Loni yasabwe ubufasha ngo Afurika y’Epfo ite muri yombi Kayishema ukekwaho Jenoside

Yanditswe na Ferdinand Maniraguha
Kuya 15 Ukuboza 2020 saa 08:18
Yasuwe :
0 0

Umushinjacyaha Mukuru w’Urwego Mpuzamahanga Rwashyiriweho Gukora Imirimo y’Insigarira y’Inkiko Mpanabyaha (IRMCT), Dr Serge Brammertz, yasabye Akanama k’Umutekano ka Loni ubufasha mu guhatira Afurika y’Epfo guta muri yombi Fulgence Kayishema ukekwaho Jenoside.

Hashize igihe IRMCT igaragaza ko Kayishema aba muri Afurika y’Epfo nk’impunzi, nyamara icyo gihugu cyanze kumufata nubwo yashyiriweho impapuro mpuzamahanga zo kumuta muri yombi n’igihembo cya miliyoni eshanu z’amadolari k’uzamufata.

Kayishema ashinjwa ibyaha birimo uruhare mu rupfu rw’abatutsi basaga ibihumbi bibiri bari bahungiye muri Kiliziya ya Nyange ku Kibuye bishwe basenyeweho Kiliziya.

Kuri uyu wa Mbere, ubwo Umushinjacyaha Dr Serge Brammertz yaganiraga n’Akanama ka Loni gashinzwe umutekano, yasabye ubufasha ngo Kayishema atabwe muri yombi.

Brammertz yavuze ko Kayishema akomeje kwihisha kubera ko Afurika y’Epfo yanze kugaragaza ubufatanye mu kumufata mu myaka 25 ishize.

Yagize ati “Afurika y’Epfo yanze gufata Kayishema mu myaka ibiri n’igice ishize ivuga ko urwandiko rw’ubuhunzi ruvuga uregwa rutabaho. Kuki abayobozi ba Afurika y’Epfo banze gufata ingamba nyuma yo kumenyeshwa ko umuntu ushakishwa ku rwego mpuzamahanga kubera ibyaha bya Jenoside ari mu gihugu cyabo?”

Yasabye umusanzu w’ako kanama mu kumvisha Afurika y’Epfo ko igomba gufata Kayishema kandi icyo gihugu kigashyira ingufu mu gufatanya n’izindi nzego.

Ati “Igikenewe ni ugufata Kayishema. Afurika y’Epfo ikwiriye kongerera ubushobozi inzego zayo zigakorana na IRMCT umunsi ku munsi […] Twese niwo mwenda dufitiye abazize Jenoside n’abayirokotse.”

Kayishema wahoze ari Umugenzacyaha wa Komine ya Kivumu muri Perefegitura ya Kibuye, yavutse mu 1961.

Ashinjwa ibyaha bya Jenoside, kuba icyitso cy’abakoze Jenoside, ubwumvikane bugamije gukora Jenoside n’ibyaha byibasiye inyokomuntu byakorewe muri Komine ya Kivumu, Perefegitura ya Kibuye hagati y’itariki ya 6 n’iya 20 Mata 1994.

Tariki ya 15 Mata 1994 Kayishema yategetse kandi acura umugambi wo gusenya Kiliziya ya Nyange, muri Komine ya Kivumu, yarimo Abatutsi barenga 2000 babuze uko basohokamo bagapfiramo.

Yatangiye gushakishwa kuva tariki ya 4 Nyakanga 2001. Mu 2012 urubanza rwe rwimuriwe mu Rwanda, ruhabwa ububasha bwo kumuburanisha igihe yaba afashwe.

Mu bandi bashakishwa na IRMCT batarafatwa harimo Protais Mpiranya wahoze ari komanda w’Umutwe w’abasirikare barindaga Perezida Habyarimana, Munyarugarama, Phénéas wahoze ari Lt Col mu Ngabo z’u Rwanda; Ndimbati Aloys wahoze ari Burugumesitiri wa Komine ya Gisovu muri Perefegitura ya Kibuye, Sikubwabo Charles na Ryandikayo.

Hashize igihe Kayishema bivugwa ko aba muri Afurika y'Epfo ariko icyo gihugu cyanze kumuta muri yombi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .