Kiliziya Gatolika yakomoje ku busabe bwo kwirukana abihayimana bahamijwe ibyaha bya Jenoside

Yanditswe na Ferdinand Maniraguha
Kuya 22 Ukwakira 2019 saa 12:50
Yasuwe :
0 0

Kiliziya Gatolika mu Rwanda yatangaje ko hari ingamba zitandukanye yagiye ifatira abihayimana bahamijwe ibyaha bya Jenoside bakarangiza ibihano byabo ariko ngo iracyakora ubushakashatsi kugira ngo hagaragazwe indi myanzuro bafatirwa kubera uburemere bw’icyaha bakoze.

Mu minsi ishize inzego zitandukanye n’abaturage bagiye bagaragaza ko Kiliziya Gatolika ikwiriye kwirukana bamwe mu bihayimana bayo barimo Abapadiri, Ababikira, ba Musenyeri n’abandi bayoboke bayo bahamijwe ibyaha bya Jenoside yakorewe Abatutsi.

Nko muri Gicurasi uyu mwaka, Komisiyo y’Igihugu Ishinzwe Kurwanya Jenoside (CNLG) yagaragaje ko bidakwiriye ko abantu nk’abo basubira mu mirimo yo kwiha Imana.

Mu batanzweho urugero harimo Padiri Denis Sekamana waranGije igihano cy’imyaka 15 kubera uruhare rwe muri Jenoside, agasubizwa muri Diyosezi ya Butare. Hari n’abandi babikira babiri barangije igihano cyabo bajyanwa mu bigo by’abihayimana mu Bubiligi.

Mu kiganiro Komisiyo y’Ubutabera n’Amahoro muri Kiliziya Gatolika yagiranye n’abanyamakuru kuri uyu wa Kabiri, igamije gusuzuma umurimo w’ubumwe n’ubwiyunge mu butumwa bwa Kiliziya Gatolika mu Rwanda mu myaka 25, hagaragajwe ko hari ibyatangiye gukorwa ngo abihayimana bahamijwe Jenoside bafatirwe imyanzuro.

Arikiyepisikopi wa Kigali akaba na Perezida wa Komisiyo y’Inama y’Abepisikopi Ishinzwe Ubutabera n’Amahoro, Antoine Kambanda yavuze ko mu myanzuro bagiye bafatira abihayimana bahamijwe ibyaha bya Jenoside, harimo kubavana mu bikorwa bituma bagaragara mu ruhame no kubaha umwanya wo gusenga no kwicuza.

Yagize ati “Ku byaha bikomeye, umuntu nk’uwo ahabwa umwanya wo kwicuza no gusenga. Twemera ko umuntu aba ashobora guhinduka ariko nanone ntabwo akomeza kugira inshingano nkuko yari azifite mbere.”

Musenyeri Kambanda yakomeje avuga ko bakiri gukora ubushakashatsi kugira ngo barebe niba hari ingamba zikomeye zafatirwa uwihayimana wakoze icyaha ndengakamere nka Jenoside.

Ati “Ni ukujya ahantu ataguma mu ruhame, agasenga akanicuza kugira ngo yisubireho ariko ntakomeze inshingano ze nka mbere uretse ko dufite urugendo rw’ubushakashatsi rwo kubihuza kuko icyaha cya Jenoside ni ndengakamere bigoye no kukibonera ibihano bihagije. Icyo tuba tugerageza ni ukugira ngo nibura ya roho ya wa muntu ashobore kwicuza no kwigorora ngo yiyunge n’Imana.”

Umunyamabanga Nshingwabikorwa wa Komisiyo y’Ubumwe n’Ubwiyunge, Fidèle Ndayisaba, yavuze ko bakurikije ibiganiro bagiranye n’abaturage, babasabye ko abihayimana bakoze icyaha nka Jenoside bafatirwa imyanzuro ikomeye.

Yavuze ko ari abantu baba baraterewe icyizere na rubanda ku buryo kubasubiza mu mirimo bahozemo bitanga ishusho itari nziza.

Ati “Birumvikana ko baba barataye ubwizerwe, kandi umuntu uyobora abandi aba akwiriye kuba ari umuntu wizewe, bikumvikana ko umuryango nyarwanda uhangayikishijwe no kuba wayoborwa n’abantu baterewe icyizere imbere y’amaso y’isi yose.”

Ndayisaba yavuze ko uretse kugaragara nabi imbere y’abantu, ngo n’abo bihayimana ubwabo baba bumva baremerewe.

Ati “Hari amatorero nk’abari abapasiteri bafashe icyemezo cy’uko batakomeza kuba abapasiteri kuko bigaragara nabi. No mu bisanzwe undi munyarwanda wakoze ibyaha bikomeye bigeza ku mezi atandatu, nko mu mirimo ya Leta ntasubiramo. Iyo yakoze icyaha nka Jenoside, mu mategeko dufite hari ibyo atakariza uburenganzira. Atakaza uburenganzira bwo gutora no gutorwa.”

Muri Werurwe 2017, Papa Francis yasabiye Kiliziya ndetse n’abayigize imbabazi ku Mana ku bw’uruhare bagize muri Jenoside yakorewe Abatutsi mu Rwanda.

Itangazo ryaturutse i Vatican rigaragaza ko yicishije bugufi, Papa Francis yasabye "Imana imbabazi ku byaha ndetse no gutsindwa kwa Kiliziya n’abayo bose barimo n’abihaye Imana batwawe n’urwango ndetse n’ubugizi bwa nabi, bagaca ukubiri n’inshingano zabo z’iyogezabutumwa" mu byabereye mu Rwanda.”

Nubwo imbabazi zasabwe, imiryango irengera abacitse ku icumu rya Jenoside bakunze kuyishinja ko ntacyo Kiliziya yakoze ku gutanga bamwe mu bihayimana bakekwaho uruhare muri Jenoside yakorewe Abatutsi cyangwa abashinjwa kuyihakana no kuyipfobya.

Musenyeri Kambanda yavuze ko bakiri gukora ubushakashatsi kugira ngo barebe niba hari ingamba zikomeye zafatirwa uwihayimana wakoze icyaha ndengakamere nka Jenoside.

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza