#Kwibuka27: Minisitiri Biruta yatanze gasopo ku badakoresha inyito ikwiye ya Jenoside yakorewe Abatutsi

Yanditswe na IGIHE
Kuya 7 Mata 2021 saa 07:36
Yasuwe :
0 0

Minisitiri w’Ububanyi n’Amahanga, Dr Vincent Biruta, yahaye gasopo abagoreka n’abakoresha nabi inyito nyayo ya Jenoside yakorewe Abatutsi, by’umwihariko iyo u Rwanda rwinjiye mu bihe byo kwibuka Jenoside yakorewe Abatutsi.

Dr Biruta yabitangaje kuri uyu wa Gatatu, tariki 7 Mata 2021, ubwo hatangizwaga ibikorwa byo kwibuka ku nshuro ya 27 Jenoside yakorewe Abatutsi, yahitanye abasaga miliyoni mu minsi ijana.

Akenshi buri mwaka iyo u Rwanda rwinjiye mu bihe byo kwibuka Jenoside yakorewe Abatutsi, hakunze kugaragara abantu, imiryango n’ibihugu byohereza ubutumwa bwo kwifatanya n’u Rwanda ariko bigakorwa mu mvugo no mu nyito itandukanye n’iyemejwe n’Umuryango w’Abibumbye ivuga ko habaye ‘Jenoside yakorewe Abatutsi.’

Dr Biruta yashimiye abakomeje kwifatanya n’u Rwanda muri ibi bihe, gusa aha gasopo abohereza ubutumwa bashaka kurutoneka.

Ati “Ndifuza gushimira abavandimwe n’inshuti bakomeje kutwoherereza ubutumwa bugaragaza ko bifatanyije natwe mu gihe twibuka ku nshuro ya 27 Jenoside yakorewe Abatutsi.”

Mu mvugo ikomeye, Dr Biruta yavuze ko koherereza u Rwanda ubutumwa burutoneka muri ibi bihe ntacyo byarumarira.

Yongeyeho ati “Ku bakigorwa no gukoresha inyito nyayo ya Jenoside yakorewe Abatutsi, bo ibyiza ni uko batakwigora batwoherereza ubutumwa uyu munsi. Ntacyo bidutwaye.”

Ubutumwa bwa Dr Biruta buje nyuma y’ubwatanzwe na Perezida Paul Kagame mu gutangiza ibikorwa byo kwibuka ku nshuro ya 27 Jenoside yakorewe Abatutsi, aho na we yanenze cyane ibihugu bidaha agaciro Jenoside yakorewe Abatutsi, akenshi bikigaragarira mu kwanga gufata cyangwa kuburanisha abakekwaho uruhare muri Jenoside yakorewe Abatutsi babyihishemo.

Yavuze ko iyo mikorere birangira igize ingaruka ku mateka kuko bituma abahakana n’abakwirakwiza ingengabitekerezo ya Jenoside barushaho kwiyongera.

Ati “Iyo abashinjwa kugira uruhare muri Jenoside bahawe uburenganzira bwo gutura kandi kubazana mu Rwanda ntibikunde, bigira ingaruka zikomeye. Twabonye ubwiyongere bukabije mu bikorwa byo guhakana no gupfobya Jenoside, ku buryo bizatwara imyaka myinshi kugira ngo bihindurwe”.

Ku wa 23 Mutarama 2018 nibwo Inteko Rusange y’Umuryango w’Abibumbye yafashe umwanzuro ko tariki 7 Mata hazajya hibukwa Jenoside yakorewe Abatutsi, hahindurwa inyito yari isanzwe ko ari “Umunsi Mpuzamahanga wo kuzirikana kuri Jenoside yo mu 1994 mu Rwanda” yari yarashyizweho n’umwanzuro 58/234 wo ku wa 23 Ukuboza 2003, igatangira gukoreshwa mu 2004.

Nubwo inyito nyayo yemejwe, hari ibihugu byinangiye byanga kuva ku izima, bikomeza gukoresha inyito itagaragaza ukuri kw’ibyabaye, aho byavugaga ko ari ‘Jenoside yo mu Rwanda’ yahitanye Abatutsi n’Abahutu batavugaga rumwe n’ubutegetsi.

Ibyo bihugu birimo u Bwongereza, Leta Zunze Ubumwe za Amerika n’ibindi by’i Burayi byarifashe ubwo Inteko Rusange ya Loni yemezaga ko ibyabaye mu Rwanda bigomba kwitwa ‘Jenoside yakorewe Abatutsi’.

Muri Mata umwaka ushize, Amerika yongeye kwandika ubutumwa bwo kwifatanya n’u Rwanda buhindura inyito nyayo ya Jenoside, ibintu u Rwanda rwamaganye rwivuye inyuma.

Icyo gihe Ambasaderi w’u Rwanda muri Loni, Rugwabiza Valentine yavuze ko iyo myifatire igamije guha urwaho abahakana n’abapfobya Jenoside.

Yagize ati “Kuba u Bwongereza butemeranya no kuvuga Jenoside yakorewe Abatutsi mu 1994, ni ukwirengagiza ibyo urukiko rwemeje. Aho gushyigikira ubwiyunge, ibisobanuro by’aho Amerika n’u Bwongereza bahagaze birazana urujijo rutiza umurindi ihakana rya Jenoside rikomeje kwiyongera mu Karere k’Ibiyaga Bigari n’ahandi.

Imyanzuro itandukanye irimo uwo ku wa 9 Ukuboza 1948, ugaragaza ko ubwicanyi buba jenoside iyo bugamije kurimbura igice kimwe cy’abantu bafite icyo bahuriyeho.

Ku bijyanye n’u Rwanda, nubwo hari abandi batari Abatutsi bishwe mu gihe cya Jenoside yakorewe Abatutsi, umugambi wo kurimbura wari ugamije kumaraho Abatutsi.

Jenoside yakorewe Abayahudi ikozwe n’Aba-Nazi ba Adolph Hitler mu Ntambara ya Kabiri y’Isi, hari abandi bantu bibasiwe barimo ababana bahuje ibitsina, abafite inkomoko mu Buhinde, abamugaye n’abafite uburwayi bwo mu mutwe, Abahamya ba Yehova n’abandi. Icyakora, ntabwo iyo havugwa inyito ya Jenoside yakorewe Abayahudi, n’abo bazamo kuko Jenoside ikorwa atari bo babaga bagambiriwe.

Dr Biruta yavuze ko ubutumwa bw'ibihugu byifatanya n'u Rwanda kwibuka bigamije kurutoneka budakenewe muri ibi bihe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .