Santere ya Kitsombiro iri mu ntera y’ibilometero 25 werekeza muri santere ya Lubero. Yafashwe nyuma y’imirwano ikomeye yahanganishije ingabo za RDC na M23 mu gitondo cyo kuri uyu wa 19 Gashyantare 2025.

Amakuru ava muri Lubero avuga ko ingabo za RDC zagerageje gukoresha imbunda ziremereye na kajugujugu, mu gukumira abarwanyi ba M23 ariko biba iby’ubusa.

Haravugwa abasirikare bahunze urugamba, batabwa muri yombi n’ishami ry’igisirikare cya RDC rishinzwe imyitwarire. Abasivili benshi na bo bahunze, berekeza ahatekanye.

Umutwe wa M23 usanzwe igenzura ibindi bice byo muri Lubero, birimo Alimbongo, Kanyabayonga, Kayna, Kirumba ndetse na Matembe, wafashe mu mpera z’umwaka wa 2024.

Imirwano yabereye muri Lubero mu gihe n’ibindi bice byo mu ntara ya Kivu y’Amajyepfo biri kuberamo imirwano, nyuma y’aho M23 ifashe umujyi wa Bukavu na Kamanyola.

Kitsombiro yafashwe kuri uyu wa Gatatu

Abarwanyi ba M23 bakomereje urugamba no mu ntara ya Kivu y'Amajyepfo