00:00:00 IGIHE NETWORK KN KINYARWANDA EN ENGLISH FR FRANCAIS

Minisitiri Gatabazi yakirijwe uruhuri rw’ibibazo i Rwamagana

Yanditswe na Hakizimana Jean Paul
Kuya 22 April 2022 saa 06:26
Yasuwe :

Ubuyobozi bw’Akarere ka Rwamagana, bwasabye Minisitiri w’Ubutegetsi bw’Igihugu, Gatabazi Jean Marie Vianney, kubakorera ubuvugizi ku bibazo birimo iby’imihanda isaba ingengo y’imari irenze iy’ubushobozi bw’Akarere ndetse n’igice cy’icyanya cyahariwe inganda, bivugwa ko cyuzuye ariko kikaba kirimo inganda 11 gusa.

Ibi babisabye mu rugendo Minisitiri Gatabazi aherutse kugirira muri ako Karere aho yasuye ibikorwaremezo birimo icyanya gihingwamo indabo cya Bella Flowers, Igishanga cya Cyaruhogo ndetse n’icyanya cyahariwe inganda kiri mu Murenge wa Mwulire.

Nyuma yo gusura ibi bikorwa, uyu muyobozi yagiye kuganira n’abayobozi b’inzego z’ibanze ndetse n’abavuga rikumvikana kugira ngo barebere hamwe ibyateza imbere aka Karere.

Akarere ka Rwamagana, Bugesera na Muhanga tugize uturere tuzagaragira Umujyi wa Kigali, aho ibikorwaremezo n’ibindi byihutisha iterambere bigomba kuhagezwa mu buryo bwihuse.

Perezida w’Inama Njyanama y’Akarere ka Rwamagana, Rangira Lambert yavuze ko hari byinshi uyu Mujyi ukibura, ari nayo mpamvu hakenewe ubuvugizi.

Yavuze ko nko mu cyanya cy’inganda cya Rwamagana, harimo inganda nke ugereranyije n’izakabaye zihari, ati “Ngira ngo mwagize umwanya wo kuhaca murasura, ibibanza byinshi bibereye aho kandi iyo tubajije batubwira ko byatanzwe, njye mfite ingero z’abantu benshi bambajije bashaka kuza kuhakorera ariko Minisiteri y’Ubucuruzi n’Inganda buri gihe itubwira ko huzuye ariko abo babifashe ntibaza kuhakorera.”

Yasabye Minisitiri Gatabazi kubakorera ubuvugizi kuko mu nganda 50 zigenewe kuhakorera, hari inganda 10 zikoreramo n’izindi enye ziri kubakwa.

Ati “Kiriya cyanya biritwa ko cyuzuye ariko niba mwahageze hari gukoreramo inganda nke cyane ugereranyije n’izakagombye gukoreramo uyu munsi, twagira ngo rero mudukorere ubuvugizi niba hari n’abatse ibyangombwa bataraza kuhakorera bikemuke kuko hariya ni mu marembo y’Umujyi, kubona hari ibihuru ntabwo bigaragara neza.”

Uyu muyobozi kandi yagaragaje ikibazo cy’imihanda mibi ikigaragara muri ako Karere, avuga ko ibangamira imigenderanire hagati y’ako Karere n’utundi.

Ati “Dufite n’indi mibi myinshi harimo nk’uva mu Mujyi wa Rwamagana ukagera ku Gishanga cya Cyaruhogo ndetse ukanakomeza ukaduhuza n’Akarere ka Ngoma, kuri ubu nturi kugendeka kubera ikiraro cyapfuye kandi ukozwe wakongera ikintu kinini ku isura y’Umujyi.”

Yakomeje avuga ko undi muhanda ukeneye ubufasha harimo uva Kigabiro mu Mujyi ukagera mu Murenge wa Munyaga ahaturuka imyaka myinshi igurishwa mu Mujyi wa Rwamagana.

Minisitiri Gatabazi yavuze ko ku kijyanye n’ibibanza biri mu gice cyahariwe inganda, bidakwiriye ko kimara umwaka umwe cyangwa ibiri kitarubakwa, avuga ko ibyo bibanza bikwiriye guhabwa abandi bantu bakeneye kubikoresha ibyo bihuru bikavamo, ati “Turaza kuvugana na Minisiteri y’Ubucuruzi n’Inganda turebe icyakorwa.”

Ku bijyanye n’imihanda ikenewe gusanwa, uyu muyobozi yagize ati “Ubutumwa ndabutwara ariko ni ukureba n’ubushobozi bw’Igihugu, naho ubushake bwo kuyubaka bwo burahari gusa hari iy’ingenzi ikwiriye kubanza gukorwa.”

Uyu muyobozi kandi yijeje ko n’ibindi bibazo byagaragajwe bizashakirwa ibisubizo mu buryo burambye, asaba ubuyobozi gukomera ku mihigo no kuzuza inshingano bwahawe.

Minisitiri Gatabazi yakirijwe ibibazo bitandukanye mu Karere ka Rwamagana, atanga umurongo w'uburyo bizakemurwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .