ari nayo izajya iberamo ibikorwa bihuza abantu nk’inama, kureba umupira, kureba amakuru, filime n’ibindi bikorwa bitandukanye.

Iyo winjiye imbere mu nyubako nyirizina, babanza kugusaka, ugasanga umusore witwa Jean Paul akaguha ikaze, ubundi ugakomeza imbere bakagusobanurira ibice bitandukanye bigize inyubako.

Ni inyubako igeretse gatatu, hasi hakorerwamo ibikorwa bitandukanye birimo icyumba cya muganga kizajya gitangirwamo ubufasha bw’ibanze, hakaba n’ikindi cyumba kirimo ubwiherero n’ibindi.

Hejuru muri kabiri no muri gatatu harimo ibyumba byo kuraramo aho kimwe kirimo ibitanda bibiri, utubati tubiri two kubikamo imyenda, ameza n’utundi tuntu tw’umuntu uraye ahantu hameze nko muri hotel y’inyenyeri nk’eshatu cyangwa enye.

Muri iyi nyubako kandi kuri buri gorofa hagiye hari umwanya urimo hagati abantu bashobora gusohoka mu cyumba bakahaganirira, hari icyumba kirimo za mudasobwa eshatu, icyumba cyo gusengeramo.

Nari nibagiwe ko muri buri cyumba harimo ‘umukeka Abayisilamu’ bifashisha mu gusenga.

Hari ubusitani butoshye bwuje amahumbezi
Ni ahantu hisanzuye hari imbuga nini yo kwidagaduriramo
Imiterere y'inyubako abimukira bazacumbikirwamo uyirebeye inyuma
Aho bazajya bafatira amafunguro harateguwe
Muri iyi nyubako hari umwanya wagenewe amasengesho
Bazaba bafite mudasobwa zifite na internet y'ubuntu kandi ihoraho
Iki ni igice cyagenewe kunyweramo itabi
Hari umukeka abayisilamu bifashisha bari gusenga
Ibyumba birimo ibitanda bibiri, ni ukuvuga ko bishobora kuraramo abantu babiri
Abakunda gukina Billiards bashyizwe igorora

Amafoto na Video: Munyakazi Emile


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .