00:00:00 IGIHE NETWORK KN KINYARWANDA EN ENGLISH FR FRANCAIS

Miliyoni 55 Frw zimaze gusaranganywa nk’ibihembo mu batomboye mu Inzozi Lotto

Yanditswe na IGIHE
Kuya 14 May 2022 saa 03:21
Yasuwe :

Kuva mu mezi atanu ashize, Tombola ya Inzozi Lotto itangijwe, nibura miliyoni zisaga 55 Frw zimaze gusaranganywa mu baturarwanda bayikinnye barimo abakoresheje ikoranabuhanga n’abanyuze ku ba agents.

Tariki ya 10 Ukuboza 2021 ni bwo Inzozi Lotto yatangijwe. Ni tombola yo ku rwego rw’igihugu yashyiriweho gushyigikira iterambere rusange rya siporo mu Rwanda.

Iyi tombola isa n’itandukanye n’izindi kuko uyikinnye ashobora gutsinda ariko na ya mafaranga yakoresheje atega, hagakurwaho make ashyirwa mu isanduku ya Leta hanyuma akazifashishwa mu guteza imbere ibikorwa by’imikino.

Inzozi Lotto ifite imikino itatu irimo Quick Lotto, JackPot Lotto na Quick 10 iheruka gutangizwa nyuma y’ubusabe bw’abakina Inzozi Lotto.

Umuyobozi wungirije wa Carousel Ltd ifite mu nshingano Inzozi Lotto, Nshuti Thierry, yabwiye IGIHE ko umukino wa Quick 10 wakiriwe neza kandi uri kwitabirwa.

Yagize ati “Quick 10 ni umukino twashyizeho kuko abakunzi b’imikino ya Inzozi Lotto basabaga ko twabaha uwihuta, uri munsi y’iminota 10, abandi bagasaba ko imibare itomborwamo yagabanuka, aho kuba 35 nk’uko byari bisanzwe muri Quick Lotto bagakina bahitamo imibare mike. Ni uko twayikoze ku buryo ukina ahitamo umubare umwe mu 10, uhereye kuri zero ukagera ku icyenda.’’

Yasobanuye ko uyu mukino watangijwe mu ntangiriro z’iki cyumweru, umaze kuyobokwa kuko “abagera kuri 35% mu bakina imikino ya Inzozi Lotto bawukina buri munsi.’’

Ukina ‘Quick 10’ asabwa gushora amafaranga ari hejuru ya 300 Frw, yatsinda agakubirwa inshuro esheshatu.

Muri uyu mukino, abakinnyi bashobora gutombora imibare 10, kuva kuri zero kugera ku icyenda (0-9). Abakinnyi babashije gukina neza bagahuza imibare isabwa, baba batsinze kandi batangazwa buri minota itanu.

Amafaranga make ashobora kwifashishwa muri uyu mukino ni 300 Frw mu gihe umukinnyi ashobora gushyiraho amafaranga atarenze 10.000 Frw.

Nshuti yagaragaje ko tombola ya Inzozi Lotto mu gihe imaze yerekanye icyizere gishya mu gushyikira iterambere rya siporo.

Yakomeje ati “Igihu cyatangiye kweyuka. Iyi mikino bwari ubwa mbere yari igeze hano, abantu bagombaga kubanza kuyumva. Kuba batangiye kugera aho batanga ibitekerezo ku byanozwa ndetse bigashyirwa mu bikorwa, biragaragaza ko bagenda babyitabira ndetse bitanga icyizere ko inshingano zacu zo guteza imbere siporo zizihuta.’’

Kugeza ubu abamaze kwiyandikisha mu bakina Inzozi Lotto cyane abakoresha ikoranabuhanga bagera ku bihumbi 400 mu gihugu hose.

Nibura ugendeye ku mibare y’Urwego Ngenzuramikorere (RURA) yo mu 2019 yerekanye ko Abanyarwanda batunze telefoni basaga miliyoni icyenda, bivuze ko abagera kuri 5% bayobotse.

Ati “Kuba ibihumbi 400 bariyandikishije mu mikino ya Inzozi Lotto nyuma y’amezi atanu ni ikigaragaza ko Abanyarwanda babyumva. Urebye mu batunze telefoni, abamaze kugana Inzozi Lotto ni nka 5%. Ni ibyo kwishimira.’’

Amabwiriza agenga Inzozi Lotto agena ko 47% y’ayategewe asubizwa abaturage nk’ibihembo, 20% ahabwa Leta agashorwa mu iterambere rya siporo. Yiyongeraho atangwa mu misoro [18%] n’ayifashishwa mu bikorwa bya Inzozi Lotto nko guhemba abakozi.

Nshuti ati “Kugeza ubu, miliyoni zisaga 55 Frw zimaze gusubira mu baturage nk’ibihembo. Hanasigara n’umusoro ku gihugu. Biratanga icyizere ko mu minsi iri imbere, bizaba byiza kurushaho.’’

Inzozi Lotto yijeje gukomeza guteza imbere serivisi zayo no gushyira mu bikorwa ubusabe bw’abaturarwanda rw’ibyo bifuza ko binozwa mu kubafasha kwiteza imbere.

Nshuti yibukije abaturwanda ko ‘gukina Inzozi Lotto ni ukwiteza imbere no guteza imbere igihugu.’

Uwifuza gukina Inzozi Lotto akanda akanyenyeri *240# cyangwa akanyura kuri website www.inzozilotto.rw.

Inzozi Lotto imaze kugira aba-agents basaga 200 bayihagarariye mu bice bitandukanye by’igihugu birimo Umujyi wa Kigali, uwa Musanze, Rubavu na Huye.

Miliyoni 55 Frw zimaze gusaranganywa nk’ibihembo mu bakinnye tombola ya Inzozi Lotto

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .