MINEDUC yasobanuye uko abanyeshuri bazigira mu rugo mu bihe bya Coronavirus

Yanditswe na Ferdinand Maniraguha
Kuya 26 Werurwe 2020 saa 08:40
Yasuwe :
0 0

Ibyumweru bibiri birashize ibihumbi by’abanyeshuri bo mu Rwanda mu mashuri abanza, ayisumbuye na Kaminuza basubiye mu ngo iwabo, kugira ngo hubahirizwe ingamba Leta yashyizeho zo guhangana n’icyorezo cya Coronavirus.

Mu mashuri abanza n’ayisumbuye, abanyeshuri batashye habura igihe gito ngo igihembwe cya mbere cya 2020 kirangire kuko cyari gusozwa tariki 3 Mata.

Impungenge ni zose ku banyeshuri bari mu rugo, barimo abitegura gukora ibizamini bya Leta kuko ntawe uzi igihe cyangwa uko Coronavirus izarangira ngo basubire ku mashuri.

Minisiteri y’Uburezi (MINEDUC) yabaye ifashe ingamba zo gushishikariza abanyeshuri bari mu ngo, kwifashisha uburyo bw’ikoranabuhanga bwashyizweho (E-learning) mu gihe hategerejwe uko icyorezo kizarangira.

IGIHE yaganiriye na Twagirayezu Gaspard asobanura byinshi kuri ubwo buryo bwo kwiga hakoreshejwe ikoranabuhanga n’ikizakorwa ku batagerwaho na internet cyangwa badafite mudasobwa n’ibindi bikoresho bibafasha kubona ayo masomo aboneka kuri internet.

IGIHE: Uburyo bwa E-learning muri gushishikariza abanyeshuri, burashoboka kuri bose?

Twagirayezu: Twe turabashishikariza ko amasomo yari akwiriye gukomeza. Hari ayo bavanye ku ishuri ndetse n’ibyo turi kugerageza gushyira kuri internet. Twahereye ku gice cya mbere, ku masomo ashobora kujya kuri internet, ariho harimo ziriya mbuga zari zisanzweho n’ubundi mbere. Ibyo turi gukora ubu ni ukugerageza kuzongeramo amasomo. Hari iriya yo mu burezi bw’ibanze n’ubwisumbuye ya E-learning.reb.rw, hakaba n’iyo mu Ishuri Rikuru ry’u Rwanda ry’Imyuga n’Ubumenyingiro (RP) n’iyo muri Kaminuza y’u Rwanda.

Icyo ni icyiciro cya mbere cy’abanyeshuri bashobora kuba bafite mudasobwa cyangwa bashobora kugera kuri internet. Twanakoranye na sosiyete z’itumanaho, ziriya mbuga zose kuzisura ni ubuntu, bivuga ko uwigiyeho nta mafaranga bamukata.

Icyiciro cya kabiri, tuzi ko hari abana benshi badafite uko bagera kuri internet cyangwa badafite izo mudasobwa. N’ubundi hari amasomo bari basanzwe bafite, hari amakayi […] Ibyo baba babyifashisha mu gusubiramo. Turi kugerageza gushaka andi masomo twafata neza akajya kuri radio cyangwa kuri Televiziyo.

Turi gukorana n’amaradiyo atandukanye ndetse n’ibitangazamakuru kugira ngo tugerageze kubishyira henshi hashoboka. Hari amatsinda yacu ari gufatanya n’abandi bafatanyabikorwa, icya mbere bari gukora ni ukureba amasomo akenewe cyane, nk’ayafasha nk’abafite ibizamini bya Leta uyu mwaka, ayo tukayashyira kuri radio cyangwa kuri televiziyo henshi hashoboka. Ikindi ni ugushaka abarimu bamwe na bamwe twahitamo akaba aribo badufasha gutanga ayo masomo.

IGIHE: Abanyeshuri bigira kuri radio n’abigira kuri internet bazabasha kugendera hamwe mu masomo?

Twagirayezu: Internet ntabwo ari bwo buryo twari dusanzwe twigamo, birumvikana ko hazazamo akantu ko kutagendana twese kuko tugitangira ariko niyo mpamvu turi kugerageza. N’abo badafite internet, tuzi ko Abanyarwanda benshi bashobora kumva radio, naho tuzagerageza tunyuzeho ayo masomo. Uko tugenda twigira imbere, tuzagenda dushaka uburyo bwinshi butandukanye ku buryo abantu bose twagerageza kugendera hamwe.

IGIHE: Kuri radio na Televiziyo amasomo azajya atangwa ate?

Twagirayezu: Nitubitangira kuri radio, tuzashyiraho gahunda, ivuga ngo kuri iki gihe, muri iyi minota 15 turi kuvugana wenda n’abana biga mu mwaka wa mbere w’amashuri abanza. Tuzajya dushyiramo ibyo byiciro ku masomo amwe n’amwe. Hari n’ibyo tuzajya dushyiraho bya rusange, nk’Ikinyarwanda, Amateka […] kugira ngo abana tutabashyira mu masomo cyane yo mu ishuri, ahubwo tugerageze no kubigisha ibindi.

IGIHE: Nyuma yo kwiga bazabazwa gute?

Twagirayezu: Ibi byumweru bije n’ubundi bari bagiye gutangira ibizamini bisoza igihembwe. Bivuze ko iki cyorezo nikirangira abantu bagasubira ku mashuri, bizaterwa n’igihe tuzaba dusubiriye ku mashuri. Tuzareba gahunda y’amasomo yari isigaye, hanyuma turebe niba bazahita bakora ibizamini by’iki gihembwe kirangiye cyangwa se niba hari ukundi twabigenza. Bizaterwa n’ukuntu ibihe bizaba bihinduka.

IGIHE: Abatangiye gukoresha uburyo bwa E-learning, bagaragaje ko bugenda gahoro, kubona amasomo bigoye…

Twagirayezu: Ni ikibazo rusange cya internet. Hari aho igenda buhoro ariko hashobora kuba n’ibindi bibazo biri tekinike. Turi gukorana n’ababishinzwe kugira ngo turebe uburyo twabinoza ariko biranumvikana ko ubu nibwo abantu bari gushaka gusura ziriya mbuga kurusha abo twari dusanzwe tumenyereye. Turi kuvugana n’ababishinzwe ngo turebe uburyo twakongera maze abanyeshuri babigereho bitagoranye.

IGIHE: Ibihe nk’ibi bisigiye somo ki inzego z’uburezi mu Rwanda?

Twagirayezu: Iki gihe kiri kutwigisha amasomo menshi. Hari ibyo turi gusanga twari dukwiriye kuba dufite tudafite, hari n’uburyo bwo kwigisha twari dukwiriye kuba dufite tudafite, ibyo rero turi kugenda tubyiga uko igihe kigira imbere. N’ibi turi gushyiraho ntabwo byari bikwiriye gufatwa ko ari gahunda z’uko turi mu rugo kubera iki cyorezo, ahubwo turi no gutekereza mu gihe kirekire. N’abanyeshuri n’iyo basubira ku ishuri, ubu buryo tuzabukomeza kugira ngo tugende tubivanga na gahunda zari zisanzwe.

Iyo urebye n’aho Isi igana, n’ubundi abantu bari gushaka ubundi buryo bwo kwigamo. Ishuri ntabwo rikiri aho abantu bagenda bakiga, umwarimu akaza agahagarara imbere.

Ubu ni ukureba, ni gute abanyeshuri bafata ibyo bahabwa, ni gute bibafasha kubana n’Isi barimo? Hari igihe kizagera natwe abanyeshuri batangire kujya bakoresha ubwo buryo butari busanzwe, bakiga atari ukubikoresha mu gusubira mu masomo gusa ahubwo banagamije kubazwa.

IGIHE: Murasaba iki abanyeshuri, ababyeyi n’abarezi muri ibi bihe?

Twagirayezu: Ababyeyi ni ukubasaba guhumuriza abana muri iki gihe turimo, bakagerageza kubasobanurira kandi bakanabafasha gusubira mu masomo no kuruhuka. Nubwo tutari mu gihe cyo kuruhuka, ntabwo abana bahora bicaye bari kwiga, bagabanye umwanya bamara imbere ya za televiziyo ahubwo bagerageze kubashakira ibindi bakora kugira ngo baruhuke mu mutwe.

Ku bana bacu bo, ubutumwa tubaha ni ukumvira ababyeyi, abarezi no kumvira izindi nama turi guhabwa n’abayobozi kugira ngo twirinde icyorezo. Hari aho byagiye bigaragara ko abana bajya gutera agapira hanze ku muhanda, bakajya guhura na bagenzi babo, tubabwire ko ibyo atari byo. Bakwiriye kuguma mu rugo bubahiriza amabwiriza kugira ngo dukomeze kwirinda icyorezo.

Umunyamabanga wa Leta muri Ministeri y'Uburezi ushinzwe amashuri abanza n'ayisumbuye, Twagirayezu Gaspard, yavuze ko ibi bihe byatanze isomo ryo kongera imbaraga mu kwigishiriza ku ikoranabuhanga mu burezi bw'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza