Kabamba na Katana ni uduce duherereye muri teritwari ya Kabare. Ni iya kabiri muri iyi ntara abarwanyi ba M23 binjiyemo, nyuma yo gufata ibice byinshi muri teritwari ya Kalehe.

Nk’uko amakuru aturuka muri Kivu y’Amajyepfo abisobanura, Kabamba yafashwe mu ijoro rya tariki 13 rishyira iya 14 Gashyantare 2025, Katana ifatwa mu gitondo cyo kuri uyu wa 14 Gashyantare.

Hagaragaye amashusho y’abarwanyi ba M23 banyura muri santere ya Katana, berekeza ku kibuga cy’indege cya Kavumu kiri mu ntera y’ibilometero birindwi mu majyaruguru.

Abarwanyi ba M23 bakomeje gufata ibice muri Kivu y’Amajyepfo mu gihe ihuriro ry’ingabo za RDC rikomeza kubagabaho ibitero bikomeye, rigerageza kubakura mu byo basanzwe bagenzura.

Umuvugizi wa M23 mu rwego rwa politiki, Lawrence Kanyuka, ku wa 13 Gashyantare yatangaje ko indege y’intambara ya Sukhoi-25 y’iri huriro yarashe mu bice bituwe cyane muri Kalehe, yica abasivili 10, abandi 25 barakomereka.

Kanyuka yasobanuye ko amakompora iyi Sukhoi-25 yarashe muri Kalehe yanasenye inzu z’abaturage n’Ibitaro Bikuru bya Kalehe.

Abarwanyi ba M23 ni bo bari kugenzura santere ya Kabamba na Katana muri teritwari ya Kabale

Santere ya Kabamba iri mu majyaruguru ya Kavumu

Abarwanyi ba M23 bagaragaye banyura muri santere ya Katana, berekeza Kavumu mu majyaruguru