Madamu Jeannette Kagame yasangije urubyiruko uko ahuza akazi kenshi no kwita ku muryango we

Yanditswe na Habimana James
Kuya 12 Mutarama 2020 saa 11:09
Yasuwe :
0 0

Madamu wa Perezida wa Repubulika, Jeannette Kagame, yavuze ko kugira ngo ahuze akazi agira no kwita ku muryango, ari ibintu bisaba ubwumvikane n’uwo bashakanye.

Yabigarutseho kuri uyu wa Gatandatu muri Kigali Convention Centre, ubwo yitabiraga ibiganiro byahuje abayobozi bakiri bato, mu rwego rwo gusengera igihugu, guhugurana no gushima Imana.

Ni ibiganiro bitegurwa n’umuryango, Rwanda Leaders Fellowship, byari bifite insanganyamatsiko ivuga ku ‘Kubaka umuryango muzima nk’ishingiro kamere ry’igihugu cyizima’.

Kimwe mu bibazo bikunze kugarukwaho muri iki kihe gihe mu muryango nyarwanda, kijyanye n’ababyeyi batagiha abana uburere bukwiye, ibi bakavuga ko babiterwa n’akazi kenshi baba bafite.

Ibi bigira ingaruka ku bana, bakaba bahura n’ababashuka kuko baba batabonye uburere bw’ababyeyi.

Mu kiganiro cyayobowe na Pasiteri Habimana Didier, yabajije Madamu Jeannette Kagame ati “Mu nshingano zanyu nyinshi harimo kuba Umuyobozi wa Unity Club, kuba uri mu bantu bagize uruhare mu gutangiza umuryango w’abagore b’abakuru b’ibihugu ku mugabane wa Afurika mu kurwanya Sida, mwashinze Umuryango Imbuto Foundation, uri First lady, uba muri gahunda nyinshi kandi ufite n’urugo, turagira ngo mudusangije izo nshingano, ese mubihuza gute kugira ngo muzikore neza kandi muharanira ko n’umuryango wanyu waba umuryango mwiza?.”

Madamu Jeannette Kagame yavuze ko ubundi habanza urugo n’inshingano z’umubyeyi, izindi zose zikaza ari inyongera.

Yagize ati “Gufatanya n’uwo mwashakanye byoroshya byinshi, ndifuza kurema agatima abakiri bato, mukwiriye kumenya ko buri rugo rugira umwihariko.”

Yakomeje agira ati “Natwe turi abantu basanzwe, ntabwo turi ibitangaza. Ubuzima bwacu natwe ni nk’ubw’indi miryango. Ibibazo bigora indi miryango duhura nabyo. Hari abavuga bati umwe ni umutwe w’urugo undi ni umutima ariko umuntu akwiye kuba yuzuye, mukuzuzanya. Mugomba kubana muri byose no gusangira byose, mutavuga ngo abana beza ni aba se. Nta shema riri mu kumva ufite abana utita abawe kuko batitwaye neza.”

Madamu Jeannette Kagame yavuze ko igihe cyose ababyeyi bashyize hamwe nta kabuza babasha kubaka umuryango mwiza, n’abawukuriyemo bakagira indangagaciro nziza.

Ati “Ababyeyi bashyize hamwe bagahuza indangagaciro nziza bakazitoza abana, babasha kubaka umuryango mwiza. Imbuto mwabibye ni nazo musarura mu muryango wanyu.”

Yavuze ko mu kurera abana nk’ababyeyi bafatanya, bakabijyaho inama kandi bakungurana ibitekerezo, ariko cyane cyane bakagirana ubumwe.

Perezida Kagame nawe yakunze kuvuga ko nubwo aba afite akazi kenshi, atajya aburira umwanya umuryango we, ndetse ko hari igihe yigeze kwiyemeza ko azajya ataha saa mbili z’umugoroba kugira ngo adasanga abana be basinziye ntabashe kubavugisha.

Mu kiganiro yatanze ku wa 6 Werurwe 2019 muri Afurika y’Epfo, aho yari yitabiriye inama ngarukamwaka y’Umuryango w’Abayobozi bakiri bato izwi nka ‘YPO EDGE’.

Yagize ati “Mu 1995 umwana wanjye wa mbere yari afite imyaka ine, buri muntu mu gihugu yari ahuze, hahoragaho inama no kugenda ugasanga bifashe amasaha yose. Nageraga mu rugo bwije kandi nkagenda kare mu gitondo.”

Yavuze ko hari ubwo hashiraga icyumweru cyose ataramubona ariko ko hari igihe kimwe yafashe umwanzuro akiyemeza kujya amubonera umwanya uko bikwiye.

Ati “Umunsi umwe nari ndyamye nka saa kumi n’igice z’urukerera haza umuntu akomanga ku cyumba nari ndyamyemo, nahise ntekereza ko ari abashinzwe umutekano wanjye banzaniye amakuru mabi.”

“Ubwo nakinguraga nasanze ari umuhungu wanjye, avuga ati “Daddy, umaze iminsi uri he?” Ntabwo nafashe umwanya wo gusobanura byinshi, nageze aho amarira atemba ajya imbere aho kujya hanze, narimo ngerageza kumva icyarimo kuba.”

Yakomeje agira ati “Nahise nizeza umuhungu wanjye ko mu gihe cyose nzaba ndi mu murwa mukuru [Kigali], icyo nzaba ndimo nkora cyose, buri saa mbili z’umugoroba nzajya ndeka ibyo ndimo nkajya kumureba mbere y’uko ajya kuryama, nkabona gusubira mu kazi.”

Perezida Kagame yabwiye abitabiriye iyo nama kumenya guhuza ibyo bakora, umuryango n’inshuti, birinda ko hagira kimwe kiruta ikindi.

Madamu Jeannette Kagame ubwo yageraga kuri Kigali Convention Centre, mu biganiro byahuje abayobozi bakiri bato, mu rwego rwo gusengera igihugu, guhugurana no gushima Imana
Madamu Jeannette Kagame yavuze ko igihe cyose ababyeyi bashyize hamwe nta kabuza babasha kubaka umuryango mwiza n’abawukuriyemo bakagira indangagaciro nziza
Ubanza ibumoso, Pastor Barbara Umuhoza wari umuhuza w'amagambo, uwa kabiri, Emmanuel Kwizera, ukora muri AEER muri Kenya, Madamu Jeanne D'Arc Umulisa, washinze gahunda yigisha abari n'abategarugori kwihangira imirimo, Pastor Liz Bitorwa uyoborora urubyiruko muri Noble Family Church na Chaste Uwihoreye, umuyobozi wa Uyisenga ni Imanzi
Madamu Jeannette Kagame yabwiye abashakanye ko umubano mwiza uharanirwa
Umuvugabutumwa Lambert Bariho ni umwe mu batanze ikiganiro
Perezida wa Sena Dr Augustin Iyamuremye yasabye abanyamadini kugira uruhare mu kwimakaza umuryango mwiza
Umuyobozi wa Rwanda Leaders Fellowship yateguye aya masengesho, Eric Munyemana
Miss Iradukunda Elsa, Nimwiza Meghan na Mutesi Jolly bitabiriye ibi biganiro
Minisitiri w'urubyiruko n'umuco Rosemary Mbabazi n'Umuyobozi w'Umujyi wa Kigali, Pudence Rubingisa muri ibi biganiro
Umuhanzi Jules Sentore yari akurikiye ibi biganiro byatangiwemo impanuro nyinshi
Umuhanzi Yvan Buravan akurikiye ibiganiro
Ange Kagame (hagati) yishimiye ibi biganiro
Minisitiri wa Siporo Munyangaju Mimosa Aurore yitabiriye ibiganiro byagarutse ku muryango muzima ukwiriye u Rwanda
Umuhanzi Social Mula akurikiye ibiganiro byatanzwe ku kwimakaza umuryango mwiza
Umuhanzi Mani Martin yakurikiye ubutumwa bw'uko umuryango mwiza w'abashakanye udapfa kubaho

Amafoto: Niyonzima Moise


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .