Umuvugizi wa M23 mu rwego rwa politiki, Lawrence Kanyuka, kuri uyu wa 15 Gashyantare 2025 yasobanuye ko aba basirikare basahuye, banakora ubundi bugizi bwa nabi nyuma y’aho abarwanyi b’uyu mutwe bafashe ikibuga cy’indege cya Kavumu.

Yagize ati “Nyuma yo gutsindwa, FARDC n’abakorana na yo bakwiye imishwaro bahunga, basiga umujyi wa Bukavu nyuma yo gusahura no gukora andi marorerwa.”

Nyuma y’aho abarwanyi ba M23 binjiye muri Bukavu ku mugoroba wo kuri uyu wa 14 Gashyantare 2025, Kanyuka yasabye abaturage kuguma muri uyu mujyi, abizeza ko bazabarinda ubugizi bwa nabi bw’ihuriro ry’ingabo za Leta ya RDC.

Yagize ati “Turasaba abaturage kuguma mu mujyi kandi ntibahangayike. AFC/M23 izakomeza kurinda abo muri Bukavu abasirikare b’imyitwarire mibi ba FARDC n’abakorana nabo mu gihe bagerageza kugaruka kugira ngo bakore andi marorerwa.”

Zimwe mu ngabo za RDC, iz’u Burundi, FDLR na Wazalendo zahungiye mu majyepfo y’uburasirazuba bwa Bukavu, hafi y’umupaka wa Kamanyola, ubwo abarwanyi ba M23 binjiraga muri uyu mujyi.

Kanyuka yasabye ingabo z’u Burundi kuva muri RDC, cyane cyane mu duce twa Nkomo, Nyangezi n’ikibaya cya Ruzizi; agaragaza ko impamvu yazikuye mu gihugu cyazo idafite ishingiro.

Ihuriro ry'ingabo za RDC ryasize risahuye umujyi wa Bukavu

Kanyuka yasabye abaturage kuguma muri Bukavu, abizeza ko M23 ibarindira umutekano