Madamu Jeannette Kagame yitabiriye ikiganiro cyatangiwemo impanuro z’uko wakwirinda kwiyahura

Yanditswe na Ferdinand Maniraguha
Kuya 30 Nzeri 2019 saa 01:23
Yasuwe :
0 0

Madamu Jeannette Kagame kuri iki Cyumweru yitabiriye ikiganiro muri Leta Zunze Ubumwe za Amerika kivuga ku buryo bwo kwita ku bafite ibibazo byo mu mutwe hagamijwe gukumira ko abantu biyahura.

Icyo kiganiro cyateguwe n’Itorero Saddleback Church riyobowe na Pasiteri Rick Warren n’umufasha we Kay Warren, kikaba cyarabereye muri Orange County, California.

Ishami ry’Umuryango w’abibumbye ryita ku buzima (OMS) ritangaza ko nibura abantu 800 000 bapfa biyahuye buri mwaka, ni ukuvuga umwe muri buri masegonda 40.

Benshi mu bibasiwe no kwiyahura ni urubyiruko ruri hagati y’imyaka 15 na 29 nk’uko OMS ibitangaza.

Polisi y’u Rwanda iherutse gutangaza ko abantu 121 bapfuye biyahuye mu mezi icyenda ya 2019, mu gihe ababigerageje bose hamwe ari 205.

Madamu Jeannette Kagame mu ijambo rito yagejeje ku bitabiriye ikiganiro mu itorero Saddleback, yashimiye Kay Warren ku bw’ubutumire muri uko kwezi kw’ibiganiro by’umwihariko mu kiganiro ku buryo bwiza bwo guhangana n’ibibazo byo mu mutwe bikunze kutavugwa, ababifite bagashirira imbere bikaba intandaro yo kwiyahura.

Pasiteri Rick Warren n’umufasha we Kay Warren basobanuye ko iby’ingaruka z’ibibazo byo mu mutwe babizi cyane kuko mu mwaka wa 2013 babuze umuhererezi wabo Mathew Warren wari ufite imyaka 27. Yiyahuye nyuma y’igihe arwana n’ibibazo byo mu mutwe birimo agahinda gakabije.

Madamu Jeannette Kagame yavuze ko u Rwanda nk’igihugu cyanyuze mu mahano ya Jenoside yakorewe Abatutsi, naho hakiri benshi bafite ibibazo byo mu mutwe bashobora no kugera ku rwego rwo kwiyahura baramutse batitaweho.

Ati “Ibyo twanyuzemo bituma tugifite abantu bagifite ibyo bibazo, kuba twaragiye duhangana n’ibyo bibazo ni igitangaza. Imana niyo yadufashije kunyura muri ibyo bibazo twahuye nabyo ariko nizera ko hari uburyo bwiza bwo guhangana na byo, rero twiteguye kwigira ku bunararibonye bwanyu.”

Yavuze ko ibibazo byo mu mutwe bidakunze kuvugwa cyangwa guhabwa umwanya cyane, nyamara bigira ingaruka ku babifite n’umuryango muri rusange.

Ati “Insanganyamatsiko y’uyu munsi ifite aho ihuriye natwe nk’abanyarwanda. Twaje kwiga uko muha umwanya ibi bibazo abantu banyuramo ariko bidakunze kuvugwa birimo kwiyahura n’ibibazo bijyanye n’ubuzima bwo mu mutwe, twishimiye kuba hano ngo twige uko mubigenza.”

Yashimye Rick Warren n’umufasha we Kay uburyo babaye hafi y’abanyarwanda nyuma y’ibihe bibi banyuzemo, bakababera abizerwa kugeza ubu.

Dan Adams, Umuyobozi ushinzwe amahugurwa mu muryango Sources of Strength wigisha gahunda zitandukanye zifasha mu kwirinda kwiyahura, yavuze ko ubufasha bwa mbere bwarinda umuntu kwiyahura ari ukumwereka icyizere.

Yavuze ko mu gihe umuntu yagaragaje ibimenyetso byo kwiheba, abantu baba bagomba kumuba hafi bakamwereka ko bamwitayeho.

Ati “Biragoye kumenya ko inshuti yawe imeze neza cyangwa ko umwana wawe ameze neza ariko burya icyizere kirafasha. Niba maze iminsi nkubwira ko ntameze neza mu bisanzwe, wenda ukuguru kuri kundya, numbwira ngo jya kwa muganga nzabibona ko unyitayeho kuko wamaze kubona ko ndi kubabara, urabizi ko ntaremewe kubabara, uzi ko hari ubundi bufasha nakabaye mpabwa ariko ntari kubona bigaragaza ko unyizera.”

Yakomeje agira ati “Ni na byo bikenewe ku bafite ibibazo byo mu mutwe, kubaba hafi ntibibe ngombwa ko dutegereza ko bagera ku rwego rwo kwiyahura. Nkeka ko kumwereka ko umwizera no kumubaza ibibazo bitamutoneka byafasha muri iki kibazo gikomeye cy’abantu biyahura.”

Adams yavuze ko nko ku rubyiruko cyangwa abakiri bato, hejuru yo kubitaho ababyeyi baba bakwiriye kubasuzumisha ku bahanga mu by’imyitwarire ya muntu, bakamenya niba batari ku rwego rw’abiyahura kugira ngo bafashwe.

Abahanga mu by’imitekerereze ya muntu, bavuga ko mbere y’uko abantu biyahura, intambwe ya mbere habanza intekerezo ziganisha ku kwiyahura, aho umuntu aba agira ati “ubuzima bwanjye bwari bwiza, none ejo hazaza ntacyo ndicyo n’ibindi, uwahitamo kwipfira.”

Kenshi kwiyahura bikunze kuba ku bantu bafite indwara zidakira, amakimbirane mu ngo, gutakaza akazi, gupfusha umuvandimwe wakundaga n’ibindi bishobora gutuma umuntu yumva ntacyo akimaze.

Intambwe ya kabiri ni ugushaka uko kwiyahura byakorwa. Muri iki gice ngo usanga umuntu atekereza kwitega mu modoka ikamwica, kugura umuti w’imbeba cyangwa gusimbuka ahantu harehare kugira ngo apfe.

Intera ya nyuma ari nayo abantu babona cyane ni ukwiyahura, aho umuntu abikora agapfa cyangwa agatabarwa.

Madamu Jeannette Kagame (hagati), Pasiteri Rick Warren (uwa gatatu ibumoso), Kay Warren (uwa gatatu iburyo), Umuyobozi wa Rwanda Leaders Fellowship, Eric Munyemana (uwa mbere iburyo), Musenyeri Laurent Mbanda w’Itorero Anglican mu Rwanda (uwa mbere ibumoso), Mary Kamanzi uyobora Peace Plan mu Rwanda (Uwa kabiri ibumoso) nyuma y'ikiganiro kivuga ku buryo bwo gukumira kwiyahura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza