Uyu munsi utegurwa hashingiwe ku Masezerano y’Umuryango w’Abibumbye agamije kurwanya ruswa (UNCAC), uzabanzirizwa n’icyumweru cyavuye tariki ya 30 Ugushyingo kuzageza ku ya 9 Ukuboza 2024.

Muri uyu mwaka, gifite insanganyamatsiko yibanda cyane ku rubyiruko cyane ko u Rwanda ari na bo baturage benshi rufite. Igira iti "Dufatanye n’Urubyiruko mu kurwanya ruswa; Dutegure inyangamugayo z’ejo hazaza."

Binyuze mu Muganda Rusange wabaye ku wa Gatandatu, tariki ya 30 Ugushyingo, Umuvunyi Mukuru, Nirere Madeleine na Meya w’Akarere ka Bugesera, Mutabazi Richard, batangije iki cyumweru, basaba abaturage kugira uruhare rufatika mu bikorwa biteganyijwe mu cyumweru cyahariwe kurwanya ruswa.

Ni icyumweru kizarangwa n’ibikorwa bitandukanye birebana n’ubukangurambaga mu kurwanya ruswa, intego nyamukuru ikaba gukomeza guteza imbere ubunyangamugayo cyane cyane mu rubyiruko.

Ibikorwa biteganyijwe muri iki cyumweru bizasorezwa kuri Stade ya Muhanga yo mu Karere ka Muhanga.

Ibi bikorwa byose bijyanye n’lcyerekezo 2050, aho u Rwanda rwiyemeje kuba mu bihugu bya mbere ku Isi birwanya ruswa.

Abaturage ba Bugesera batangiye kwitabira ibiganiro bigamije ubukangurambaga mu kurwanya ruswa

Umuvunyi Mukuru, Nirere Madeleine na Meya w'Akarere ka Bugesera, Mutabazi Richard, bakanguriye buri wese kurwanya ruswa

Abakozi b'Urwego rw'Umuvunyi bakoreye umuganda mu Karere ka Bugesera

Umuvunyi Mukuru, Nirere Madeleine, yatanze ikiganiro ku kurwanya ruswa n'akarengane mu Banyarwanda

Urubyiruko ruzaganirizwa ku bukangurambaga burebana no kurwanya ruswa

Umuvunyi Mukuru, Nirere Madeleine n'Umuyobozi wa Polisi Ushinzwe guhuza ibikorwa bya Polisi n'abaturage mu Karere ka Bugesera, SP Marguerite Nyiraneza, bafatanya gutera igiti

Hifashishijwe imiganda y'abaturage, hazajya hatangwa ubutumwa ku kurwanya ruswa n'akarengane

Urwego rw'Umuvunyi rusaba Abanyarwanda bose kuzagira uruhare mu bikorwa biteganyijwe mu cyumweru cyahariwe kurwanya ruswa

Icyumweru cyo kurwanya ruswa cyatangiriye mu Karere ka Bugesera