Ni igikorwa kigezweho nyuma y’umwaka ingabo z’ibihugu byombi ziri mu bikorwa byo guhashya imitwe y’iterabwoba yari yarayogoje intara ya Cabo Delgado.

Itangazo ingabo z’u Rwanda zashyize hanze, zivuga ko abaturage batangiye gusubizwa mu byabo ari abari bari mu nkambi ya Quitunda hafi y’icyambu cya Afungi. Batangiye gusubizwa mu ngo zabo muri Mocimboa da Praia.

Aba mbere basubiye mu byabo ni abantu 123, bagiye baherekejwe n’ingabo z’u Rwanda kugeza mu gace batuyemo ka Nanduadwa.

Biteganyijwe ko abantu 3,556 bari mu nkambi ya Quitunda aribo bazafashwa gusubira mu byabo.

Abaturage basigaye mu nkambi bagaragaje ko bishimiye bagenzi babo batashye nyuma yo kugarura umutekano mu uduce bahoze batuyemo

Inzego z'umutekano z'u Rwanda nizo zacungiye umutekano abaturage batahutse

Byari ibyishimo ku baturage bari bamaze igihe mu buhungiro, ubwo basubiraga mu byabo